My photo
Um escritor, um poeta, um aventureiro,

Friday, 23 December 2011

Estado Decide Tiha Ona Taka Grupo Arte Marciais Durante Tinan Ida

Sesta-Feira, 23 husi Dezembru 2011

Enkontro Konselhu Ministru ne'ebe lidera husi Primeiru Ministru, Kinta horseik (22/12) deside tiha ona hodi taka aktividade arte marciais ne'ebe fulan ida ikus ne'e hamosu konflitus hodi hamate no hakanek ema barak.

Xanana Gusmao iha enkontro ho lian makas hateten katak grupo arte marsiais tenki taka kedan hahu agora inklui mos aktividade jogu bola guling n'ebe sempre mos kria barulho.

Tuir desizaun ne'e, grupo arte marsiais sei taka provizoriamente durante tinan ida no jovem sira ne'ebe halo aktividade ne'e sei hetan kapturasaun tuir ordem polisia nian.

Antes ne'e Prezidente Republika, Jose Ramos Horta rasik loron rua liu ba iha Palacio Prezidente husu mos ba Parlamentu Nasional atu halo lei ida hodi la fo licensa ba grupo sira ne'e halo aktividade ne'ebe remata deit ho konflitus ema mate no kanek.

Komandante F-FDTL, Lere Anan Timor mos fo tiha ona nia steitmentu hanesan hodi husu ba etado atu taka aktividade arte marsial.

Iha desizaun estado, Governu nomeia Pedro Belo, Komandante Polisia Distritu Dili atu lidera operasaun hodi kaptura kriminozu sira ne'ebe kria konflitus.

Antes ne'e iha Kinta feira loraik (22/12), Rezidensia Pedro Belo iha Bebonuk, Dili hetan atakes husi grupo Arte marsial balun ne'ebe konsege hakanek ema nain rua iha rezidensia ne'e.

Vitima nain rua ne'e identifika hanesan subrino husi Belo nian. (Amandio Magno/CJITL)

No comments:

Post a Comment