Funu nebe akontese daudaun entre Israel ho Palestina laos foun. Maibe, ho avansa teknolojia ita hotu hare'e brutalidadi no genocidiu entre rai rua nebe moris vizinho. Dalaruma ita hanoin tamba razaun politika mak funu ne'e mosu, ou, tamba razaun militar no relijiaun. Maibe, konserteza ohin loron parti rua (Israel no Palestina) hotu2 buka solusaun ba konflitus nebe naruk tebes.
Dalabarak mak ita halimar ho games iha ps maibe ohin loron funu nebe mosu hanesan lolos games nebe ema fan iha loja. Basta se mak iha osan bele hola games iha loja, lori ba uma hodi halimar, hodi destrai tiha stress tamba servisu barak. Funu nebe mosu laos mosu derepenti deit maibe mosu hanesan games tamba iha ema mak halo, planeia, programadu i ordenadu.
Emfim, funu sempre lori konsekuensia a'at ba labarik, ba familia, ba humanidadi, estraga planeta i destroi ema nia moral. Alias, mundu ohin loron gosta liu koalia konaba funu do que paz.
Kada vez ema matenek, ema do'ok liu tan hosi paz. Kada vez ema matenek, ema gosta hatudu sira ninia forsa, forsa nebe so atu estraga, destroi humanidadi. Tamba ema lakon tiha ona fiar, tamba mundu rasik kria ema atu moris individu, atu estraga malun, atu oho malun, atu destroi malun, etc...
Se mak bele hapara funu? IHA no BELE.
Maibe, ema prefere halo funu do que hapara funu. Tamba se funu para ne'e signifika negosiu mos la lao ona. Fabrika kilat barak maibe la uza, fabrika bomba oi-oin maibe la uza signifika negosiu monu. Tamba ne'e mak ema tenki halo funu oi-oin hodi bele halo negosiu buras ba bei-beik.
Hau akompanya funu entre Israel ho Palestina kuandu hau sei kiik. Iha tempo uluk, ho tv 'hitam putih' hau hare'e notisia konaba funu entre Israel ho Palestina. Ohin loron hau 40 anos ona, funu ne'e seidauk hotu deit. Ohin loron ho tv 'plasma lcd' hau hare'e brutalidadi no genosidiu kontinua.
Buat barak muda, buat barak transforma. Ita hotu tenki iha konsiensia katak ema laos hanesan games atu ita hodi halimar hanesan iha ps. Maibe ema iha ninia dignidadi, iha ninia moral. Povo Israel no Palestina presija moris iha PAZ. END.
