Hakerek Nain Nebe Nunka Bele Halai Hosi Nia Hanoin Rasik (2)

Inosenti

Kuandu ita ema iha poder absoluto iha liman, ita nunka hakarak atu assumi kualker erro. Maibe, kuandu erro ida mosu derepenti iha ita nia oin, ita tenta atu halo nakukun ema seluk nia hanoin ou kakutak. Ita buka salva ita nia-an hodi hasai lia fuan oi-oin hodi bele salva ita nia-an rasik ou ita nia familia rasik ou maun-alin rasik. Primeiru, ita sei dehan katak ita ema inosenti -alias- ita laos ema sala nain ou ita nunka halo sala. Ita sei halo buat hotu-hotu hodi bele taka (cover) ita nia sala. Ita tenta uza sistema hotu-hotu hodi bele taka sala nebe ita halo tiha ona. Segundo, ita sei hakas-an atu domina sistema hotu hodi nune bele fo’o apoio ba ita.

Ita sei koalia ho matan momos (ho matan fuan mean) katak ita ema inosenti. Ita sei haraik-an hodi ema seluk bele fiar katak ita ema inosenti duni. Ita sei hateten ba ema seluk katak ita ne’e ema ida nebe buka aprende ho sala nebe mosu loro-loron.

Timor Leste, oras ne’e rejistu buat foun barak. Fenomena oi-oin maka mosu iha ita ema nia moris loro-loron. Buat foun barak maka mosu. Ema balun buka aprende ho buat foun, ema balun buka halimar nafatin ho buat foun. Ema balun “cuek” ho buat foun sira ne’e.

Iha ita nia moris nudar família bele dehan katak buat hotu lao diak ou lao normal. Ida ne’e tamba ita nia inan-aman la hatene saida makaKKN, Hammer, tender, seluk-seluk tan. Bele dehan katak ita nia inan-aman hanorin ita ho moral, ho sakrifisiu oi-oin. Bainhira ita koloka-an iha sociedadi ida nia laran, ita komesa hasoru realidadi foun ou oin seluk. Bainhira mosu ona osan iha ita nia moris, bele dehan katak ita haluha buat hotu. Osan bele halo ita haluha ita nia-an rasik, maluk rasik, fen ho lain bele soe malu, oan sira bele abandona inan-aman. Osan bele halo ita ema oho malun.

Osan bele halo ita inventa historia tun sae hodi bele moris ba nafatin ou hodi bele hetan nafatin fama iha sociedadi nia laran. Por exemplo: Uluk, kuandu ita hotu-hotu sei moris pás-pasan, ita hare malu hanesan maun-alin. Uluk, kuandu ita seidauk hatene saida maka naran Hammer, ita sei moris ho prinsipiu “a’at ita hotu nian, diak ita sei senti hamutuk”. Uluk, kuandu ita sei moris susar, ita sei respeitu amu lulik sira. Maibe, kuandu ita senti ita nia banku komesa nakonu ona ho osan, entaun ita komesa hare malu hanesan inimigu. Ita “tidak mau tahu” ema seluk nia direitu ou ema seluk nia problema ou ema seluk nia moris. Apalagi ita senti katak sistema nebe ita moris bá sei fo’o apoio ba ita, entaun ita sei halo buat hotu-hotu semau gue.

Hau iha serteza katak se karik ita kontinua moris ho mentalidadi hanesan ne'e, entaun ita nunka bele sai ema diak ou ema perfeitu iha ita nia moris. Buat nebe maka ita koalia ba sociedadi, apenas atu salva ita nia fama iha sociedadi nia laran. Tamba, de faktu, iha realidadi, ita sei moris hanesan ema primitivu iha mundu modernu. Tamba saida maka hau dehan nune? Tamba, de faktu, iha realidadi ita kontinua baku malun, ódio malun, inveja malun, laran moras ba malun, la respeitu malun, la iha tempu ba ita nia família, nunka rekonhese ita nia sala, etc….

Ohin loron, ita orgulhu lori titulo oi-oin iha sociedadi nia laran hanesan ministrus, ministras, deputadus, deputadas, seluk-seluk tan. Maibe, iha realidadi, ita nia família sei moris rungu ranga. Ita kontinua kria desigualdadi iha sociedadi nia moris, etc…

Ne’e duni, kuandu imi dehan imi ema inosenti entaun hau sempre hateten ba hau nia-an rasik katak hau maka sala. Hau sala nain.

Fim