Normalmente lokoraik hanesan ne'e hau nia aman sai ba futu manu. Maibe ohin lokoraik, hau nia aman kontinua tu'ur iha has hun nia okos hodi sura manu aman nebe kesi hela iha kintal laran. Hau nia abo mane nebe foin simu ninia reforma hateten ba hau nia aman nune: "ami katuas sira senti kontenti tamba biar karik ami katuas ona maibe ami mos simu netik reforma uitoan hosi governu Timor. Ne'e hatudu katak governu ida ne'e lahaluha ninia povo".
Hanesan bai-bain hau nia aman preokupa liu ho ninia manu futu do ke se tilun hodi rona hau nia abo mane koalia. Maibe, hau nia abo mane nebe isin namkurut ona nebe foin dala ida ne'e iha ninia moris tomak hetan reforma hosi governu Timor kontinua koalia ba hau nia aman nune: "oan, iha ema Timor nia uma kain, hotu-hotu tenki iha manu aman ida hodi bele kokorek no asu aman ida hosi bele hatenu".
Dalaida tan hau nia aman la liga ho lia fuan nebe hau nia abo mane hateten. Iha hau nia aman nia liman laran, nia kaer tara ida hodi kadi hela ba fatuk kadi. Manu jala nebe kesi iha has hun nia okos kokorek la para kuandu hare hau nia aman kadi hela tara iha fatuk kadi nia leten.
To'o fali kalan, hafoin tiha ami han sasoro (iha familia kiak sira kostume han sasoro molok ba toba), hau nia aman hateten mai hau nune: "oan, se hau hare'e diak hau nia aman, loron ida hau nia oan sira sei hare'e hau mos diak. Maibe, se hau hare'e a'at hau nia aman, loron ida hau nia oan sira sei hare'e a'at mos hau".
Hanesan bai-bain, molok hau atu ba toba, hau tenki rei hau nia aman no hau nia abo mane ninia liman. Hafoin tiha hau rei sira nain rua nia liman, hau mos ba toba. Kuandu hau toba, hau nunka taka janela tamba rai manas. To'o fali dader, hau nia abo mane fanun hau hosi hau nia dukur hodi haruka hau ba eskola iha dader san furak ida ne'e. Hotu/fim
Celso Oliveira
No comments:
Post a Comment