My photo
Um escritor, um poeta, um aventureiro,

Tuesday, 29 June 2010

Relatoriu Assesoria Sosiedade Sivil-GPM ba Orsamentu Rectifikativu Sabraut De’it.

Dili-Primeiru Ministru (PM), Kay Rala Xanana Gusmão lamenta tebes relatoriu kona ba proposta orsamentu rectifikativu husi Assesoria Sosiedade Sivil Gabineti Primeiru Ministru (ASS-GPM) nian sabraut de’it.

Iha relatoriu ne’e PM Xanana haktuir, hakerek halo ema konfuzaun no hakerek semo husi lian ida ba lian seluk.

Nune’e PM Xanana husu ba ASS-GPM, Joaquim Guterres atu hadia hikas relatoriu ne’ebe iha.

“Hau hare’e lia fuan sira ne’e sabraut deit, hare’e ba relatoriu ne’e hakerek ba didi’ak, para mai iha ne’e (Parlamentu) ita lalika hirus malu fali kona ba problema hakerek,” hateten PM Xanana, Segunda (28/06), iha Plenaria Parlamentu Nasional, wainhira diskuti proposta alterasaun numiru 5 husi deputadus bankada opozisaun FRETILIN, ba codigu orsamental rectifikativu 05-722, kona ba dotasaun orsamentu iha Primeiru Ministru ba prizidensia do konsellu ministru, kategoria trasferensia U$ 10,650, aloka ba assesoria sosiedade sivil, numiru 030103.

Ba inkapasidade ne’ebe ASS-GPM halao, PM Xanana reprejenta husu deskulpa ba deputadu sira, no promete ona ba deputadu sira katak, nia sei haruka nia assesor aprejenta hikas relatoriu ne’ebe di’ak liu iha Parlamentu ba deputadu sira.

Maske nune’e, PM Xanana defende, total orsamentu mak transfere ba ASS-GPM atu responde dadauk programas ne’ebe sosiedade sivil sira propoin inklui Igreija, atu iha tinan oin mai Governu bele atende fali programas seluk.

Iha proposta alterasaun ne’ebe hato’o husi proponente Arsenio Paixão Bano, Antonino Bianco, José Texeira, no Domingos Sarmento, ne’e husu atu hamenus tiha osan ba ASS-GPM U$2.000 ba U$ 8,650 husi dotasaun inisial U$ 10,650.

Tamba tuir proponente sira nia observasaun durante ne’e husi orsamentu ba ASS-GPM seidauk mosu ho di’ak makse Governu dehan sosiedade sivil hetan orsamentu barak husi Orsamentu Geral Estadu, maibe Parlamentu Nasional seidauk hatene osan hirak ne’e se-se lo’os mak simu, montante hira mak grupu ida-idak simu, se simu ona halo ona saida, se halo ona buat ruma karik iha fatin ne’ebe, oin sa povu sira sente ba aktividade ne’ebe grupu sira halao ne’e, no nasaun saida deit mak sei fo ba grupu sira ne’e, karik osan ne’ebe sira simu sira uza tomak ba interese partikular deit.

Maske nune’e, rejultadu aprovasaun hafoin diskusaun entre Governu ho membru deputadu sira ba proposta alterasaun numiru 5 ne’e, vota a fabor 16, kontra 38 no absteinsaun 6. Hatudu katak proposta alterasaun ne’e la pasa no ASS-GPM gasta nafatin total osan ne’ebe iha U$ 10,650. (TE)

No comments:

Post a Comment