My photo
Um escritor, um poeta, um aventureiro,

Friday, 23 April 2010

DISCURSO PROVEDOR DIREITOS HUMANOS E JUSTIÇA IHA SERIMONIA TOMADA DE POSSE

Sua Excelência Presidente da República
Sua Excelência Presidente Parlamento Nacional no Excias Vices Presidentes
Sua Excelência Primeiro-Ministro no Excias Vices-Primeiro-Ministro
Sua Excelência Presidente do Tribunal de Recurso
Sua Excelência Ex-Presidente do Parlamento Nacional no Excelencia Ex-Primeiro-Ministro
Sua Excelência Reprezentante Especial Secretário-Geral das Nações Unidas
Exmos Ilustres Membros do Parlamento Nacional
Exmos Membros do Governo
Exma Procuradora-Geral da Republica
Exmo Sr. Comissário Komissaun Anti Korrupção
Exmo e Rev. Bispo ou Reprezentante Bispo da Diocese de Dili no reprezentantes Confissões Religiosas sira Seluk.
Exmos Srs Embaixadores, Corpos Diplomáticos no Reprezentantes Agências Internacionais,
Ilustres Convidados Civis no Militar.

Ohin dala ida tan Parlamento Nacional fó tomada de posse ba áta hau henesan Provedor de Direitos Humanos e Justiça ba segundo periodo de mandato, ho Provedores-Adjuntos nain rua, nuné ho haraik án no respeito tomak Hau hakarak agradece ilustres membros Parlamento Nacional ba konfiansa ida nebe depozita ba áta hau atu simu kargo importante no todan ida né.
Hau nia obrigado especial ba mos Presidentes Partidos Politicos sira nebe liu husi sira bankada parlamentar nomeia no hili Hau atu kontinua halao servisu hanesan Provedor de Direitos Humanos e Justiça.

Ba cerimónia tomada de posse ida ne, Hau mai ho Hau Nia Provedores Adjuntos nain rua, ida Dr. Silvério Pinto Baptista, ex Provedor-Adjunto, no ida fali Dr. Rui Pereira dos Santos, nebe uluk sai hanesan Juiz, Tribunal Distrital Dili, hau fiar katak ami nain tolu bele servisu hamutuk lori Instituisaun ida ne halao nia knar ba tinan 4 mai oin.

Hau hakarak congratula hau nia colega Dr. Ivo Valente nebe contribui ba democrasia iha prosesso nomeasaun ba Provedor, nomos Hau hakarak agradece Hau nia colega Dr Amândio Benevides, nebe durante tinan 4 fó nia contribuição no colaboração servisu hamutuk ho Hau hanesan Provedor Adjunto.

Ami hatene no konsiente katak iha madatu tinan 4 liu ba Ami seidauk halo buat barak, maibe sempre halo esforso atu halao ami nia knar ho diak tuir kbit nebe Lei fó mai ami no tuir rekursos humanos no finanseiros nebe iha. Iha primeiro ano inisio dezenvolvimento institusional ami enfrenta dezafios barak, ho orsamento nebe kiik, ami labele halo buat barak, entretanto Ami kontinua lao ho konfiansa e PDHJ hahú loke nia odamatan ba públiko iha 20 de Março de 2006, no, iha fulan Abril de 2006, Timor-Leste enfrenta krize, PDHJ ho rekurso nebe la sufisiente maibe, hahú halao processo investigasaun ba krize no nia rezultado, ható ona ba Parlamento Nasional no órgauns kompetentes balun. Ami sei kontinua halao ami nia servisu tuir plano no programas nebe estabelese ona, embora ami hatene katak ami sei hasoru nafatin dezafios barak iha futuro. Maibe Ami sei hatudu nafatin ami nia komitmento no boa vontade nebe forte, atu serví ba povo no nasaun doben ida ne.

