My photo
Um escritor, um poeta, um aventureiro,

Wednesday, 11 November 2009

Constâncio Pinto: Motivu boot no prinsipal ida nebee lori jovens sira ba manifestasaun 12 de Novembru tinan 1991 maka UKUN RASIK-AN.

Entrevista ho Embaixador Constâncio Pinto: Komemorasaun ba dala 18, loron Masakre Santa Kruz nian (1991- 2009)

Aban, loron 12 fulan Novembru, Timor oan sira komemora loron masakre Santa-Kruz ba dala 18, loron nebee militar Indonezia sira oho ema foin sa’e sira iha tinan 1991. Loron nebee Timor oan foin sa’e sira, husi klibur foin sa’e oioin ho estudantes sira, sai husi uma hodi tun iha Dili sisi makaas ba ONU hasai Indonezia husi Timor Lorosa’e hodi hahu prosesu referendum ida, prosesu nebee fo biban ba Timor oan sira hodi hakotu rasik nia destinu ho ukun rasik an.
Manifestasaun nebee la’o ho dame husi foin sa’e sira nakfilak ba mota ran tanba, militar indoneziu sira tiru manifestante sira iha rate Santa-Kruz. Ema foin sa’e hamutuk atus resin mate no lakon. To’o ohin loron seidauk hatene maioria husi vitima sira nia paradeiros. La hatene hakoi iha nebee, soe iha tasi ou sunu lakon.

Militar indoneziu sira senti frustradu no hirus tebes tanba, sira nia prezensa ho okupasaun iha Timor Lorosa’e hetan ameasa makaas husi ema Rezistensia ba ukun rasik an sira, liliu husi ema foin sa’e sira nebee halo rezistensia makaas iha vilas ho aldeias okupadas. Tanba ida nee mak sira halo masakre hasoru ema foin sa’e sira, feto ho mane, nebee ho aten brani tebes buka Ukun Rasik-an ba Rai Timor Lorosa’e.

Iha tempo nebaa, Constancio Pinto, ho naran funu, Terus, nudar Sekretariu Comite Executivo da Frente Clandestina (CE/FC), orgaun maximu Frente Clandestina nian. Terus nudar lider masimu Frente Klandestina nian iha papel boot no determinante iha periodo neba. Nudar lider masimu CE/FC no organizador prinsipal manifestasaun loron 12 fulan Novembru tinan 1991 nian, nia hatene liu, tan sa manifestasaun nee mosu no atu buka sa-ida.

Hodi komemora loron masakre 12 de Novembru ba dala 18 nee, STL hatun entrevista eskrita ida ho ex-Sekretariu CE/FC, Terus, kakutak husi manifestasaun 12 de Novembru de 1991, nebee agora nudar embaixador RDTL nian iha Washington, Amerika, hodi hatene sa-ida mak nia sinti no oin-sa ninia papel iha tempo nebaa.

Tuir mai entrevista nebee STL halo ba senhor Embaixador Constancio Pinto (CP):

STL - Ita boot bele esplika motivu nebee lori foin sa’e sira halo manifestasaun iha loron 12 fulan Novembru tinan 1991?

CP - Motivu boot no prinsipal ida nebee lori jovens sira ba manifestasaun 12 de Novembru tinan 1991 maka UKUN RASUK AN. Motivu seluk maka hakarak fo hatene ba Komunidade Internasional konaba aspirasoens povo Timor-Lorosae nian ba Ukun Rasik An; motivu seluk tan maka fo resposta ba frustrasaun jovens barak nian tanba kanselamentu ka pembatalan vizita Delegasaun Parlamentar Portuguesa mai Timor Lorosae iha fulan Outubru tinan 1991.

STL - Oin-sa ita boot ninia papel iha preparasaun ba manifestasaun nee no sa rezultadu mak ita boot hein husi manifestasaun nee?

