Ohin halo tinan 20 primeira manifestasaun hosi estudante Timor oan iha Jakarta, kapital Indonesia. Tinan 20 liu ba, iha 19 de Novembro de 1991, hafoin tiha semana ida massakre Santa Cruz, estudante Timor oan iha Bali, Bandung, Yogyakarta, Solo, Malang no fatin seluk tan, halibur hamutuk iha Jakarta hodi halo manifestasaun iha Embaixada ONU, Jakarta Pusat, nia oin.
Objektivu hosi manifestasaun ne'e maka hato'o protestu ba massakre Santa Cruz, husu Inkeritu Internasional no husu Independensia ba Timor. Resultadu hosi manifestasaun 19 de Novembro maka polisia Indonesia kaer hotu kedas estudantes nebe halo manifestasaun i sira nebe lideres hosi manifestasaun 19 de Novembro iha Jakarta hatama ba prisaun, hanesan: Nando Lasama, Gil Guterres, Joao Camara, Avelino Coelho no seluk-seluk tan.
Hafoin tiha manifestasaun ne'e, forsas militares liu hosi servisu intelijensia komesa halo intimidasaun no kapturasaun ba estudantis Timor oan iha Indonesia.
Ne'e duni, ohin loron, kuandu ita koalia konaba massakre Santa Cruz, 12 de Novembro de 1991, ita labele tau ba ses data historika, 19 de Novembro de 1991, iha Jakarta, nebe estudantes Timor oan biar karik moris no estuda iha Indonesia nia rain rasik maibe sira ho aten brani halo manifestasaun kontra Republika Indonesia.
Celso Oliveira,
No comments:
Post a Comment