Tanba ne ho konfiansa ba dala rua nebe Parlamento Nacional ohin hatodan ba Hau nia án, sei hametin tan hau nia komitemento no sei halo esforso tomak atu fortifika instituisaun PDHJ, kapasita rekursos humanos nebe iha, dezenvolve programas relevantes ba protesaun no promosaun direitos humanos no promosaun ba boa governasaun, sei reforsa tan PDHJ nia sede regional 4 nebe estabelese ona, nomos buka dalan oinsa atu hametin relasaun no kooperasaun diak ho institusionais governamentais no Estado nian, liu liu ho Ministério da Justiça, Ministerio Públiko, Komisaun Anti Korrupsaun, Inspektor Geral, Komissão Função Público, Gabinete Vice-Primeiro Ministro assuntos de Gestão Administração Estado nian, Komando PNTL, Komando F-FDTL, nune nomos ho NGO Nasionais atu bele servisu hamutuk ba interesse nasional.

Karik iha periodo anterior buat balun seidauk lao diak, ami sei buka atu hadiak, no ami mos hein katak instituisoens Estado nian nebe seidauk koopera diak ho PDHJ bele hatudu sira nia boa votande de kooperasaun ho Instituisaun independente ida ne. Ami bele iha komitemento no boa vontade forte, maibe wainhira rekursos la sufisiente no la iha kooperasaun diak husi Instituisoens do Estado no Governo nian, no la iha apoio no servisu hamutuk husi NGO nasionais no sociedade civil tomak, ami sei la hetan sucesso, e wainhira la hetan sucesso, sei hatun fiar no konfiansa povo no cidadãos sira nian ba Instituisoens Estado nian.

Ejistênsia PDHJ nian, nebe prevê iha Constituição RDTL hanesan órgão independente ho funsaun atu apresia no buka satisfaz queixas cidadãos sira nian hasoru poderes públikus, tanba né, Hau hakarak promete deit katak Instituisaun ka Órgão Independente ida né, sei continua halao nia função ho independência em relação ao Governo no restantes órgãos de soberania, partidos politicos no entidades sira seluk nebe bele afekta PDHJ nia servisu. Hanesan Provedor Hau sei halao knar ho independénsia, imparcialidade, integridade no responsabilidade tomak ba interesse do povo no Estado doben ida ne.

Embora hahú fulan Agosto 2009 PDHJ la iha ona kompetência atu simu queixas no investiga kazus de corrupção la significa katak Instituição ida ne lakon nia importância atu halao nia servisu. Órgão independente ida ne sei continua halao nia knar atu promove no proteje direitos humanos nomos promove boa governação. Tuir natureza Instituição ida ne, nia iha competência atu aprecia queixas, halao investigação no ható recomendação ba órgãos competentes, no la iha poder decizório.

PDHJ sei reforsa servisus fiskalizasaun, monitorizasaun, no investigasaun ba Instituisoens Governo nian konaba aktus ou omissoens nebe contraria ho lei ou regulamentos, irrazoáveis, irregulariedades injustos ou injustifikados, opressivos ou discriminatórios, nomos hahalok incompatíveis ho atribuições husi órgão ou entidades nebe pratica.

Durante ne PDHJ halao nia servisu bazeia ba Lei 7/2004 ho aktividades principais tolu, hanesan monitorizasaun, investigasaun no edukasaun publiku. Ami rekonhese katak Iha tinan 4 nia laran poder nebe maka ami seidauk halao maka poder no kompeténcia nebe prevê iha artigo 150 no 151 Constituição RDTL, tanba PDHJ rasik la iha Ekipa Téknika Jurídica atu ajuda PDHJ halo análize no verifikasaun ba inconstitucionalidade por omissaun medidas lejislativas no mos atu requere deklarasaun inconstitucionalidade medidas lejislativas tuir artigo 150 no 151 Constituição RDTL.

