Poema nebe koalia hodi hau naran 4

ETU MUTIN

Etu mutin iha bikan mutin ida nia laran.
Fo han ita ema: mutin ka metan, diak ka a'at,
Labarik ka klosan, ferik ka katuas, feto ka mane,
Riku ka kiak, matenek ka beik.

Etu mutin halo ita ema sai bosu,
Bele hamnasa, bele dada iis.
Etu mutin, han iha tempu manas,
Tempu malirin, tempu udan tun, tempu rai tarutu.

Etu mutin halo ita ema bele hare ita nia-an rasik.
Loke ita nia liman laran hodi hateke ba linha (garis) nebe halai iha ita nia liman klaran.
Hosi ne'e, ita ema bele sura ita ema nia moris rasik: susar, haksolok, tanis, hamanasa.

Mos, etu mutin sei halo ita ema iha mehi, iha hanoin, iha futuro, iha moris.

Labarik kiik ida hakbesik-an ho kadernu mutin ida,
Hakerek iha suratan mutin ida nia laran. Hau rasik la hatene saida maka labarik oan ne'e hakerek.

Etu mutin hotu iha bikan mutin nia laran.
Ita ema bele dukur, labarik sira mos dukur ona.
Hamanasa hotu ona!
Halimar hotu ona!

Ita ema bosu ona!

Maibe, dalabarak, barak liu maka

Etu mutin do'ok hosi ema kiak sira.

Dadolin no imajem: Celso Oliveira