Ema Katuas Sira Nia Mehi

Ema katuas sira nia mehi
Mai hosi foho, tun ba vila.
Iha ai-laran fuik, de repenti hare hetan naroman.

Hosi dok rona asu hatenu.
Manu fuik ai-laran hananu knananuk foun.

Ho buah no malus iha ibun laran hodi buka futuro.
Se maka la mama buah no malus, laos oan Timor.

Ema katuas sira nia mehi, sei koalia buat los.
Ema katuas sira nia mehi, sei koalia ho laran.
Ema katuas sira nia mehi, sei hakarak ita nia diak, sei halo ita sai diak.
Ema katuas sira nia mehi, halo sira fuk mutin, halo sira hasarun mutin.
Ema katuas sira nia mehi, iha abut, iha fundamentu.

Mehi ida hosi ema katuas sira hosi foho
Hanesan mehi lo-los oan Timor ida nian.
Mehi ne'e sei halo ai nia sanak bok-an.
Se karik labele atu halo tan buat ida ona,
Iha netik mehi oan ida.

Celso Oliveira