CP - Iha altura neba hau sees an tiha ona husi forsas espesiais Indonezia nian (SGI) nebee kaer hau iha lorom 25 fulan Janeiru tinan 1991, iha nebee sira dadur hau iha SGI no halo torturas makaas hasoru hau. Altura nee hau subar iha Lahane Timur hamutuk ho compamheiro Franscico Lelan (Kiak).
Desizaun ba manifestasaun 12 de Novembru mosu wainhira hau simu informasaun husi RENETIL, liu husi Dr. Rui Maria Araujo, uluk sei estudante, iha Bali, konaba vizita mai Timor Lorosae Sr. Peter Kojman, enviadu espesial Sekretario Geral ONU nian. Vizita nee koinside ho situasaun ida mak tenso tiha ona tanba notisia kanselmentu vizita Delegasaun Parlamentar Portuguesa nian. Jovens barak dezanima i lakon esperansa i sira hatene katak sedo ou tarde intelijensia Indonezia nian sei persegue, kaer no oho sira tanba sira nia partisipasaun iha aktividade sira halo preparasaun ba vizita Delegasaun Parlamentar Portuguesa nian, nebee militar Indonezia sira identifika ho kuinese barak ona. Tan nee vizita Peter Kojiman nian oportunu tebes. Iha altura neba mos presaun boot mai husi jovens sira. Sira hakarak aksaun i hatenten katak se (CE/FC) la hola desizaun mak sira rasik sei organiza an hodi halo manfestasaun. Ho ida nee, hau, depois de rona tiha husi membru sira CE/FC nian hanesan companheiro, saudoso Segueria, Aguiri, Kiak no sira seluk tan, hau hakerek ba Comandante-em-Chefe das FALINTIL no Prezidenti Conselho Nacional da Resistencia Maubere (CNRM), Kay Rala Xanana Gusmao, aktual Primeiro Ministro, nebee altura nee mos subar iha Dili, hodi propoen manifestasaun 12 de Novembru. Iha loron 8 fulan Novembro hau simu resposta pozitiva husi Comandante Xanana Gusmao ho instrusoens klaras konaba disiplina iha manifestasaun nia laran. Comandante-em-Chefe husu ba manifestantes sira atu hala’o manisfestasaun pasifiku, labele lori kroat, labele uza lia fuan provokantes ka sadik, respeita no koopera ho polisia Indonezia nian atu nunee labele provoka violensia. Iha loron 9 fulan Novembru hau fo hatene kedas ba membros CE/FC nian i husu sira organiza manifestasaun i uza saudoso Sebastião Gomes nia missa hanesan pretestu ba manifestasaun. Iha nee hau fo honra no respeito tomak ba companheiro Gregorio Saldanha (Aguiri) membru do CE/FC nebee ho aten barani diside hodi lidera manifestasaun 12 de Novembru tinan 1991.

STL - Ita boot preve sa risku mak foin sa’e sira hasoru wainhira sira partisipa iha manifestasaun nee? Ita boot preve militar Indonezia sira sei tiru ho lori lakon partisipante sira manifestasaun nian?

CP - Hau la preve no membros CE/FC nian mos la preve katak militar sira Indonezia nian (TNI) iha planu para tiru manifestante sira. Karik hau preve mak hau sei la husu ba membros CE/FC nian organiza manifestasaun ida nee. Tantu hau nunee mos membros CE/FC sira seluk no mos manifestante sira konsiente katak, Indonezia sei kaer manifestantes balun i sei tortura sira hanesan bain-bain sira halo ba jovens sira iha manifestasoens nebee hala’o tiha ona iha tempu kotok ba. Ami mos fiar katak TNI la’os estupidu hodi oho juvens sira iha manifestasaun pasifika ida perante reprezentante Sekretario Geral Nasoens Unidas nian no jornalistas estranjeiru sira.
Juventude Loriku Assuwa’in no povo Timor Lorosae hatene katak, mate, torturas, no tratamentu violasaun direitos humanos oi-oin nebee TNI halo iha Timor-Lorosae ho objektivu ida deit, hamate espiritu nasionalizmu no patriotizmu juventunde no povo Timor-Lorosae nian hodi luta nafatin ba Ukun Rasik-An. Maibe la espera katak TNI iha planu atu oho jovens sira em massa hanesan iha rate Santa Kruz iha loron 12 fulan Novembru tinan 1991.

STL - Hafoin ita boot hatene militar sira tiru no oho ema foin sa’e sira, ita boot nudar Timor oan no sekretariu CE/FC, ita boot sinti oin-sa no aksaun sa-ida mak ita boot hola hodi salva guarda ita boot nia integridade fizika ho dirijentes klandestinu sira seluk? No oin-sa ita boot buka salva ema foin sa’e sira nebee militar sira kaer tiha ona no sei duni atu kaer?

CP - Hau senti chocado tebes ho masakre Santa-Kruz tanba hau la espera atu buat nee akontense. Nudar responsavel masimu iha Frente Klandestina iha altura neba, hau buka fo hatene kedas Comandante-em-Chefe, Xanana Gusmão nunee mos fo hatene Dr. José Ramos-Horta, aktual Presidente da Republika hodi intervem iha Nasones Unidas (ONU). Nunee mos hau fo hatene Fernando La’Sama hodi nia fo hatene ba organizasaun sira Direitos Humanos ho Amnestia Internacional hodi halo presaun ba militar Indonezia sira hodi labele halo torturas ho lori lakon jovens sira nebee partisipa iha manifestasaun nee. Husu ba organizasoens internasionais hodi halo presaun ba militar sira hodi liberta hotu jovens sira nebee sira kaer ona. Hau kontinua subar iha Dili hodi koordena ho responsaveis CE/FC sira seluk hodi husu ba populasaun tuur hakmatek iha sira nia fatin hodi hein reasoens husi ONU no Komunidade Internasional; Embora difisil, rede klandestina lao nafatin. Iha 12 de Novembru 1991, TNI kaer membru CE/FC nian ida deit, mak companheiro Aguiri. Infelizmente tanba informasoens barak monu ba funumaluk nia liman, la hatene husi se los, maka ikus mai, TNI kaer mos membru sira seluk hanesan, Francisco Branco, Filomeno Ferreira, Juvencio Martins, Jacinto Alves, no Carlos Lemos. Sira hotu ema kastigu iha Dili depois transfere ba Semarang.