Ho rekursos nebe ami iha, ami halo esforso tomak no halao servisu tuir mandatu Lei nian buka atu cidadaun hotu bele hatene PDHJ nia knar, koopera ho istituisoens nasionais no instituisoens internasionais nebe iha knar hanesan ho PDHJ. Koopera no servisu hamutuk ho NGOs Nasionais no Redes Direitos Humanos iha Distritos. Ho orsamento nebe seidauk sufisiente no adequadu, ami konsegue halo buat barak. Hau hakarak informa ba membros Parlamento Nasional tomak no ilustres konvidados hotu katak ho inisiativa no serviso nebe ami halo, PDHJ agora dadaun Instituisoens Nasionais Direitos Humanos iha Rejiaun seluk mos konhese tanba esforso no kooperasaun nebe PDHJ estabelese ho Instituisoens Nasionais de Direitos Humanos hotu iha mundo.

Hahú PDHJ halao nia knar ami buka dalan oinsa estabelese kooperasaun ho Instituisoens Direitos Humanos iha Rai seluk, nune sira mos bele fasilita treinamento ba funsionários PDHJ nian. Ami hakarak menciona oitoan ba kotuk, iha tinan 2007, PDHJ sai pleno membro Asia Pacifico Forum, ba Instituisoens Nasionais Direitos Humanos, embora iha tempo neba PDHJ seidauk prenxe rekezitus hanesan Instituisan Nasional Direitos Humanos tuir Principios de Paris, tanba ne Provedor tenki kria Konselhu Konsultivo ida nebe nia membros sira kompostu husi asosiasaun emprezarios, assosiasaun Advogados, sindikatos jornalista, sindikatus de trabalhadores, NGOs Nasionais, reprezentantes komunidade Relijiozas, feto no mane, ho diversas étnias no relijiaun, hodi bele prenxe rekesitu internasional konaba pluralismo, no iha tinan 2008, PDHJ sai mos membro ba ICC (International Coordinating Committee) ba Instituisoens Nasionias Direitos Humanos nebe kompostu husi Instituisoens Nasionais Direitos Humanos iha Rejiaun Amérika, Europa, Áfrika no Ásia Pasifiku, PDHJ mos hola parte iha Ombudsman Asia nian no Australasian Ombudsman.

Nune mos hanesan Nasaun nebe koalia lian Português, PDHJ estabelese relasaun no kooperasaun diak ho Provedorias da Justiça no Ouvidoria-Geral Paises de Lingua Portuguesa, hanesan Portugal, Angola, Macau no Brasil. Tanba esforso no servisu PDHJ nian, hetan mos rekonhesimentu husi Instituisoens Nasionais Direitos Humanos husi Rai seluk, nune, iha tinan 2008, iha Kuala Lumpur, Malaysia, halo avaliasaun no klasifikasaun ba servisus Instituisoens Nasionais Direitos Humanos iha rejiaun Asia Pasifiku, PDHJ Timor-Leste hetan kualifikasaun grau A hanesan mos Australia no Nova Zelandia. Ho servisu nebe ami halao no suseso nebe ami hetan, PDHJ Timor Leste sai ejemplo no modelo ba Nasaun kiik sira nebe hakarak estabelese Instituisaun Nasional Direitos Humanos. Ezemplo, iha tinan 2007, PDHJ hetan konvite especial husi Organizasaun Direitos Humanos no Demokrasia Taiwan nian nebe hakarak harí sira nia Instituisaun Nasional Direitos Humanos iha Taiwan, PDHJ kontribui ho experiensia de servisu iha Timor-Leste, nune mos, tinan kotuk 2009, nasaun Samoa iha Pasifiku hakarak estabelese instituisaun Nasional Direitos Humanos, PDHJ hetan konfiansa husi ICC iha Genebra, no Asia Pasific Forum, delega PDHJ ba Samoa reprezenta instituisaun nasional direitos humanos iha rejiaun Asia Pasifiku, hodi fahe experiénsia oinsa knar no servisu PDHJ nian durante né. Foin lalais ne dia 23 de Março de 2010, iha reuniaun Instituisaun Nasional Direitos Humanos iha Genebra, ICC fó sai nia relatório ho lista ida konaba accreditasaun status Instituisaun Nasional Direitos Humanos iha mundo tomak, nebe PDHJ Timor-Leste kontinua ho kualifikasaun grau A, katak PDHJ nia servisu lao tuir duni Principios de Paris, enquanto Nasaun balun sei lao ho grau B no C. Ne sai hanesan orgulho ida ba Timor-Leste.

