Kadeira no meza husik hela iha liur,
La iha ema ida mak ba hamaluk.
Anin hu iha kalan nia nakukun to'o dadersan nia malirin,
Lori nanok (silensiu) ba iha kadeira no meza.
Iha dadersan malirin no anin nia i'is maka'as iha fulan Outubro, tinan 2013, loron 10.
Hau hateke ho lian laek ba liur,
Hodi rona anin nia lian nebe furak.
Se iha loron ida, hau iha tempo karik,
Hau sei ba tu'ur iha kadeira no meza neba.
Hodi bolu tan ema seluk hamutuk ho hau.
Maibe, ohin loron ne'e hau laiha liu tempo hodi hamaluk hau nia kadeira no meza.
Iha hau nia laran, hau dehan nune:
"Sorti bo'ot!!!
Tamba iha netik anin nia lian no nia i'is hodi hamaluk kadeira no mesa ida ne'e".
Sinu kiik nebe hau tara besik kadeira no meza,
Lori netik barulho ki'ik mai hau tilun,
Hodi fanun hau hosi hau nia hahalok nebe arogansia no vaidadi.
Dala barak mak hau hakfodak hosi kalan tamba deit rona sinu kiik ne nia lian.
Maibe, se karik laiha anin nia i'is hodi halo barulho sinu kiik ne'e,
Hau hanoin hau mos lalika moris ona.
Obrigado Na'i!
Obrigado ba imi hotu nebe le'e dadolin ne'e.
Foto no Dadolin hosi:
Celso Oliveira
No comments:
Post a Comment