Ohin loron, Timor Leste sei rejistu barak liu sofrimentos du ke felicidades. Sei rejistu barak liu matan-ben sulin du ke hamnasa. Buat sira ne'e hotu, akontese tamba, Timor Leste hanesan rai ida nebe foin sai hosi funu. Tamba funu nia halo-halo, ohin loron sei kontinua rejistu iha familia ou uma kain ida-idak sofrimentos, tristeza, injustisa, etc. Kuandu halo rejistu iha familia nia moris, automatikamente sei hetan familia lakon sira nia keridus familias duranti funu iha Timor. La iha familia ida iha Timor Leste maka la lakon sira ninia keridus familias duranti funu.
Ohin loron, mesmu funu liu ona tinan 13 (1999-2012), maibe, sei kontinua ejisti memoria iha ema ida-idak nia moris konaba tempu uluk nian, konaba tempu funu nian, konaba tempu sofrimentus oi-oin nebe sira hetan iha sira nia moris.
Dala barak, sira husu ba tempo oinsa bele halo lakon tiha memoria konaba funu. Maibe, nein tempo bele fo'o resposta diak. Dala barak, sira husu ba sira nia-an rasik tamba sa mak sira moris iha funu laran i labele haluha memoria funu nian. Maibe, sira nunka bele hetan resposta lolos. Dala barak, sira husu ba Na'i Ulun sira konaba oinsa atu haluha tiha memoria funu nian, maibe, nein Na'i Ulun sira bele fo'o resposta diak no los tamba Na'i Ulun sira rasik mos hasoru problema konaba memoria funu nian.
Mos, ohin loron, kontinua existi problema oi-oin iha ema ou familia ida-idak nia moris; problemas drogas nebe estraga juventude barak, problema prostituta nebe estraga labarik, juventude no kaben nain barak, problema servisu la iha, problema osan, manipulasaun oi-oin, korupsaun, veteranus falsus, etc...buat sira ne'e hotu hanesan problema nasional nebe lori efeitos negativos ba moris sociedadi ou nasaun ida nian.
Se maka bele lori lia fuan "ESPERANSA" ba povo Timor? Hau hanoin, lideransas ou fundadores nasaun nebe diak, lideres relijiozus/as nebe diak, artistas nebe diak, jornalista nebe diak, inan-aman nebe diak, i, ema ida-idak nebe diak iha ninia volume de responsabilidadi ba rai no povo Timor.
Ohin loron, tenki hamosu "ESPERANSA" iha povo nia moris atu nune Timor Leste bele haka'at ba Progressu fiziku no ba Dezenvolvimentu humanu. Povo merese. Obrigado.
No comments:
Post a Comment