Istoria Kmanek Ida Konaba Saudozu Sebastiao Gomes no Sira Seluk

Written by Domingos da Silva and Emilia Ana

Saturday, 14 November 2009

Afonso Gomes, Aman CJITL flash, “Pai, ita oan mane mak tur deit, ita la halo buat ruma maka rai Timor ema seluk mak sei ukun nafatin no ita sai atan nafatin ne’e ladiak ida” ne’e mak lia fuan husi saudozu Sebastiao Gomes ba nia aman Afonso Gomes antes nia sai husi uma ne’ebe ikus mai Militar Indonezia tiru mate iha loron 28 Outubro 1991 iha Igreja Motael. Nune’e Afonco Gomes no Rita Rangel inan Aman husi Sebastiao Gomes hateten sente tristi tanba oan mane nebe mak nia hadomi liu mate. Afonso Gomes haktuir liafuan hirak ne’e ho tristi no tanis iha nia oan mane nia rate leten iha semiteriu Santa Cruz iha selebrasaun dala 18 masakre ne’e. Iha fatin hanesan Florindo Do Rego alin husi saudosa Natalino Do Rego dadalia ho CJITL online katak, Nia alin lakon iha 12 de Novembru 1991 maibe agora hetan fali nia ruin ona ne’ebe agora husu ba Governu bele tau Eroi sira nia ruin hamutuk fatin ida. “Lori 12 de Novembru hodi hatudu ba Mundu Internasional katak Timor mos luta ba Ukun rasik a’an” hateten Florindo. “Ita hotu hatene joven masakre 12 Novembru luta hasoru Militar Indonezia sira la'os hodi kilat maibe lori Brani hasoru Militar Indonezia hodi hakilar lia fuan katak “Mate ka Moris ukun Rasik a’an” tenik Florindo. Nune’e mos Sebastiana Soares Inan husi saudoso Antonio freitas soares ho tinan 17 mate iha 12 de Novembru iha semiteriu santa kruz maibe agora hetan ona nia Ruin. “Freitas hanesan oan ikun husi maun alin sanulu, Freitas mak hau hadomi liu entre nain sanulu ne’e tanba nia mak ikun” Sebastiana haktuir ho matan be’en nakonu. Sebastiana hateten maske agora hetan ona nia oan nia ruin maibe nia sei ejiji nafatin ba Governu Indonesia no Governu Timor Leste atu tur hamutuk hodi halo Monumentu ida ba Vitima sira ne’e . “Maske hetan ona hau nia oan nia ruin maibe hau sei tristi tanba nia maluk barak mak sedauk hetan nia ruin, hau husu ba Governu Indonezia no Governu Timor Leste atu halo Monumentu ida iha santa kruz ne’e tanba sira mate iha ne’e” hateten Sebastiana. (dsc-emy/cjitl)