Nelson Mandela nudar ema nebe lori mos inspirasaun ba klosan no fetoran Timoroan barak duranti luta ba ukun rasik-an. Klosan no fetoran Timoroan barak maka uza modelu hosi hanoin Nelson Mandela nian hodi halo luta pacifica hasoru Indonesia. Inklui hau rasik uza Nelson Mandela nia hanoin duranti hau nia dedikasaun ba luta ukun rasik-an.
Hau iha serteza katak klosan no fetoran Timoroan nebe uluk dedika sira nia-an ba luta Ukun Rasik-An, bainhira atu prepara petisaun, deklarasaun politika ou aksaun politika hodi haruka ba autoridadi Indonesia, sira presija referensia i dala barak mak sira uza Nelson Mandela nia pensamentos hodi hakerek no halo aksaun pasifika hasoru autoridadi Indonesia iha Timor Leste.
Nelson Mandela hanesan figura politika ida nebe metin tebes ho processu luta ba ukun rasik-an Timor nian. Iha 1993, bainhira Lider Timor Kayrala Xanana Gusmao hetan sentensa hosi governu Indonesia hodi tama prizaun, iha tinan ne'e duni (1993) Nelson Mandela ho De Klerk simu premiu Nobel da Paz. Tinan Ida tiha iha 1994, lider resistensia Timor Xanana Gusmao hosi kadeia Cipinang hakerek karta Ida ba Nelson Mandela. Iha 1997, Nelson Mandela husu ba governo Indoensia atu liberta lider kharismatik Timor Xanana Gusmao hosi kadeia hodi bele partisipa iha processu politika ba resolve problema Timor. Iha 1998, Nelson Mandela vizita Kayrala Xanana Gusmao iha Salemba.
Nia (Nelson Mandela) hanesan inspirador no defensor ba liberdadi, demokrasia, paz no rekonsiliasaun laos deit ba Afrika do Sul, laos deit ba rejiaun Afrika maibe ba mundo tomak. Ema barak iha mundo ne'e fo'o respeitu bo'ot ba Nelson Mandela tamba nia sai hanesan ema kulit metan nebe matenek, korazoju, simples, humilde i konsege lori nia pensamentos hodi muda Mundo nia lalaok.
Aman no lutador Afrika do Sul nian nebe dedika nia-an ba luta kontra diskriminasaun mate ho tinan 95, iha loron 5/12/13 liu ba.
Ita hotu nia orasaun akompanya Nelson Mandela. R.I.P
Celso
No comments:
Post a Comment