Serviso no susesso nebe PDHJ hetan ami deve favor mos ba Ajensias Internasionais balun iha Timor-Leste nebe durante ne fó sira nia apoio no konfiansa ba servisu PDHJ nian, hanesan UNMIT, UNDP, Ausaid, USAID, IPAD, Ajéncia Espanhola, UNHCR, IOM, Karitas Australia, MSD, Governo Finlandia, Irlandia, Nova Zelandia no sira seluk tan. Ami sei kontinua halo esforsu haburas no habelar informasaun konaba knar no servisu PDHJ nian, hametin koperasaun no servisu hamutuk ho ajensias internasionais no nasionais ami sei haburas no fortifika Instituisaun ida ne iha futuro nune bele hetan nafatin konfiansa husi ita nia povo nomos konfiansa husi Ajensias Internasionais iha mundo Rai klaran.

Embora ho esforso nebe ami halo Ema balun sei kritika no duvida ho serviso no susesso nebe PDHJ halao no hetan durante ne, ba oportunidade ida ne Hau hakarak agradese ba ita bot sira nia preokupasaun no kritikas nebe ita bot sira ható, ne sai hanesan motivasaun ba ami atu servisu diak liu tan. Instituisaun ida ne loke nia odamatan ba cidadaun hotu nebe hakarak kontribui ho opinioens ou sujestoens pozitivas no boa fé ho objektivu atu fortifika Instituisaun ida ne, ami hein nafatin krítikas konstruktivas, maibe tenki bazeia ba PDHJ nia Lei. Durante ne maluk balun ladun hatene PDHJ nia Lei, kritika katak durante tinan 4 ona PDHJ halo investigasaun ba kazus korrupsaun seidauk lori kazu ida ba Tribunal no seidauk hatama ema ida ba kadeia. PDHJ tuir Lei la iha kbit no kompeténsia atu lori kazu ba Tribunal no lori ema ba kadeia. PDHJ iha deit kompeténsia atu investiga no rekomenda ba órgauns kompetentes, kazus de korrupsaun, depois de investigasaun, ami rekomenda ba Ministério Público, sira maka iha kompeténsia atu prosesa kazus de korrupsaun ba Tribunal.

Iha ona kazus 28 korrupsaun nian maka PDHJ rekomenda ona ba Ministerio Público atu prosesa, nomos iha rekomendasaun barak nebe husi rezultadu investigasaun nebe PDHJ ható ba órgauns kompetentes, implementa ka lae, fila fali ba dever legal instituisoens Estadu nian atu kolabora no koopera ho Instituisaun Independente ida ne. Iha rekomendasoens jerais balun nebe ami haruka ba Chefe do Governo no cópia ba Sr. Vice-Primeiro Ministro assuntos Gestão Administração do Estado, maibe to’o ohin loron mos seidauk implementa. Portanto rekomendasoens sira nebe hau mensiona, karik durante ne seidauk implementa husi órgauns kompetentes laos tanba PDHJ maka impotente, maibe nia kbit maka rekomenda deit, fila fali ba boa vontade husi orgãos competentes sira atu implementa ou lae.

