My photo
Um escritor, um poeta, um aventureiro,

Wednesday, 26 October 2011

Dadolin Hosi Ildefonso no Rio Borges Konaba Massakre Santa Cruz, 12 de Novembro 1991 (Part Two)

Trajédia Santa Krús (12 Novembro 1991)
By: Ildefonso Pereira Kaboran

Tarutu nabotun fanun rai Timor
Hakilar haklalak belar mundu tomak
Ran suli turu tun habokon rai leten
Halerik no tanis harohan nafatin

Ran suli turu tun fakar rai leten
Lotun kari lemo rai halo rai metan
Espítiru timoroan manas ba beibeik
Domin ukun rasik-an buras liután

Trajédia Santa Krús loke ó-nia matan
Hakilar haklalak loke mundu tilun
Loke ó matan hodi haree ami hakilar
Loke imi tilun hodi rona ami halerik

Oan timor nia hakarak ukun rasik-an
Bele terus to’o mate luta nafatin
Hakilar haklalak tuba rai metin
Kaer liman hamutuk ukun rasik-an

Ukun-an liu ona povu sei terus
Ukun-an liu ona povu sei halerik
Halerik no terus buka tau matan
Tau matan mai ami povu terus na’in




TANSÁ Ó LA FILA?
By: Rio Borges

Loro matan sa’e ona
Mehi nakukun kalan nian tatoli ahi lakan
Housi fuan be hakilar
“Mate ka moris ukun rasik-an”

Uluk o nudar bua saren ida, boot sira ku’u
Loke tu’u ai meik
Mate hanesan balada fuik
Mate iha santa cruz maibe cruz laek
Ó isin ass wain so’e lemorai

Tansá ó la fila?
Manu kokorek ó haktuir ó mehi
Loro matan sa’e, anin fuik mai kasu nahas
Kilat musan borus, latan ba rai lian laek los ona

Loro matan monu
Ó inan tanis nalerik neon nakukun
Ó lian lakon bikan doku
Ó odamatan mos la dere

Ó ran suli hanesan we inan
Suli tuir kadalak tun to’o tasi
Ami titu ha’e ba dersan nobun
Ami seti tinan ba tinan

Ema wain lakon liman, lakon ain
Sé mak ba hatutan?
Iha sira sei marka Timor nia terus
Se lerek tau matan?
Ran sei rekere
Fitar sei marka
Istória sei hatudu
Matan delek sei sente

Ass-wain be laiha naran
Housi imi ran naksulin we matan moris
Ass-wain be iha naran
Tansá ó la hatenu?

Keta taka imi fuan
Ba naroman loro matan foin sa’e
Hanehan kosar no ran ho maskra mundo nian
Anin fuik, tasi siak sei kasu mohu

Ass-wain Santa Cruz
Ran ass-wain, rai nain, lulik Timor sei rekere
Matebian Santa Cruz, mate bian rate laek sei hakilar
“Ami mate atu naroman mosu”

Mate restu 12 de Novembro
Imi fuan sona borus, iis sei la mohu hakur we boot
Matan sei la dukur ba ahi kdesan
Hakilar nafatin hasoru veneno mundo nian.

No comments:

Post a Comment