My photo
Um escritor, um poeta, um aventureiro,

Saturday, 30 July 2011

Parlamentu Nasional Bele Sai “Ponte” Bá Neo-Kolonializmu Kulturál

Hakerek Na’ain:
Henrique de Corte-Real Araújo*

Tuir Konstituisaun RDTL art. 95º., kompete ba PN atu halo lei, nomós PN bele autoriza Governu halo lei, tuir art. 96º.

Hó autorizasaun PN nian Governu, liu husi DL No.19/2009, aprova tiha Kódigu Penál Timor-Leste nian.

Iha Kódigu Penál ne’e, iha art.154º. nebe’e koalia konabá “maus tratos a cônjuge” (ezemplu: fe’en hó la’en baku malu – Violénsia Doméstika), ne’e krime públiku katak, wainhira fe’en hó la’en baku malu, polísia bele bá kaer kedas sira no halo prosesu lori bá tribunál.

Iha lisan Timor nian VD ne’e krime semí-públiku (laós krime-públiku). Krime semí-públiku katak, wainhira fe’en ho la’en baku malu, buka rezolve úluk iha família láran. Labele-ona, foin lori bá autoridade judisial atu rezolve.

Lisan Timor nian ne’e hala’o kédas husi beiala sira to’o ohin lóron.

Tinan átus bá átus, Portugés sira respeita hela lisan ida ne’e. Igreija Katólika iha Timor mós lá-táka dálan.

Hó mudansa iha Kódigu Penál, nebe’e VD hanesan krime semí-públiku sai fali krime públiku, ne’e viola lisan Timor-nian iha oin rua.

Iha Direitu Kostumeiru Timor-nian iha prinsípiu jurídiku rua nebe’e Timor-oan sira ka’er métin héla hanesa lei-inan hodi rezolve problema VD:

1. Bikan hó kanúru tarútu iha uma láran, keta hatáma Ó nia kanúru tóhar iha le’et.

2. Héna fo’er fási iha uma-láran.

Timor-oan sira nia lisan (Direitu Kostumeiru) ne’e lá-hakérek (tidak tertulis). Maibé sira ka’er iha prinsípiu sira ne’e hodi halao justisa. Ne’e mak bele bolu prinsípius jurídikus ou prinsípius jerais.

Tuir teoria Direitu nian (ilmu hukum), prinsípius jerais ne’e fonte de direitu katak, husi/ka’er iha prinsípius sira ne’e Ema bele halo lei. Laós wainhira halo lei ida, viola fali prinsípius sira ne’e rasik, hanesan akontese daudaun iha Kódigu Penál Timor-Leste nian, art.154º. konabá “maus tratos a cônjuge”

Hó ezemplu ida ne’e, wainhira Ita lá-atentu (matan dúkur), PN bele sai fali ponte ida hodi harí fáli neo-kolonializmu kulturál iha Timor-Leste.

PN haláo daudauk konsulta iha fátin balu (laós iha fátin hotu-hotu) konabá Projetu Kódigu Sivíl Timor-Leste nian. Kódigu Sivíl (KS) ne’e hanesan lei-ínan nebe’e sei regula povu nia vida, hahú ema ida móris to’o mate. KS ne’e regula konabá:

· Kontratu / negósiu (Direito das Obrigações);

· Ema nia sasán: ra’i, úma, karéta, nsst. (Direito das Coisas);

· Harí uma-ka’in no máluk : família, parente, oan-hakiak, banin, rian (Direito da Família);

· Relasaun ema máte hó ema móris: se’e mak iha direitu atu héla hó rikusoin (Direito das Sucessões).

Husi KS ida ne’e mak PN bele defende lisan Timor nian, bele-mós hamáte Timor nia lisan, hodi fo’o fatin bá lisan rai séluk nian (neo-kolonializmu kulturál).

Tamba Projetu KS nebe’e PN halao konsulta daudaun ne’e mai husi KS Portugál nian, wainhira Timor-oan sira dúkur hela, KS Timor nian sei hamáte/halákon lisan balu (barak karik?) Timor nian rasik.

