My photo
Um escritor, um poeta, um aventureiro,

Friday, 18 June 2010

PM Xanana Gusmão i Planu Dezenvolvimentu Nasional


Hosi: Celso Oliveira

Ohin loron iha faze “mengisi kemerdekaan”, PM Xanana Gusmão kontinua hatudu ninia domin ba povo Timor hodi lao tun sae iha territoriu tomak ho objektivu: «koalia no rona povo Timor ninia lia fuan rasik».

Ohin loron, iha tempu “mengisi kemerdekaan”, Kayrala Xanana Gusmão ho títulu hanesan Primeiru Ministru (PM), husik ninia servisu fatin iha Dili no ninia família (fen ho oan sira), hodi lao tun sae iha Timor laran tomak ho objektivu: “atu rona rasik povo ninia lia fuan konaba «Dezenvolvimentu Nasional»”.

Laos hanesan tinan 30 liu bá nebe Xanana Gusmão ho títulu hanesan komandanti, tenki lao “klandestinamente” hodi koalia ho povo konaba “oinsa halo funu hasoru inimigu Indonésia”. Laos hanesan tinan 30 liu bá nebe komandanti Xanana hateten ba povo katak “imi tenki taka kapote ho inimigu sira”.

Maibe, ohin loron PM Xanana Gusmão hakarak hatu’ur Planu Dezenvolvimentu Nasional (PDN)” iha kontestu modernizasaun nia laran. Alias, oinsa maka rikeza Timor nian (hanesan petroliu no buat seluk tan) bele uza halo didiak no halo lo-los iha tempu modernu hodi bele servi povo ninia moris loro-loron.

Tamba Planu Dezenvolvimentu ida ne’e maka halo PM Xanana Gusmão husik hela ninia família no servisu fatin iha Dili duranti fulan tolu hodi lao iha teritoriu tomak hodi koalia ho povo Timor.

Ema barak (liu-liu partidu opozisaun Fretilin) konsidera hahalok PM Xanana Gusmão hanesan hahalok hipokrita tamba tempu kampanya politika seidauk to’o maibe PM Xanana Gusmão halo uluk tiha ona kampanya politika.

Será que hahalok PM Kayrala Xanana Gusmão hanesan kampanya politika?

Hau intrepreta hahalok PM Xanana Gusmão hanesan aktu ida nebe PM Xanana hakarak hatudu ninia kompromissu, kapasidadi humana, responsabilidadi no dedikasaun hodi servi povo Timor.

PM Xanana Gusmão hakarak aproveita ninia mandatu hanesan chefe do IV Governu Konstituisional atu bele servi povo Timor halo didiak no lolos.

Se iha tempu funu nia laran, komandanti Xanana Gusmão hatudu ninia dedikasaun i responsabilidadi hodi servi povo Timor to’o hetan ukun rasik-an, entaun, iha fali tempu halao dezenvolvimentu nasional, hanesan chefe hosi IV Governu Konstituisional, PM Xanana Gusmão hakarak asumi ninia kompromissu hodi liberta povo Timor hosi kiak i beik.

Ne’e duni, hau la hare’e PM Xanana halo kampanya politika. Hau hare’e “sim” PM Xanana Gusmao hakarak koloka interesse nasional as liu interesse partidu ou grupo.

Ohin loron, ita hotu senti iha liberdade atu koalia, hakerek, hananu ou halo buat nebe maka ita gosta do ke tinan tolu nulu liu bá ita hotu sei moris ho tauk.

Ohin loron, independensia signifika ita uza ita ninia kapasidade humana, intelijensia hanesan maior benefisiu nebe Maromak fo mai ita ema hodi dezenvolve ita nia-an, ita nia família, ita nia sociedadi i ita nia nasaun.

Parabéns ba PM Xanana Gusmão nebe halo tinan iha 20 de Junho de 2010.

Fim/Hotu

No comments:

Post a Comment