Konserteza, hau mos la konkorda ho ema sira nebe claim sira nia-an hanesan veteranus falsus. Maibe, hau hanoin, ema sira nebe mak claim sira-an hanesan veteranus falsus, iha sira nia ulun, laos kondekorasaun ou medalha mak sira hakarak atu simu, maibe liu-liu, tamba ejijensia atu kompleta sira nia moris pos-funu mak obrigado sira claim sira nia-an hanesan veteranus falsus, iha kazu ne'e, osan ou projektu hanesan instrumentu ida importanti tebes iha sira nia moris. Ne'e duni, kuandu Estado Timor fo'o fasilidadi ou oportunidadi atu ema Timor apply via dalan veteranus hodi hetan benefisiu, etc...automatikamente loke margen ba ema hotu2 atu apply kedas, seja nia veteranus ka lae (veteranus falsus).
Direitu atu moris konsidera parti ida importanti tebes iha povo Timor pos-guerra. Tamba duranti funu tinan 24 destroi tiha ona ema Timor nia moris, ne'e duni, iha tempo pos-guerra, ema hotu2 iha liberdadi i oportunidadi foun atu hadia sira nia moris.
Sai veteranus hanesan direitu funu nain sira nian nebe merese konsiderasaun, kondekoradu, respeitadu i honradu hosi povo Timor.
Sai veteranus falsus la merese kondekoradu i honradu maibe veteranus falsus koloka kestaun foun iha Timor -alias- nudar Timoroan, merese konsiderasaun i respeitadu tamba sira mos iha direitu atu moris nudar ema pos-guerra.
Atu resolve problema veteranus falsus, Governu tenki hadia Lei Veteranu nian, i, identifika lolos benefisiu nebe mak povo atu (bele) simu. Por exemplo: benefisiu ba bebe, ba labarik, ba klosan-feto ran, ba estudanti, ba viuva/o, ba defisienti, ba ema moras, ba ferik-katuas, ba veteranus, etc. Se benefisiu sira ne'e tau ida-ida iha ninia fatin, hau hanoin problemas veteranus falsus sei lakon automatikamente, tamba, direitu moris ema ida-idak nian senti kompletu ona.
Maibe, governo mos labele hanoin atu fo'o deit benefisiu ba ninia povo. Governu tenki kria servisu ba ninia povo, tenki kria oportunidadi diak no foun ba ninia povo, tenki fasilita ninia povo, atu nune halakon mentalidadi dependensia (mental ketergantungan) i halo moris konkorensia diak iha povo ninia moris. Fim
No comments:
Post a Comment