My photo
Um escritor, um poeta, um aventureiro,

Monday, 6 January 2014

Aihan Timor, Zero Kimia, 100% Organiku

Hosi: Antero Benedito da Silva
Direitor, Peace Studies, UNTL
Aihan natoon, kualidade mak aas, saúde mos diak, mak ideal ba família hotu. Maske nunee, kultura globalizasaun no politika Ministeriu Agrikultura  e Florestais (MAF) Timor nian fo atensaun liu ba kuantidade aihan ho orientasaun exporta nian nunee naturalmente minimiza kestaun kualidade aihan. Ajensia Não Governamentais sira no Uniaun Agrikultura Ermera nian (UNAER) halo tentativas promove modelu alternativu inkluindu promove fini lokal maibe sira nian kbiit oituan liu atu produz resultado.
Ministeriu Agrikultura servisu ho ACIAR (Agensia Peskiza Australiana) no ajensia internasionais sira seluk hodi promove politika neebe, karik, ita bele bolu revolusaun matak (Green Revolution), neebe lao nanis ona iha Europa maibe foin konesidu liu iha Asia hahu tinan 1950 resin. Politika kuda hare iha zona rai tetuk, zona tasi nian, hafoin Funu Mundial Daruak, hodi hasae produsaun hare mak história dahuluk Revolusaun Matak iha Timor Lorosae.  Revolusaun Matak, tuir lolos, monu ona tanba agirukultor kiik oan sira sai dependenti ba Fini híbrida no ohin loron hanaran GMOs Crops (Aihan Genetically Modified Organism) neebe kompania sira iha Europa no Norte Amerika mak produz liu husi prosesu kimia.  Dalabarak, fini aihan sira nee kompania sira identifica husi nasaun Sul sira, hafoin sira halo kaben liu husi prosesu kimia hodi hamosu variedade foun, hafoin faan fali ba rai seluk.  Ema seluk labele produz variedade hanesan tanba direitu intelektual sira nian nee, protezida iha World Trade Organization (WTO) neebe mos kompania no nasaun riku mak kontrola. Nuudar ezemplu, fontes MAF  nian balun haktuir katak tinan hirak kotuk ba Austaliano ida naran Brian, halo tentativa patenizasaun (atu sai nain) ba batar neebe nia hetan iha Aileu neebe povu nian  no sira kuda desde bei ala nian tempu, hodi hanaran fali Brian Corn (Batar Brian).
Kompania multinacional neebe boot liu mak Monsanto iha EUA, neebe mak suplai fini ba mundu tomak. Bainhira prosesu halakon fini lokal liu husi patenizasaun no redistribuisaun fini híbrida ou GMOs Crops final ona, toos nain sira sei moris dependenti ba fini sira nee ba nafatin. MAF tinan ba tinan sosa fini, trator, no adubu husi liur, ho hamosu kampane Povo Kuda, Governu sosa! Foin lalais media fo sai katak fini fehuk ropa balun sai dodok deit, no tinan 2014 MAF husu osan $2millaun hodi sosa fini no importa foos, maske suplai aihan sei natoon hela, Se  nesidade foos mais ou menos 100,000 toneladas, entaun dadus, agrikultor sira sei produz foos 40,000 tonelas, batar 100,000 resin toneladas,  aifarina 80000 tonelas, no aihan sira seluk neebe bele taka necessidade foos nian. Problema mak oinsa mak transforma hanoin ida katak hamlaha nee identiku ho la han foos.
Parte negativu seluk iha revolusaun matak, mak laos deit agrikultores sira dependenti iha área makinas sira hanesan trator ou seluk seluk tan, maibe mos dependenti iha uzu adubu kimia no uzu pesticida hodi oho moras sira neebe sei naturalmente hamosu husi uzu adubu kimia no GMOs, nuudar pakote ida. Ohin loron, aihan sira neebe ita sosa husi  merkadu lokal hanesan modo mutin no fehuk midar sira, barak mak produz ho adubu kimia (iha beneno ona), no dependenti ba fini hybrida/GMOs. Ita seidauk hare inisiativu MAF hodi dezenvolve adubu orgnika, maske ida nee possível. Timor oan balun, ho sira nian esforsu rasik, produz ona adubu organika iha área Tibar nian, ho kompania naran HAMOS HABOKUR HAMATAK RAI, Unipessoal, Lda, no sira faan plastik ida 2dollar, no hatudu esperiensia suksesu kualitativu nee sei presiza apoiu atu haboot sira nian produsaun.
Revolusaun matak mos hamosu mekanismu basar hodi promove sira nian aihan kimia sira. Kultura fast food (Burger King, Kentucky Fried Chicken no McDonald) ho sira nian produto sira hanesan Cococola, Fried Chien, Pepsi (konesidu iha Filipina), sai influensial tebes iha mundu. Sira halo kampane merkadu neebe agressivu tebes. Loron hirak liu ba nai ulun RDTL nian balun mak halo avertura ba Burger King iha Timor Plaza. Alem de uza figura publiku, jogador internacional sira iha sira nian iklan, fast food ninian influensia seluk mak masmidar no bokur neebe laos deit produz unhealthy food, maibe mos hamosu ema nian kaanou hakarak neebe demais liu atu sosa bebeik, no aumenta sira nian isin bokur neebe sei reduz tinan moris.
Tinan hirak liu ba, RTP fo sai katak Portuguese no Europeu sira neebe idade 40 ba leten, 40 pursentu mak hetan moras kankru, neebe konsideradu epidemika (afeta ema barak liu ona) hanesan mos HIV/AIDs iha kontinenti Afrika.  Iha Amerika, Fuma Sigaru no konsumu aihan kimia no fast food sira, mak sai kausa maior ba ema mate. Moras sira neebe asosiadu ho aihan kimia sira nee mak bokur hodi produz tensaun aas no diabetes (kanek bem daet ba isin tomak). Sidadaun Amerikanu sira lori kazu ba tribunal hasoru kompania no restaurante sira neebe produz aihan sira nee, hodi kria polemika iha sosiedade. Karik, autoridade saúde sira presiza hatene kontiudu aihan mak timor oan sira konsumi husi supermekadu sira.
Nunee mos, bainhira ema moras ba hospital, kompania Farmasia privadu sira mos mak neebe liga ho Monsanto no TNCs (Transnational Corporations) sira seluk mos mak produz aimoruk, neebe ninian kontiudu ita laiha kontrola mos. Nunee, ita hatene ona katak kompania sira laos deit kontrala sistema produsaun no fini, maibe sira mos mak kontrola sistema merkadu (distribuisaun) liu husi loke supermerkadu sira etc, no sira mos mak hatene mos saída kausa husi aihan sira nee, no medisina oinsa mak bele kura moras sira nee. Timor sei iha vantagem, maioria produto sei organika. Aihan Timor neebe Zero Kimia, katak 100% Organiku, nesesita sai visaun ida ba Revolusaun Metan (black revolution), ou revolusaun matak versaun timor nian, iha sektor agrikultura no aihan nian. Timor bele kalae, produz aihan baarak maibe organika, atu aseguru futuru jerasaun timor neebe saudável.
Tatoli Tinan Foun 2014 mak Justa no solidariu ba Leitores sira hotu!

No comments:

Post a Comment