My photo
Um escritor, um poeta, um aventureiro,

Friday, 16 April 2010

Esperensia Ida, Bainhira Tama Iha Prostituisaun Nia Knu’uk





Written by Eva Almeida
Friday, 16 April 2010
ImageCJITL inDepth, Hau nia naran Eva Almeida, hau foin tama servisu ho CJITL ofisialmente semana rua resin, hau asina kontratu atu sai hanesan reporter investigativu junior iha CJITL iha loron 22 Fulan Marcu 2010. Hau asina kontratu ho CJITL atu halo kobertura investigativu iha Area Anti Prostitusaun. Tuir mai ne’e hau nia esperensia kobertura investigativu primeiru, iha ne’ebe hau tenki tama to’o knu’uk prostituisaun sira nia fatin hodi hasai foto no halo intervista ho sira.

“Imi nain rua Jessy (kolega reporter ida iha CJITL) hau fo servisu ida atu buka iha sidade Dili laran ne’e, fatin prostituisaun sira nian no intervista sira konaba razaun tamba saida sira hili vida ida ne’e, liu – liu sira ne’ebe tinan sei ki’ik” liafuan ida ne’e mak Xefe CJITL koalia mai hau ba dala uluk wainhira halo enkontro ho hau no hau nia kolega Jessy Vilanova ne’ebe mos hanesan Reporter ba Anti Prostituisaun.

Hanoin la to’o bainhira enkontro ne’e remata tiha, tebes duni servisu ida todan atu halo, no hau tenki hatudu katak hau mos bele.

Loron hirak tuir mai, iha hau nia uma oin mosu feto ran ida ne’ebe, jeitu oin seluk los, la hanesan feto sira bain bain nia atetuda hatais no koalia, hau diskunsia hanesan feto prostitutu.

Feto ran ne’e nia naran inisial M, bainhira ho berani hau hakbesik dadalia ho nia, ikus mai M esplika oitoan duni informalmente mai hau katak nia hala’o duni vida prostitutu no nia Mae ou nia mama rasik mos halo vida ida ne’e hamutuk ho nia, ho razaun katak laiha dalan seluk atu sira bele sustenta sira nia uma laran se la halo servisu hanesan prostitutu.

Feto ran ho inisial M ne’e, la tauk atu fo hateten mai hau konaba nia vida moris, nune’e nia mos fo nia hela fatin mai hau atu ba sira nia uma.

Nune’e iha loron 8 Abril 2010 hau ho kolega Jessy ba tuir sira nia hela fatin, bainhira ami to’o iha ne’eba M fase hela roupa no Tia ida ho inisial CF (feto ran M nia mama) mak simu ami.

Hodi hein M fase ropa hotu, ami mos dada lia ho CF ne’ebe mos hanesan prostitu maske CF rasik nu’udar inan ba M.

“Ema agora nee halo terang -terangan deit, la hanesan ami nia tempo uluk halo sub-subar agora nee labarik ki’ik involve an ba vida ida ne’e barak, tamba ema nia kebutuhan ne’e, agora servisu la iha, se imi la fiar hein hau telfone ba sira imi intervista mak sira ida-idak koalia ba imi” CF haktuir.

Nune’e ami konsege hetan numero kontaktu feto prostitutu ida tan nia numero mobile, no ami konsege halo kontaktu ho nia, e feto ne’e deside atu ami ba hasoru nia iha nia uma domingu kalan, tamba loron seluk sira tenki ba halo servisu prostitu atu hetan osan.

Iha loron 11 Abril, Domingu meiudia hau ba hein hau nia kolega Jessy iha edifisiu CJITL atu ami rua prepara an ba hasoru feto oan ne’ebe promete ona ho ami katak bele hasoru no halo intervista iha tempu kalan.

Kalan ne’e duni ami konsege hasoru feto ne’e, ne’ebe nia naran inisial SC, nia idade foin tinan 15.

Iha uma ne’e, iha mos feto ran M ho mane ida, nune’e molok ami intervista sira, M husu ba ami atu koalia direitamente liu husi telefone ho Xefi CJITL, nune’e hau mos kontaktu ho hau nia Xefi hodi husu atu koalia ho feto ne’e.

Hafoin hau nia Xefi koalia tiha ho M liu husi telefone, ikus mai nia fo duni lisensa ba ami atu intervista ho feto nurak SC ne’ebe ho idade tinan 15 ne’e. (intervista noticia ne’e publika iha okos ne’e).

Iha hau nia oin, feto ran SC, bonita tebes, nia idade sei nurak, maibe tamba sa nia hili vida ida ne’e, rajaun ba nia klaru katak nia frustrado no laiha tan ema ida tau matan ba nia. Hanesan mos Tia CF ho nia oan feto M ne’ebe halo vida ida ne’e.

Reporter CJITL konsege hasai foto hamutuk ho familia bo’ot ne’e, inklui ho mane ida ne’ebe bain bain toba ho sira, no mane ne’e rasik nu’udar membru Polisia Nasional Timor Leste – PNTL.

Intervista ho Tia CF mos, reporter CJITL konsege halo iha loron tuir fali, loron 12 Abril 2010, iha oras tuku 02.30 loraik, hafoin Tia CF rasik mak manda SMS ida mai CJITL katak nia mos pronto fo intervista konaba nia vida e nia promete atu kontaktu tan ho feto seluk ne’ebe halo vida ida ne’e, tamba tuir nia katak iha feto Timor oan barak tebes mak oras ne’e hamutuk ho nia grupo hala’o vida moris hanesan prostitutu. (Reporter CJITL, Eva Almeida)

No comments:

Post a Comment