Hau nia dalan

Hau nia dalan maka dalan nebe loro-loron hau lao hodi “hatutan” hau nia moris.
Dalan ida nebe, loron no kalan, hau nia isin husik hela nia ain fatin.
Dalan ida nebe, hau kria hela amizade ho hau nia vizinhos sira.
Dalan ida nebe, iha dadersan hau bele rona manu fuik nia lian.
Dalan ida nebe, dadersan hau lori hau nia oan sira ba eskola, no,
lokoraik hau ba foti sira hosi eskola.
Dalan ida nebe, bainhira hau lao, hau nia vizinhos sira husu hau nia tulun nomos hau husu hau nia vizinho sira nia tulun.
Dalan ida nebe, hau nia oan sira halimar ho laran haksolok.

Hau nia dalan, fo mai hau oportunidadi barak.
Hau nia dalan, fo mai hau Liberdade no Laran Haksolok.
Hau nia dalan, dalan nebe hau gosta tamba nia fo moris mai hau.
Loron no kalan.

Nia maka loke hau nia “néon no fuan” atu hau hakfodak hosi hau nia isin nebe maten.
Nia maka fanun hau hosi hau nia dukur.
Nia maka hanorin hau konaba sentidu lolos hosi moris.
Nia maka muda hau nia neon hosi aat ba diak, hosi barukten ba badinas, hosi dukur ba hader, hosi triste ba kontenti.
Nia maka fo sentidu mai hau katak dalan ne’e naruk laiha rohan.

Ita ema lao bele lao; loron no kalan, iha udan okos, loron manas, malirin, etc…
Ita ema bele para atu hanoin…
Maibe, dalan laiha rohan, laiha fim.
Hau nia dalan, laiha rohan, laiha fim.

Dadolin no imajem: Celso Oliveira