Ai Funan Rosa

Hau hakfodak iha dadersan nakukun, biar karik hau nia matan sei dukur hela tamba oda kalan hau toba tarde. La hanesan bai-bain kuandu hau hader hau ba buka kedas kafe manas hodi hemu. Ohin dader hau hader, hau ba buka uluk ai funan rosa nebe moris buras iha hau nia jardim. Hau ku tiha ai funan rosa sanulu hodi ba tau hela iha balde ida nebe nakonu ho be. Hau fakar be ba ai funan rosa nia leten.

Iha razaun rua mak halo hau hader dadersan nakukun hodi ku ai funan rosa:

Primeiru tamba fulan Outubro, konsidera fulan Nossa Senhora nian. Iha uma kain hotu-hotu, kuandu to’o ona fulan Maio no Outubro, sira prepara ai funan rosa hodi hasa’e ba Inan Maria.

Segundu, tamba hau nia maluk diak nia tinan.

Hau prepara daudaun ai funan rosa ne’e kuandu derepenti alarme iha hau nia telemovel lian hodi fo’o hanoin mai hau katak ohin hau nia maluk diak halo tinan. Iha hau nia laran, hau dehan nune: "se karik hau osan iha, entaun hau sei bolu hau nia maluk ne’e ba han iha restauranti diak no romantiku iha tasi ibun. Maibe, tamba hau ema kiak, entaun hau fo'o deit ai-funan ne'e ba hau nia maluk diak. Ida ne'e presenti diak no folin bo'ot liu".

Ai funan rosa iha signifikadu oi-oin. Primeiru, domin. Segundu, dame. Terseiru, amizade. Hat, moris.

PARABENS BA IMI HOTU NEBE HALO TINAN IHA FULAN OUTUBRO TINAN 2011.

Celso Oliveira