Desde fulan Agosto 2009, bazeia ba Lei Komisaun Anti Korrupsaun, PDHJ la simu ona kazus de korrupsaun, e kazus de korupsaun nebe sei iha PDHJ nia liman sei entrega hotu ba Komissaun Anti Korrupsaun, wainhira Komissaun ne hahú ona nia servisu. Bazeia ba konsekuensia legal ida né, Ami hakarak rekomenda no propoin ba Parlamento Nacional atu halo lalais revizaun ba Ami nia Lei 7/2004, PDHJ sei fó apoio tomak ba revizaun ida ne, nomos PDHJ agora dadaun diskute no dezenvolve hela estrutura institusional foun nebe sei entrega ba Governo no Parlamento Nacional iha tempo badak.

Ba oin, PDHJ mos sei reforsa servisus de supervizaun ba funcionamento poderes públikus no nia orgauns sira, konaba violasaun direitos humanos no má administrasaun, PDHJ sei ható ba Governo, ba Parlamento Nacional ou qualquer organismo competente, pareceres, propostas no rekomendasaoens konaba qualquer matéria relasionada ho promosaun no protesaun direitos humanos no boa governasaun, promove kultura ida hodi respeita direitos humanos no cultura de boa governasaun.

Iha perspektiva ba dezenvolvimento humano, ita koalia boa governasaun, ita koalia konaba governasaun demokrata, e governasaun demokrata ne iha, wainhira:
a. Direitos humanos no liberdades fundamentais cidadaun sira nian ita respeita, nune permite sira moris ho dignidade;
b. Ema hotu iha nia opiniaun relasiona ba desizoens nebe afekta sira nia moris;
c. Feto no mane sai parseiros hanesan, iha vida privada no vida publika nomos foti desizaun;
d. Ema labele hetan diskriminasaun ho baze rasa, étnia, classe, género ou atributo seluk;
e. Politicas económikas no sociais tenki corresponde ho nesesidades no aspirasaun povo nian;
f. Nesesidades jerasoens futuras ou jerasaun tuir mai tenki mos reflekta iha politika actual.

Realidade hatudu katak violasaun direitos humanos sei buras iha ita nia rai laran, membros PNTL sei kontinua baku, tuku, tebe no sama ita nia cidadaun balun iha Distritos no Sub-Distritos, ita hotu hatene katak qualquer suspeito tenki prosessa tuir prosedimento legal no respeita sira nia direito, durante ne PDHJ servisu hamutuk ho NGOs Nacionais no Ministerio da Justiça fó ona treinamento ba membros PNTL iha Distritos, maibe mentalidade uza forsa no prátika de torturas hasoru ita nia cidadaun sei kontinua lao, instituisoens responsáveis ba autores violasaun direitos humanos seidauk foti medidas ruma atu minimiza violação direitos humanos, rekomendasaun barak PDHJ haruka ba Komando PNTL, seidauk foti aksoens konkretas hasoru nia membros sira nebe pratika violasaun direitos humanos, pelo kontrário, buka atu desmente, defende no proteje autores sira ne. Se hahalok hanesan ne ita kontinua, sei kria frustrasaun iha povo nia let.

Nune mos wainhira ita koalia konaba promosaun direitos humanos, ita la ses án husi acesso ba justiça. Timor Oan barak seidauk hetan oportunidade no garantia ba justiça, partikularmente populasaun sira nebe vulnerável económika no socialmente la iha acesso informasaun ba sira nia direito oinsa hetan konsulta juridika, asisténsia judisiária, acolhimento no apoio ba vitimas violénsia doméstika nomos meio alternativo rezolusan extra judisial conflitos nian. Ema kiik no kiak sente katak ita nia sistema judisial la inklina ba sira, ne duni oinsa ita alarga acesso ema kiik no kiak sira ba sitema judisial nebe favorável. Acesso ba justiça hanesan direito fundamental cidadaun nian, eficiensia no acesso ba justiça responsabilidade Estado nian. Portanto PDHJ hanoin katak efektivasaun acesso ba justiça hanesan faktor imprescindível ba defeza cidadaun sira nia direito, hanesan afirmasaun ba nia pessoa no nia dignidade.

