Poema Nebe Koalia Hodi Hau Naran

Tempu No Amizadi

Tempu,
Dala ruma lao lalais liu.
Bainhira hateke fila fali ba kotuk,
Hare’e hetan deit maka rekordasaun.

Rekordasaun diak hamutuk ho maluk sira nebe diak.
Iha tempu funu nia laran,
Iha tempu domin nia laran,
Iha tempu eskola,
Iha tempu sei kiik, sei klosan,
Seluk-seluk tan.

Ohin loron, ema ida-idak moris tuir ninia tempu.
Ohin loron, ema ida-idak moris tuir ninia ritmu.
Rekordasaun diak nebe uluk iha, sei la lakon,
Amizadi ohin nian, mai hosi rekordasaun diak nebe nein tempu bele halo lakon.

Tempu lao nafatin ba oin,
Amizadi metin liu tan.
Biar karik bá, tempu lao lais,
Amizadi nunka lakon.

Manu Fuik Nia Lian

Manu metan nia lian,
Manu metan nia hananu,
Manu metan nia halerik,
Manu metan nia hamnasa.

Iha dadersan ida furak,
Nebe nakonu ho lia fuan «domin no dame» nian.

Manu lakateu nia lian,
Manu lakateu nebe lian iha uma nia kakuluk,
Maibe, kleur ona maka manu lakateu la iha lian.
Semo dok hosi uma nia kakuluk.

Ema ida la duni.
Ema ida la hakbesik-an ba.

Manu lakateu ida seluk hakarak lian iha uma nia kakuluk.
Maibe, lakateu ida seluk la fo’o fatin.
Kakuluk nia nain laos uma nia nain.
Maibe, lakateu nia lian fo’o hanoin ida ba kakuluk nia nain.

Manu metan ida seluk lian fila fali iha uma nia tatís.
Iha dadersan ida nebe malirin, nebe hakmatek.

Ita ema lao bele lao.
Maibe, loron ida ita sei fila fali ba ita nia KNUA.

Ran

Ran,
Ran ne’e suli hosi ema barak nia le’et.
Ran ne’e suli iha semiteriu nia laran.
Maibe, ran ne’e mai hosi ema barak nia lia fuan «UKUN RASIK-AN».

Hau loke fila fali historia funu nian.
Página ida-idak hau loke hodi hare’e historia funu nian.
Maibe, to’o iha página 12 de Novembro 1991, iha semiteriu Santa Cruz,
Hau para tiha hodi halo refleksaun.

Historia hanesan ne’e sei la repete tan.
Ema bele hakerek historia foun barak,
Ema bele halo knananuk foun barak,
Maibe, historia hanesan 12 de Novembro 1991 sei la repete tan.

Ran,
Ran ne’e suli hosi ema barak nia isin.
Iha dadersan ida nebe nakonu ho lia fuan «UKUN RASIK-AN».
Iha dadersan ida nebe katuas no ferik sira sei toba.
Klosan, feto-ran no labaraik sira hakilar «UKUN RASIK-AN».

Ran,
Ran ne’e maka halo ohin loron hau lao livre.
Ran ne’e maka halo ohin loron hau bele hakerek.
Hakerek historia funu nian.
Hakerek 12 de Novembro 1991.

Ran,
Ran ne’e labele mosu tan.
Tamba ran ne’e halo ema barak tauk.
Ran ne’e halo ema barak moris iha trauma nia laran.

Maibe,
Ran ne’e maka halo ohin loron ema barak bele hamnasa,
Bele pasiar, bele lao tun-sae, bele pinta, bele konta historia,
Bele dansa, bele tu’ur hamutuk hemu serveja oan 1, seluk-seluk tan.

Hau pinta kuadru oan ida konaba ran nebe suli iha 12 de Novembro 1991.
Ran ne’e maka suli deit ona iha kuadru nia laran.
Labele suli sai hosi kuadru nia laran.
Tamba iha kuadru nia laran, iha kamizola mutin barak.

Entre ran no kamizola mutin iha kuadru nia laran,
Hau hili maka kamizola mutin.
Tamba mutin signifika dame (peace, paz, damai).

Iha kuadru nia laran, hau mós pinta ema kaer kilat.
Maibe, dala 1 tan hau dehan entre kilat, ran no kamizola mutin,
Hau hili maka kamizola mutin.
Tamba mutin signifka dame (peace, paz, damai).