Hanesan ezemplu (contoh):

1) Definisaun konabá Kazamentu, iha art.1467º. Projetu KSTL:

“Casamento é o contrato celebrado entre duas pessoas de sexo diferente que pretendem constituir família mediante uma plena comunhão de vida.”

Iha definisaun ida ne’e lá-dehan katak káben para atu hetan oan. Tamba hanesa ne’e mak husi definisaun ida ne’e, iha Portugal, lei hatán-ona kazamentu omosexual kátak, mane hó mane, feto hó feto bele káben.

Iha Timor mós “casamento” laós kontratu. Iha Timor, contrato (kontratu) ne’e katak fán-sosa sasán iha loja, merkadu, no iha nebe’e deit. Iha Timor “casamento” bele dehan “acordo” katak, hatán-malu atu harí uma-kain, laós kontratu.

Tamba ne’e, hakerek nain halo definisaun oin seluk para, sé-bele kárik, hatama iha KSTL nian:

“Casamento é um acordo celebrado entre duas pessoas de sexo diferente que pretendem constituir família mediante plena comunhão de vida e procriação, afim de dar continuidade às suas gerações e à sobrevivência de Uma-Fúkun.” Katak, Kazamentu ne’e, feto ida ho mane ida hatán-malu atu harí uma-kain (família) hodi buka móris hamutuk ho diak iha sira nia vida tómak no hétan oan, atu jerasaun ninian lá-móhu no Uma-Fúkun lá-lákon.

2) Colacção – art. 1971º. PCCTL

“Os descendentes que pretendem entrar na sucessão do ascendente devem restituir à massa da herança, para igualação da partilha, os bens ou valores que lhes foram doados por este.” Katak, wainhira inan (aman) mate, oan sira nebe’e hakarak fahe rikusoin, sei halibur fila fali sasán nebe’e inan (aman) fó hela bá sira, hodi fahe fila fali hanesan (bagi rata) ba oan hotu-hotu.

Ida ne’e lao tuir lisan mala’e nian. Timor nia lisan oin-seluk.

Iha família Mamba’e nia lisan mak hakerek-nain hatene hanesan ne’e:

- Sasan nebe’e inan-aman, wainhira sei móris, fó ona bá oan-ruma (feto ka mane), ne’e hela ona bá sira. Rikusoin nebe’e inan-aman lá-fahe, hela bá oan-mane sira mak administra (toma konta). Oan-mane bele fó mós bá feton sira.

- Oan-feto sira wainhira káben, bá-ona hamótuk hó sira nia káben, hodi harí uma-kain foun iha máhon Uma-Fúkun la’en nian, lá iha fátin atu administra fáli rikusoin inan-aman nian. Tamba ne’e, oan-mane sira mak hela hó rikusoin sira ne’e, atu bele administra hodi hamétin nafátin lisan iha sira nia Uma-Fúkun láran.

- Oan-mane sira mak iha responsabilidade tómak atu hakoi inan-aman nó beiala sira iha jerasaun Uma-Fúkun nian, hakoi tuir lisan Timor nian. Oan feto sira sei bá ajuda deit.

- Oan-mane sira mak iha obrigasaun atu harí Uma-Lisan/Uma-Lulik. Laós oan-feto sira.

- Hó razaun sira ne’e mak rikusoin inan-aman nian húsik hela bá oan-mane sira mak administra.

- Mala’e sira nia lisan oin-séluk fáli. Rikusoin inan-aman nian sira fáhe hotu kedas. Tamba sira lá-íha Uma-Fúkun. Sira lá hakói-mate no laiha Uma-Lúlik.

Iha Konstituisaun RDTL art.2º. No.4, prevé tihaona atu iha lei ida hodi regula konabá Direitu Kostumeiru Timor-nian. Ita hatene katak Governu no PN iha serbisu bárak atu hálo maibé, liu-tiha tinan 10 ona, tamba-sá mak to’o agora lei ne’e seidauk iha? Keta halo-bá, polítikus nó ukun na’in bálu hanoin atu halákon kultura Timor nian hodi fó fátin fáli bá kultura rai-liur-nian.