PDHJ rekonhese Governo nia esforso ba promoção acesso ba justiça, hanesan passo importante iha processo demokratizasaun no dezenvolvimento do país.

Iha parte seluk, Timor-Leste hanesan Estado de Direito Demokratiko, Governo tenki kria no fortalese sistema ida ke diak atu garante prátika de boa governasaun.

Prinsipios de Boa governasaun laos deit aktos de transparénsia, responsabilidade, akuntabilidade, no kontrola korrupsaun, maibe mos tenki rona no responde cidadaun sira nia necessidades, presta servisus nebe efikás no efisiente no hetan partisipasaun luan husi cidadaun hotu, equitativu no inkluzivu, inklui sira nebe vulneráveis.

Konseito boa governasaun mos laos deit dever atu maneja administrasaun tuir prinsipios nebe temi ona, maibe órgauns soberanos sira tenki promove kooperasaun institusional nebe diak no konstante, no oinsa dezenvolve relasaun interaktivu entre órgauns soberanos sira ho sociedade civil no sector privado.

Ita hotu tenki konsiente katak, ita sei la assegura dezenvolvimento ida sem boa governasaun, ne duni, boa governasaun sai hanesan ejijénsia ida, nomos hanesan rekursu estratéjiku para atu fó beneficio e perspektiva ba Nasaun atu sai dezenvolvido no moderno.

Tanba ne, hau hakarak rekomenda ba Governo, liu husi Sr. Vice-Primeiro Ministro assuntos de Gestão no Administração do Estado atu dezenvolve lalais medidas estratégikas ba Reforma e Modernizasaun Administração Publika, atu bele:
1. Adapta administração pública tuir principios de boa governação;
2. Fleksibiliza no racionaliza organização Administração Pública, simplifika método no sistemas de trabalho, no elimina áreas nebe la preciza;
3. Despartidarização aparelho Estado nian; no adequa organização Administração do Estado;
4. Reabilita papel serviço público nian no reforça transparência iha gestão ba sasan publicas;
5. Promove efisiensia no eficácia ba prestação de serviços públicos iha sektores públikus liu husi nia aktividades de inspeksaun,
6. Hakbesik (aproxima) Administração Publica ba cidadão no aumenta coordenação intra no interministerial;
7. Capacita no motiva recursos humanos para atu compreende no implementa diak liu politicas públicas no coordena implementaçao politicas sira ne;
8. Promove sensu de responsabilidade no akountabilidade iha sector publiku em geral, liu liu sira nebe kaer poder, nune bele hatene e konsiente ba sira nia aksaun nebe bele hamosu implikasaun moral;

Fortalecimento instituicões no sira nia capacidade atu presta servisus públikus sai nudar elemento fundamental ba promoção boa governação.

Issu korrupção nebe durante ne ita hotu kestiona no hakilar tanba ita seidauk dezenvolve medidas estratejikas oinsa halao gestão iha Administração do Estado. PDHJ apresia inisiativa Governo nian iha área boa governação no combate corrupção, maibe tenki kontinua halo esforso atu hatudu aktus governasaun ida nebe efektivo, efisiente, participativo, transparente, nune ita bele combate corrupção, e wainhira Governo hadia sistema, processos ho regras no procedimentos ba prestasaun de kontas nebe klaro, sai elementos fundamentais ba boa governação, nune taka dalan no oportunidades ba acesso ilicitos rekursos públikos.

Ita tenki implementa no promove kultura da efisiensia, transparensia, integridade no responsabilidade iha entidades no organismos públikus sira nia lét. Tanba ne PDHJ sei esforsa áan atu servisu hamutuk no hametin kooperasaun ho KAK atu prevene kazus de corrupção, no sei servisu hamutuk ho Komisaun Funsaun Públiku atu elabora Normas de Étika no Deontolojia ba funsionarios sira nebe ejerse kargos de Direksaun no Chefia.

