My photo
Um escritor, um poeta, um aventureiro,

Saturday, 20 March 2010

PDHJ ho Komnas HAM Buka Ema Lakon Iha Timor Leste

Iha 26 de Janeiru liu bá, PDHJ Sebastião Dias Ximenes ho Komnas HAM Indonésia, assina agreement ida hodi komesa troka informasaun konaba ema nebe lakon duranti tinan 1999 iha Timor Leste.

Hau konsidera hanesan passu ida diak no importanti tebes nebe governu AMP, lideradu hosi PM Xanana Gusmao halo iha inisiu 2010 hodi buka tuir ema nebe lakon.

Processu buka ema lakon tuir lolos akontese desde Timor Leste hetan liberdadi iha 1999 ou hafoin proklamasaun independensia 2002, maibe tamba laiha ema ida ou lideransa ida maka hatudu interesse iha aspektu ida ne’e entaun processu buka ema lakon abandonadu hela.

Iha PR Ramos Horta ho PM Xanana nia lideransa, sira nain rua hatudu komitmentu i dedikasaun atu hadia povo nia moris.

Ne'e duni, Estadu Timor iha obrigasaun moral no politika hodi estabelese kontaktu diak ho Governu Indonésia hodi komesa buka ema sira nebe lakon duranti funu iha Timor Leste. Tamba politika buka ema lakon duranti funu iha Timor Leste sei rekupera fila fali dignidadi Timor oan nian.

Hau iha serteza katak família hosi ema sira nebe maka lakon duranti funu iha Timor Leste, kontinua deposita sira ninia konfiansa no esperansa ba Estadu Timor atu hahu’u troka informasaun ho Governu Indonésia hodi buka ema sira nebe lakon, laos deit iha 1999 maibe tenki ser mos antes 1999.

Tuir PDHJ, Sebastião Dias Ximnes hateten katak: “To’o agora sei kontinua estuda mekanismu nebe diak hodi hahu’u halo servisu iha aspektu ida ne’e. Laos buka deit sira nebe maka lakon iha 1999 maibe kuandu komesa servisu ona entaun sei mosu dadus foun hodi buka sira nebe lakon antes 1999”.


Celso Oliveira

No comments:

Post a Comment