Pascoa Festa Hafoun-an!

Hosi: Pe. Venancio da Costa Pereira, SJ

Introducao:

Sai sarani katolika iha obrigasaun atu selebra loron importanti nebe Igreja katolika halo ona hanesan loron boot pascoa, no loron bot seluk tan nebe maka tinan-tinan ita ema cristao catolica comemora no celebra, iha moris ita ema sarani nian. Particularmente iha semana ida ne’e, nia laran ita hotu sei tama hamutuk ba semana santa no ikus liu hodi celebra festa pascoa, Festa Nai Jesus moris hias husi mate, hodi soy ita, no lori moris foun mai ita ida-idak,tamba ne’e maka ita hanaran Pascoa hanesan festa hafoun an. Maibe, moris iha mundo nebe kada vez iha  tendensia liu ba osan, ba servisu, ba perocupacao selu-seluk nian, e etc, halo ita sarani katolika laiha tempo hodi hanoin konaba loron boot no importanti nebe Igreja hili tiha ona. 

Ida ne hanesan dezafius boot ida iha ita sarani katolika ninia moris. Pergunta ida nebe maka ita tenki husu ba ita nia an rasik mak ne’e: Iha mundu modernu nia laran, ita sarani katolika tenki banati tuir nafatin Jesus Kristus ninia dutrina ka, ou husik tiha Jesus Kristus ninia dutrina? Ita precisa tebes halo reflesaun kona ba pergunta simples oan ida ne’e. Dala  barak maka ita hamoris ita nia moris sarani nian, iha deit level “superficialidade no formalidade nian deit”. Ita seidauk hatama an eh hamout an liu tan ba “espirito radical” sai ema sarani catolica. Dala barak ita sei moe atu hatudu eh manifesta ita nia an, hanesan ema sarani catolica. Dala barak mos ita sei tauk, atu declara ita nia an hanesan ema “praticante lolos nian ida”  iha moris hanesan ema sarani. Nune’e mos tamba razao economia, tamba razao perocupacao hodi buka osan ba moris, tamba razao ita ninia relasaun ho autoridade kreda nian sira la dun diak eh la diak, nomos tamba razao ita ninia limitacao hodi hare no simu realidade Kreda nian nebe maka mos nakonu ho “problemas oi-oin”, “ kanek oi-oin”, “todan oi-oin”, halo ita baruk atu hakbesik an fali ba Kreda.  Tamba ne’e duni, iha celebrasaun festa pascoa ne’e nian no tempo pascoa ne’e nia laran maiba ita hotu hotu halo no halao “confessaun pessoal ida no commum ida”, katak ita hotu ema sala nain, no ita hotu precisa tebes conversaun. Tanto conversaun pessoal, conversaun familiar, no conversaun comunal eh comunitario nian ida mai ita hotu. Atu nune’e ita hotu bele  hafoun an fali. Maromak hadomi tebes ita, nia bolu ita hotu atu hafoun an iha no liu husi festa pascoa ne’e. Pasco festa hafoun an, Maromak oan mane mesak Jesus Cristo moris hias husi mate, no ita ema hotu-hotu hetan tebes salvacao no moris foun. Keta moe, keta tauk no keta baruk, atu fiar iha Jesus ninia moris, hodi hafoun an tebes iha festa pascoa ne’e.  

Pacoa tenki sai tebes festa hafoun an nian, mai ita ida-idak nia an, ita ida-idak nia familia no ita nia sociedade, hanesan povo no hanesan nacao. 