PDHJ hanesan mos instituisaun Ombudsman iha Rai seluk nia funsaun atu tau matan ba governasaun diak hodi promove efisiénsia iha sektores públikus liu husi nia monitorizasaun ba instituisoens governamentais halao sira nia knar, iha parte seluk PDHJ iha nia papel importante hodi tau matan mos ba funcionários públicos sira halao sira nia knar tuir padraun moral no étika nian no ikus liu oinsa PDHJ bele promove sensu de responsabilidade no akontabilidade iha sektores públikus, partikularmente sira nebe kaer poder.

Tanba ne, atu PDHJ bele halao nia knar ho diak, Hau hakarak husu ba Parlamento Nacional no Governo atu bele concede orsamento no rekursos humanos nebe suficiente ba PDHJ para atu assegura ami nia funcionamento e adekuadu atu mantein ami nia independência, imparcialidade e eficiência. Instituisaun ida ne tenki forte atu halao knar fiskalizasaun no superviziona instituisoens governamentais no instituisoens Estado iha área boa governasaun no protesaun direitos humanos. Hanesan Instituisaun nebe promove boa governasaun ami sei hatudu oinsa ami uza rekursus ho efisiênsia, nune, ho rekursus nebe sufisiente ho ejekusaun nebe efisiente, sei rezulta susesu nebe diak. Além de rekursus, ami mos tenki iha apoio legal nebe forte, tanba ne, ami hein katak Parlamento Nacional bele halo revizaun lalais ba ami nia Lei nune bele fó kbit ami atu halao ami nia knar ho diak.

Hau mos hakarak husu ba Governo inklui instituisoens Estado nian atu fó konsiderasaun ho seriedade ba rekomendasaun sira nebe PDHJ rekomenda konaba rezultadu saida maka PDHJ hetan iha nia relatório nune Governo bele hadiak, karik iha aktus de irregularidades, ilegalidades ou injustisa no aktus violasaun direitos humanos ruma. Aprezentasaun relatório mai husi PDHJ labele haré no konsidera hanesan formalidades deit. Relatório no rekomendasaun nebe PDHJ ható, tenki iha konsiderasaun sério no foti kedas aksaun konkretas atu hadiak nomos foti aksaun ba ema sira nebe pratika aktus sira ne, nune ita bele harí governasaun ida ke forte no hametin Estado de Direito Demokrátiko iha Timor-Leste.

Aproveita oportunidade ida ne Hau hakarak agradese ba Parlamento Nacional no Governo ba apoio nebe fó ba PDHJ nia serviso, obrigado ba ajénsias internasionais no NGO nasionais hotu nebe durante ne fó apoio no servisu hamutuk ho PDHJ, hau nia obrigado ba sociedade civil tomak no Igreja no komunidades relijiosas sira seluk ba ita nia servisu hamutuk, e hau hein katak ami sei bele hetan nafatin apoio iha tinan 4 mai oin.

Sucesso instituisaun ida la depende deit ba komitmento, esforso no kapasidade lideransa instituisaun ne nian, maibe mos depende ba rekursos nebe iha no kooperasaun husi instituisoens sira seluk, wainhira rekursos la sufisiente no adekuadu e la iha kooperasaun diak husi instituisoens sira seluk, no la hetan apoio husi sociedade civil tomak, instituisaun ne sei la hetan sucesso.

Tanba ne hau hakarak konvida no apela ita hotu iha ne, ba Órgauns soberanos sira, Instituisoens Governamentais no Estado nian hotu, NGos Nasionais no sociedades civil tomak, mai ita servisu hamutuk ba dezenvolvimento Nasaun doben ida ne, no servi ita nia povo, ho neon mós no liman mós.

Obrigado ba ita bo’ot sira nia atenção.

No comments:

Post a Comment