Iha doutrina Direito nian (ilmu hukum), dehan: wainhira laiha lei, laiha krime. Tamba laiha lei ida atu proteje kultura Timor nian, matenek-nain sira bele aproveita atu halakon Povu nia kultura hodi fó fatin bá kultura ema seluk nian. Ne’e mak dehan Neo-kolonializmu kulturál.

KS Timor-nian atu regula vida Timor-oan sira nian, tamba-sá mak lá-kualia kona-bá lisan Timor-oan sira nian, hanesa:

· Barlake, Fetosán-Umáne, Hakoi-máte, Tára-bándu, nsst.

· Barlake hala’o iha Timor laran tómak, dalaruma simples deit (sederhana) maibé halao duni iha nebe’e-nebe’e deit.

· Fetosán-Umáne hala’o iha Timor laran tómak, família husi fetosán no umáne sira respeita malu maka’as.

Prova (bukti) ida mak iha krize 2006/2007 nebe’e hanaran “krize lorosa’e-loromonu”, ema família fetosán-umáne husi lorosa’e no loromonu haré-malu diak nafatin.

Lisan sira ne’e iha nia aspetu positivu barak, nomós iha aspetu negativu, vantajen no desvantajen. Tamba-sá mak KS ne’e lá-haré kédas oinsá mak buka halákon kédas ida nebe’e lá-diak, no habúras ida nebe’e diak? Tamba kultura ne’e Ita nian nánis. Ne’e mak lao tuir konseitu “Ukun-Rasik-A’an”.

Ne’e duni, distintus Deputadus sira nebe’e halo rezisténsia no túba-rai-métin iha tinan 24 nia laran ne’e, keta “dukur” demais. Iha Projetu KS ne’e, iha artigus balun nebe’e béle hamáte Ita nia lísan. Núdar Timor-oan nebe’e representa povo iha PN, iha obrigasaun morál atu defende nafatin lísan Timor-nian, bainhira lisan ne’e sei kontribui nafátin bá unidade familiar, paz no estabilidade iha rai laran. Wainhira PN sai fali ponte hodi harí Neo-Kolonializmu Kulturál, ne’e viola fali prinsípiu “Ukun-Rásik-A’an” Timor-Leste nian.

Obrigado.

Díli, 20 de Junho de 2011

* Hela iha Motael-Díli

2 comments:

  1. Hanoin husi hakerek nain iha leten so refleta deit karater opressivu husi sistema paternalistiku sosiedade Timor nian. Sistema ida nebe la fo valor ba feto, no konsidera feto hanesan deit kriatura ida nebe inferior liu fali mane. Sistema hanesan nee la halai dok husi fundamentalismu kultural nebe opressivu ka haterus ita ema moris. Konsekuentemente viola direito de igualdade no direitos humanos rasik. Tamba nee mak ita admira wainhira ohin loron ita nia inan feton sira mos hamrik forma organizasaun oin atu luta kontra sistema paternalistiku ida hanesan nee.

    Atu mos nota kikoan ida ba hakerek nain iha leten konaba nia analize sobre violensia domestika, hakerek nain iha nee la iha tendensia la defende interesse vitima nian maibe defende fali mak orgulho no mane cobarde sira nebe baku sira nia feto kaben. Ita ohin loron moris iha nasaun no estado independente ida, ita moris iha realidade mundo nebe ho kontexto nebe diferente mos. Katak iha regras no normas foun nebe harii atu salvaguarda valor ema moris nian liu-liu ema oprimido ka vitima sira nebe hetan maltrato husi aktu krime husi kontextu saida deit. Tamba ita harii estado maka hanesan mos desejo comum ida sidadaun hotu nian atu moris iha regras nebe estado halo. Estado hanesan instituisaun supremo as liu instituisaun hotu iha direito atu kria normas hodi regula sidadaun hotu atu nunee bele iha harmonia iha nasaun laran. Tamba nee maka iha kontextu nebe sistema tradisional no kultura konservativu nebe hahii sistema paternalismu opressivu sei kontinua entaun Estado maka tenki hamrik atu tau buat hotu iha nia balansa ho regras normativas nebe liu husi kriasaun leis atu defende vitimas no halakon opresaun husi gender ida hasoru gender seluk.