Pontus de Reflesaun:
Diak tebes mai ita atu husu ba ita nia an rasik kona ba assunto moris hanesan ema sarani catolica iha mundo moderno ne’e. Sai sarani katolika, saida mak ita halo eh ita tenki halo, no saida maka ita halao eh ita tenki halao iha moris loro-loron? Iha familia ninia moris, buat saida mak concretamente ita contribui ba moris ita nia familia nian? Buat concreto saida los, maka ita contribui ba moris igreja nian, ba moris comunidade kikuan ida nian, iha nebe deit ita hola parte no ita moris ba,  ba moris sociedade, nacao no povo nian? Iha Foin sae sira ninia moris? Oinsa los, maka foin sae sira halao sira nia moris hanesan ema sarani catolica iha mundo moderno no globalizado ida ne’e, nebe maka nakonu ho disafius oi-oin, ao mesmo tempo nakonu ho tentasaun oi-oin, liu-liu tan tentasaun hamoris an iha “vida sexo livre eh free sex”, ponografia, prostitua no gostu carnal seluk-seluk tan? Tebes la facil mai ita hotu, atu infrenta tentasaun prazer eh gostu carnal-humano nian iha mundo moderno ida ne’e. Buat hirak ne’e hotu facilmente acontece iha moris foin sae sira nian no moris familia nian, tamba ita nia relasaun pessoal ho Jesus “la metin”, “ mamar hela “, laiha ninia fundacao ida nebe maka solida. Ita lalais liu husik ita nia an monu ba ita ninia tendencia isin nian. Nune’e mos, dala barak ita lakon tebes ita ninia consciencia humana. Tamba ne’e ita precisa tebes kadi fali eh hakruat fali ita nia consciencia, hodi hadia moris no hafoun an iha festa pascoa ne’e. Dala barak maka ita “ abusa ita nia an rasik” no ita ‘ take it for granted”, gracas no bensaun sira nebe maka Nai Maromak haraik no sempre haraik mai ita ida-idak no ita hamutuk. Pergunta nebe maka ita bele husu, atu halo hanesan exame de consciencia ida, mai ita nia an rasik, maka ne’e: Ita sei tuir tebes Misa loro-loron eh domingo-domingo no loron bot sira? no reza tersu loro-loron nebe mak hanesan identidadi ema sarani katolika ka iha moris real nian ou keta ita lakon ona “espirito radicalismo e espirito de fidelidade ba Jesus” nebe maka iha hatene, nebe maka ita fiar hanesan tebes Maromak nian oan?, ita sarani katolika tenki hatudu exemplo diak no los iha moris loro-loron nian? Por exemplo ita buka nafatin continua halo exame de consciencia mai ita nia an rasik kona ba pontu sira hanesan tuir mai ne’e: katak ita labele naok, eh la bele halo korupsaun, labele halo at ema seluk, labele oho ema ho maneira sai-saida deit, labele viola ema seluk, eh labele viola ita nia ema rasik, labele bok ema nia kaben (tamba casamento ne’e sagrado), labele hanoin at ba ema seluk,la bele destroy ema seluk nia fama liu husi halo buatus eh rumores oi-oin. etc. Ita hotu precisa tebes atu iha “fuan misericordia”, atu hatene nafatin perdua malu no hadomi malu lolos, hanesan Nai Jesus rasik hadomi ita, to’o fo nia an ba mate iha Cruz tan ita hotu, no moris hias fali hodi lori moris foun ne’e mai ita hotu. Nune’e, Ita mos  bele husu ba ita nia an; Tamba sa maka dificil tebes mai ita atu moris ho conprimisso eh committment fiar nian ba ita nia an rasik, ba ema seluk no ba Maromak, atu ita nia klamar bele hetan salvacao? Ita lakon tiha ona karik ita nia consciencia hanesan ema? Ou ita lakon tiha ona karik ita nia fiar ba Maromak? Keta haluha, katak Maromak hadomi ita, Maromak perdua ita, no Maromak soy ita, se wainhira ita fila fali ba nia, se wainhira ita hakarak tebes hafoun moris ne’e. Se wainhira ita hakarak converte tebes. Ita haluha atu “halo didiak exame de consciencia ida, nune’e mos keta haluha atu halo didiak confessaun diak ida, atu hetan perdaun Maromak nian, atu iha fali relasaun foun ida no relasaun diak ida e metin liu tan ho Maromak liu husi Nai Jesus. 
Pascoa, celebracao no festa hafoun an nian ida, nebe maka desafia tebes ita hotu atu “ bele duni hafoun an”. Ita precisa tebes  graca hafoun an nian ne’e. De facto “historia biblica, antigo testamento nian tun too novo testamento nian”, haktuir mai ita hotu katak, festa pascoa ne’e, festa Nai Maromak mai visita ita ema, nai Maromak, mai bolu ita ema, nai Maromak mai lao tama ita ida-idak nia uma, ita ida-idak nia fuan, husu ita atu fila fali ba Nia, Nia ida nebe maka hanesan Maromak revelado, moris hanesan ema no mate iha cruz e moris hias fali iha festa pascoa, iha natura no presenca nai maksoyn nian Jesus Cristo.

Keta Tauk Hafoun-an:

Dala barak maka ita ema hare moris ho sentimento tauk. Ita tauk atu hafoun an. Tamba hafoun an ne’e, lori ita atu halo mudanca ruma. Mudancan dala barak precisa “sacrificio pessoal” ne’e lori kanek, lori moras. Wainhira ita hakarak mudanca, ne’e katak ita prontu simu kanek no senti moras. Laiha mudanca ida nebe maka la lori kanek no la fo moras. Nune’e duni, maka dala barak ita ema lakohi mudanca, lakohi hafoun an. Ita hakarak moris iha “status quo deit”, eh moris nune’e-nune’e hela deit. Pascoa harahun tiha moris ida “status quo ne’e”, pascoa lori moris foun, Pascoa celebracao no festa hafoun an nian. Iha realidade moris loro-loron nian, ita bele dehan katak ohin loron mundu quase laiha ona toleransia ba ema ninia klarmar. No ita ema sarani katolika mos laiha ona tempo hodi hadia an, hakiak, hamaus no alimenta ita ninia klarmar rasik no ema seluk klamar ho buat nebe diak. Dala barak no dala wain, facil liu mai ita ema atu dada malu ba buat a’at no harahun malu ho bua nakukun nian, doque ho buat naroman nian. Dala barak ita ho ita maka haterus malu no hamate malu, tamba ita la tau Maromak hanesan Centro moris ita ema nian. Wainhira ita hases an husi Maromak, eh wainhira ita hasai Maromak husi centro moris ita ema nian, buat hotu sei naksobuk, inclui ita nia an rasik. Tamba ne’e festa pascoa, bolu fali ita nia atensaun, no fanu fali ita husi ita nia toba, atu ita hotu bele hafoun an fali, atu tau Maromak hanesan Centro ita nia moris nian, no ho haraik an, buka atu hadomi malu fali, fo perdaun ba malu fali, simu malu fali, tamba ita hotu mesak Maromak nia oan deit, no hotu iha direitu no liberdade atu  ba  hotu lalehan, se ita sei fiar  katak lalehan iha duni. Se, lalehan iha duni, no tuir ita nia fiar katak lalehan no moris rohan laek ne’e iha, entaun hafoun an, maka dalan ida be diak liu no urgente tebes mai ita hotu halo. Atu nune’e festa pascoa sai tebes festa e celebracao de mudanca ida mai ita hotu, festa hafoun an nian ida duni!

Obrigado!

Pe. Venancio da Costa Pereira, S.J.

Ateneo de Manila University – Philippines

EAPI. April 9 Quarta Feira, 2014