My photo
Um escritor, um poeta, um aventureiro,

Friday 16 September 2011

Maijen Taur Nia Resigna-an Hare'e Hosi Aspektu Humana

Hosi: Celso Oliveira*

Abertura

Bainhira hau le notisia konaba pedido formal hosi Major General Taur Matan Ruak nebe husu resigna-an hosi FFDTL, primeira kestaun nebe hau koloka maka kestaun humana.

Maioria opiniaun sirkula nasional i internasionalmente hateten katak Maijen Taur sai hosi FFDTL hodi prepara-an ba eleisaun presidensial nebe sei realiza iha tinan oin, 2012. To'o ohin loron kontinua sirkula opiniaun ida ne'e iha povo nia le'et.

La iha ema ida mak duvida ho "Nasionalismu no Patriotismu" hosi Maijen TMR no seluk-seluk tan. Jerasaun ida ne'e maka lori funu hosi inisiu to'o hotu (fim) hodi ohin loron ema Timor oan hotu-hotu bele tu'ur ho "digna" nudar ema independenti i "menikmati hasil kemerdekaan". Jerasaun ida ne'e maka halo hodi ohin loron Timor Lorosae sai espasu bo'ot ba Timor oan hotu, seja nia uluk nudar integrasionista/autonomista/mauhu, seja uluk nia nudar independentista/lutador ba ukun rasik-an. Jerasaun ida ne'e hatudu tiha ona sira nia "NASIONALISMU no PATRIOTISMU" ba rai Timor. Jerasaun ida ne'e la sura kole, susar, terus no mate. 


Maijen Taur: Hosi militar ba vida civil

Fila fali ba kestaun humana nebe hau koloka iha leten relasiona ho Maijen Taur Matan Ruak resigna-an hosi FFDTL, hau apresenta hanoin simples nebe laos politiku, laos militar. Maibe, puramente humana.

Nudar ema normal, ema hotu-hotu, hafoin tiha funu sira buka atu moris iha ambienti ida diferenti. Laos kontinua moris iha funu nia laran maibe buka moris hakmatek, iha dame no domin nia laran. 

Ita hotu-hotu hatene katak Maijen Taur dedika nia-an iha moris militar duranti tinan 36 nia laran. Tinan 36 laos fasil atu ema ida moris nudar militar iha tempu funu nia laran. Hafoin tiha funu, Maijen Taur hakarak dedika ninia tempu iha vida civil, vida familia nian. Tamba desejo funu nain ida nian maka hafoin tiha funu, nia tenki moris hakmatek ho nia familia no maluk sira. Maijen Taur hakarak atu dedika nia tempu ba nia familia, amigos, leitura, divertimentu, etc...

Ita hotu hatene katak Maijen Taur ema ida sinceru, simples, i, sempre iha hanoin diak ba rai no povo Timor.

Ho resignasaun ne'e, ida ne'e la signifika katak Maijen Taur husik ninia responsabilidadi nudar ema Timor, nudar ema militar, nudar ema funu nain. Ninia espiritu atu servi rai no povo Timor kontinua existi, kontinua moris permanenti iha nia fuan laran. Maibe, modelu servi rai no povo Timor oin seluk ona -alias- laos militar, laos politiku.

Maijen Taur sei dezenpenha liu funsaun nudar homem da familia hodi kontinua hatudu exemplu diak ba jerasaun foun.

Parabens ba Maijen Taur Matan Ruak.

* Timor oan hela iha rai liur

No comments:

Post a Comment