    Dala barak hau mos admira katak mane timor barak maka sai ona mai liur maibe ulun fatun sei to'o liu fali besi atu simu realidade katak mane ho feto nee tenki hamrik hanesan no tur hanesan. Tenki iha emansipasaun atu nunee nasaun nee bele hetan hotu-hotu nia kontribusaun ba nia dezenvolvimentu.

    ............. PARTE I

    ReplyDelete
  2. ..... PARTE II

    Kultura mos la diferente ho leis de direitos nian katak wainhira la kondiz ona ba realidade iha aktualidade maka nesesita dunik atu muda. Labele kultura tradisional hanesan normas hirak nebe estatiku no la loke an ba evolusaun mundo nian. Dala barak mane sira nebe koalia dehan defende kultura lulik ladun hatene didiak esensia lolos husi kultura nee rasik iha nia fundasaun nebe ita nia beiala sira halo. Se ita hare didiak fali no peskiza klean liu tan to'o nia abut ba ita nia kultura tradisional no lulik nebe lolos, ita rasik sei hakfodak katak iha esensia kultura lulik Timor nian fo liu valor ba feto hanesan centro iha sosiedade ema rai Timor nian.

    Buat sira nee hotu ho tempo maka ema manipula tuir interesse paternalistiku nian hodi halakon dominansia feto nian. No kontribui ba violensia gratuitu hasoru feto maluk sira. Tamba nee maka hau dehan dala barak iha ita nia rain mane barak nebe laos aswain ona hanesan ita nia beiala sira iha tempo uluk nebe ho nia analfabeto maibe matenek hamosu kultura nebe fo valor hanesan ba feto ho mane. Mane Timor ohin loron barak maka hanesan cobarde, pengecut, solur nebe liman kmaan hodi baku nia ferikoan maibe la barani atu responsabiliza ba nia aktus sira iha leis Estado supremo nian. Hafoin mai koali rebo rebo no funan funan ho linguazem politika dehan katak neo kolonialismu. Koitado.

    Matenek nain ida dehan hanesan nee: 'Liberta o nia hanoin husi mentalidade eskravu nian, laos, se laos ema seluk maibe o nia an rasik maka tenki liberta o nia an husi mentalidade eskravatura nee'. Katak tenki ba mane cobarde sira nebe lakon ona espirito aswain ka kavaleiro nian hodi gosta baku ema feto, ami dehan ba imi liberta an husi eskravatura sistema opressivu kutura tuan nebe manipula o nia hanoin no mentalidade escravu kultural nebe gosta atu sama feto sira. Sai kavaleiro nebe hadomi o nia feton, inan no feto kaben. Se karik o beik hodi baku no halo violensia ba sira maka tenki sai dunik hanesan aswain hodi ba hasoru tribunal justisa nian. So iha neba maka bele tesi lia katak o los ka sala. Hader hodi hare ba loromatan dader nian nebe sae ona, katak o mane Timor ida nebe moris iha sekulo 21, tinan 2011. Laos moris iha tempo hakfolik ka iha fatukuak nian!

    Kultura mosu iha tempo uluk atu orienta ema moris no laos estatiku maibe mos evolui hodi halakon norma no valor at sira no preserva no hadia sira nebe diak atu sai diak liu tan. Tamba maka sistema paternalistiku opressivu no laos kavaleiru tenki halakon iha nasaun no estado foun Timor Leste. Hanesan mos iha parte hotu moris nian tenki fo valor no igualidade ba feto no mos mane.

    Obrigada

    Buiserik

    ReplyDelete