Tamba Sa Ema La gosta Hau Koalia Lian Portugues?

Hau so konhese lian Portugues hafoin Timor Leste sai hosi okupasaun Indonesia iha tinan 1999.
Tamba ne'e maka, natural, se hau no jerasaun hau nian labele koalia Lian Portugues.

Lian Portugues nebe hau koalia maka portugues brasileiro nian. Ne'e akontese tamba maioria professores portugues nebe hau konhese maka ema brasileiros. Professores brazileiros ho sira ninia atividadis dada liu hau nia atensaun do que professores portugueses rasik. Ida tan, to'o agora programa lian portugues iha tvtl la iha. Jornalista Lusa, RTP mos laiha. Jornal portugues mos la iha. Pior liu tan, Lian Portugues ne'e iha eksen oi-oin, pontuasaun oi-oin, etc.

Grasa hosi teknolojia, hau bele aprende netik buat ruma liu hosi internet ou rede sosial seluk2 (por exemplo: facebook, blog, etc). Maibe, iha loron ida, mosu surat ida iha hau nia uma. Iha surat nia laran hakerek ho Lian Tetum nune'e: "O labele koalia tan ona Lian Portugues".

Hau nia fuan taridu loron no kalan tamba ema komesa bandu ou ameasa ona hau atu koalia Lian Portugues.

Bainhira hau nia liberdade atu hakerek no koalia komesa hetan bandu ou ameasa ona, ne'e hanesan ema tau tudik iha hau nia hirus matan hodi oho hau neneik, neneik, neneik to'o mate.

Konserteza, Luis Camoes, Jose Saramago no lia nain portugues seluk tan la gosta buat sira ne'e. Sira la gosta hare'e Governo Portugues nebe la iha liu programa no apoio ba Lian Portugues iha Timor. Konserteza, sira la gosta hare'e osan nebe gasta arbiru deit iha Timor maibe ema Timor kontinua la koalia lian portugues.

Governo Portugal no ema portugues se sira hakarak atu Lian Portugues investe diak iha Timor, sira tenki halo servisu maka'as. Se lae, loron ida ema Timor sei koalia liu Ingles no Bahasa Indonesia do que Lian Portugues rasik.

Boa leitura,

Celso Oliveira