STL - Ita boot halo koordenasaun ruma ho estudantes Timor oan sira iha Indonezia kona ba manifestasaun 12 de Novembro nee? Karik iha, ita boot koordena ho sese no organizasoens nebee de’it? Sa-ida de'it mak ita boot sira diskuti?

CP - Altura neba CE/FC halo koordenasaun ho Resistencia Nacional dos Estudantes de Timor-Leste (RENETIL) iha Indonezia, liu-liu ho Fernando La’Sama, aktual Presidente do Parlamento Nacional. Maibe koordenasaun nebee iha konaba halo preparasaun hodi simu vizita Delegasaun Parlamentar Portuguesa liu-liu iha eskoamentu no desiminasaun informasaun ba Komunidade Internasional konaba aksoens nebee sei hala’o durante vizita Delegasaun Parlamentar Portuguesa iha Timor Lorosae. Ami fahe serbisu ba malu, sa-ida mak estudantes sira halo iha Indonezia ho sa-ida mak ami sira hela iha Timor halo. Em relasaun ba preparasaun ida nee, RENETIL haruka nia membros balun ba iha Timor Lorosae hodi serbisu hamutuk ho CE/FC.
Maibe, hanesan hau hatenten tiha ona, Portugal kansela tiha vizita Delegasaun Parlamentar Portuguesa tanba razoens seguransa delegasaun nian nunee mos seguransa populasaun nian. Tan nee ami koordena ba malu hodi transforma manifestasaun nebee preparadu ona hodi simu Delegasaun Parlamentar Portuguesa ba fali manifestasaun nebee mosu iha loron 12 fulan fulan Novembru hodi simu enviadu espesial Sekretariu-Geral ONU nian, Peter Kojman. Hafoin masakre iha rate Santa-Kruz mos ami halo koordenasan ba malu nafatin nebee rezulta iha manifestasaun nebee halo iha Jakarta, iha loron 19 fulan Novembru no nudar nia konsekuensia TNI sira kaer tiha estudantes lubun ida, inkluindu Fernando La’Sama, Sekretariu Geral RENETIL nian ho Joao da Camara, aktual Embaixador RDTL nian iha Tailandia.

STL - Iha tempo neba, estudantes Timor oan sira barak fila husi Indonezia mai iha Timor Lorosa’e. Tansa mak estudantes sira nee fila mai Timor Lorosa’e iha tempo neba? Oin-sa papel estudantes sira nian iha preparasaun ho sira nia envolvimentu iha manifestasaun loron 12 fulan Novembru nee?

CP - Estudantes nebee fila husi Indonezia ba iha Timor Lorosae iha tempu neba, hanesan hatenten tiha ona hodi ajuda CE/FC hodi halo preparasaun simu vizita Delegasaun Parlamentar Portuguesa. Sira nia papel iha preparasaun ho envolvimentu iha manifestasaun 12 Novembru nian hanesan mos responsabilidades nebee fahe tiha ona ba sira ba preparasaun vizita Delegasaun Parlamentar Portuguesa. Estudantes sira nebee fila ba Timor Lorosa’e balu mos hetan kanek no sai dadur iha manifestasaun loron 12 fulan Novembru nee.

STL - Ita boot subar iha nebee depois de militar Indoneziu sira halo perseguisaun makaas ba ita boot?

CP - Hau subar iha Dili, Santa Cruz, Lahane, Kulu Hun, ho Fatu Meta hamutuk ho Komandante Kay Rala Xanana Gusmao.

STL - Iha tempo neba, karik militar Indonezia sira kaer ita boot, ita boot hatene sa-ida mak sei akontese ba ita boot?

CP - Hau hanoin akontesimentu nebee sei mosu ba hau mak mate. Companheiro Aguiri nebee nudar membro CE/FC no organizador manifestasaun iha terreno hetan pena perpetua husi Tribunal Indonezia nian. Hau nudar Sekretario CE/FC nebee iha responsabilidade ba Frente Klandestina tomak, hau la duvida sei simu pena todan liu hotu membru sira CE/FC sira seluk se sira kaer hau iha altura nee.

STL - Oin-sa mak ita boot konsegue halai sai husi Timor ba tasi balu? Ema Indonezia ruma tuir ajuda ka Timor oan sira de’it mak ajuda ita boot?

CP - Hau sai husi Dili iha loron 14 fulan Maio 1992. Amu Domingos Maubere mak lori hau sai husi Dili ho nia kareta hamutuk ho nia kondutor Armindo. Companheiro Alberto Soe, Oecusse oan ida, mak lori hau to’o iha Malang, Indonezia. Istoria badak konaba hau nia viajem bele sani iha hau nia livru East Timor Unfinished Struggle: Inside East Timorese Resistance, publika iha Boston, Estados Unidos iha 2006.

No comments:

Post a Comment