Iha realidadi ohin loron nian, mosu krisi oi-oin iha sociedadi Timor. Igreja Katolika rekonhese ona katak hafoin tiha ukun-an, sarani komesa menus iha Igreja. Dala barak mosu pergunta: oinsa papel Igreja Katolika Timor post Independensia? De faktu, existi problemas barak maka afeta sociedadi Timor, liu-liu familia no juventude sira. Existi juventude barak maka lakon diresaun moris lolos nian hodi mete iha droga, prostituisaun (ate prostituisaun infantil), sexo livre, la respeitu inan-aman, etc. Existi familia barak maka fahe malun tamba osan ou poder politiku. Pergunta ida simples, sociedadi ida nebe maka ita hotu hakarak atu existi iha Timor Leste? Resposta laos fasil.
Iha tempu modernu ida ne'e, ho avansu teknolojia, hau hare'e katak rede sosial hanesan Facebook, Twitter, etc hadau liu tempu familia no juventude sira nian. Ema barak maka aproveita rede sosial sira ne'e hodi hakerek no hatudu sira ninia life style nebe nakonu ho koloridu no rebo2. Ema balun hatene uza rede sosial sira ne'e, maibe, ema balun la hatene uza. Sira nebe hatene uza maka sira nebe hakerek ou fo'o mensagem nebe diak. Sira nebe la hatene uza maka sira nebe aproveita hodi tolok, insulta, trata a'at malun, etc no mos hatudu sira ninia imajem korporal nebe seksi. Sociedadi ninia moris mak nune ona?
Lae. Ita sei bele hadia ita nia sociedadi hosi Krisi Humana ida ne'e. Bele komesa hosi familia hodi hatudu edukasaun diak ba oan sira. Maibe, ida ne'e laos fasil tamba existi familia barak maka ruin tiha ona.
Tuir lolos ho krisi humana nebe mosu iha ita nia sociedadi, devia kria Sekretariu de Estadu ba Promosaun Familia. Hau hanoin, ho kriasaun SE ba Promosaun Familia, bele hadia familia nia moris. Infelizmente, la iha ema ida mak hanoin to'o iha ne'e. Tamba, ita hotu hanoin katak ho deit Ministeriu Edukasaun bele ona transforma iha futuru sociedadi Timor ida diak, matenek no avansadu. Lae.
Kuandu mosu krisi iha Timor, pergunta nebe mosu maka ne'e "to'o iha nebe Estadu tau matan ba familia sira? To'o iha nebe Governo ninia planu ba familia sira?".
Maibe, dalabarak mosu pergunta: "to'o iha nebe familia ninia kontribuisaun ba hadia sociedadi no nasaun Timor?"
Ikus mai, hau hanoin Igreja no Governu tenki servisu hamutuk hodi hadia sociedadi Timor nebe moris ona iha krisi humana nia laran. Tamba, "FAMILIA FORTE, NASAUN FORTE".
Boa leitura,
Celso Oliveira
No comments:
Post a Comment