My photo
Um escritor, um poeta, um aventureiro,

Saturday, 21 March 2009

KADIMA ho FRETILIN: PARTIDUS MAIS VOTADUS SAI OPOZISAUN

Carlos da Silva L.F.R. Saky*


Eleisoens lejislativas iha Israel (10/02/09), ho formasaun Governu foun iha rai ne’e fo hanoin hikas ba ita kona ba eleisoens lejislativas (30/06/07) ho formasaun IV Governu Konstitusional iha Timor-Leste (TL).

Artigu ida ne’e ho objektivu halo komparasaun entre partidu KADIMA iha Israel ho FRETILIN iha TL, nebe’e manan eleisoens lejislativas maibe nem ida forma Governu. Partidu sira 2º vensedores hanesan Likud ho CNRT (Conselho Nacional para a Recosntrução de Timor-Leste) mak forma fali Governu. Nune’e mos sei hare’e, razoens nebe’e halo partidu sira ne’e bele forma Governu ou labele no oin-sa sira nia komportamentu politiku iha rai demokratiku ida.


Iha rai sira nebe’e poder fahe entre Prezidenti Republika (PR) ho Primeiro-Ministro (PM), jeralmente, Konistituisaun fo poder ba PR hodi nomeia PM husi partidu mais votadu ou husi aliansa husi partidus sira nebe’e hetan maioria parlamentar. Nomeasaun ne’e halo depois de rona partidus politikus hothotu nebe’e iha reprezentasaun parlamentar nian opiniaun. Ne’e regra komum iha rai sira nebe’e ukun tuir demokrasia parlamentar nian.


Atu sukat partidu nebee manan i bele forma Governu, iha artigu ne’e sei sadere ba sistema “reprezentasaun proprosional” nebe’e TL (Konstituisaun RDTL, artigu 65º) ho Israel (http://www.knesset.gov.il/elections16/eng/about/electoral_system_eng.htm) ho kaer.


Sistema “reprezentasaun proporsional” diferente ho “sistema maioritário”. Iha sistema “maioritário”, hanesan ema “futu manu”, se mak manan, manan ona, la interesse adversariu nia manu mate, ta’uk halai ho isin kanek ou tomak. Nune’e mos iha sistema “maioritário”, partidu nebe’e manan eleisoens, la interesse manan ho maioria simples, relativa ka absoluta, nia nudar partidu mais votadu, hakarak ka lakohi, nia mak manan i tenki forma Governu duni. Enkuantu sistema “reprezentasaun proporsional”, sistema ida demokratiku liu iha mundo, la hanesan ne’e. Iha sistema “reprezentasaun proporsional” signifika votu eleitor sira nian mak determina partidu ida-idak sei hetan deputadus hira. Ninia prosedimentu fo tuir media nebe’e aas liu, nebe’e produz rezultadus hanesan mos metodu d’Hondt. Karakteristikas balu husi metodu d’Hond ida mak dudu partidu sira hodi forma koligasoens, basaa, bainhira halibur partidus barak hamutuk sei hetan numeru deputadus nebe’e barak du ke partidu ida halai mesak. Sistema “represzentasaun proporsional” loke dalan mos ba partidus ki’ik sira hodi hetan reprezentasaun iha Parlamentu, basaa, hanesan temi iha leten, votos eleitores mak determina partidu ida hetan mandato ka kadeira hira. Nune’e mos partidu ki’ik sira, iha possibilidade boot hodi to’o ba iha Governu, bainhira forma aliansa ka koligasaun ho partidu boot ida ou ho partidu naton sira seluk.


Tuir “sistema proporsional”, partidu ida mesak, la konta ho sira seluk, atu hetan maioria iha Parlamentu mak, partidu ne’e tenki manan iha eleisoens ho maioria absoluta (50% + 1). So hetan maioria absoluta mak partidu ida bele forma mesak Governu. Karik la hetan maioria absoluta iha eleisoens, entaun tenki buka forma koligasaun ka aliansa ho partidu seluk iha Parlamentu hodi hetan maioria ne’e.


Iha Israel ho TL, sistema “maioritário” uza ba eleisoens prezidensiais, maibe iha eleisoens lejislativas uza sistema “reprezentasaun proporsional”. Iha sistema “resprezentasaun proporsional”, iha opsoens barak nebe’e ajuda Prezidenti da Republika hodi hola desizaun hodi hatudu partidu ka aliansa nebe’e bele forma Governu. Entre opsaun sira ne’e, prezidenti sei hili ida nebe’e diak liu hodi forma Governu. Opsaun diak liu mak partidu ka koligasaun nebe’e hetan maioria iha Parlamentu, nia mak sei hetan konvite hodi forma Governu. Diak tanba nia sei forma Governu ida forte ho estavel. Opsoens sira ne’e balu hanesan tuir mai ne’e.


Primeira opsaun, partidu nebe’e manan iha eleisoens ho maioria absoluta (50% + 1) mak forma Governu. Bele forma mesak ou forma koligasaun se hakarak. Iha ne’e PM automatikamente mai husi partidu vensedor. Opsaun ida ne’e diak liu tanba garante estabilidade governativa.


Segundo opsaun, partidu vensedor eleisoens nebe’e manan ho maioria simples/relativa (votos la to’o 50%), obrigado buka forma koligasaun ho partidu seluk hodi hetan maioria parlamentar. Bele forma ho segundo vensedor (la obrigatório) ou partidu ki’ik seluk hodi hetan maioria iha Parlamentu. Iha ne’e, PM bele mai husi partidu mais votadu ou bele mai mos husi segundo vensedor, ou bele mos seluk, depende iha partidu sira forma koligasaun, se mak iha pezu ka influensia politika determinante liu iha koligasaun laran. Opsaun ida ne’e mos diak tanba bele garante estabilidade institusional/governativa.


Terseira opsaun, segundo partidu vensedor eleisoens bele forma Governu koligasaun bainhira, partidu mais votadu iha eleisoens, la konsegue forma koligasaun ida hodi hetan maioria iha Parlamentu. Segundo vensedor hetan maioria iha Parlamentu tanba iha apoiu husi partidu sira nebe’e hetan deputadus barak. Iha koligasaun ne’e, bele mos inklui primeiru vensedor eleisoens (la obrogatorio) iha Governu koligasaun laran se hakarak. Karik lakohi, primeiru vensedor tenki passa ba opozisaun. Opsaun ida ne’e mos diak, tanba bele forma Governu forte ho estavel ida.


Quarta opsaun, partidu vensedor manan ho 50% iha eleisoens. Iha ne’e bele dehan impatadu, tanba partidu vensedor nia votos barak hanesan ho partidus sira lakon nian tau hamutuk. Hanesan izemplu, iha Israek, sira nia numeru total deputadus hamutuk 120, iha nebe’e bele fera ba rua, partidu vencedor hetan deputadus hamutuk 60 i 60 seluk ba opozisaun sira. Enkuantu iha TL, la sei hetan “impatadu” ne’e, basaa, numeru total deputadus hamutuk 65, numeru klik la’os numeru kaduak.


Atu hakat liu situasaun ne’e, iha dalan rua mak bele tuir: 1) Partidu vensedor bele buka halo koligasaun ho partidu boot ka ki’ik ruma hodi bele hetan maioria iha Parlamentu. Karik la hetan aliadu ruma, entaun susar mos atu aprova programa Governu nian, tanba impata hela de’it kuandu halo votasaun iha Parlamentu i, 2) Partidu vensedor bele forma Governu ida, maibe, tenki iha kapasidade lobbying makaas hodi hakail deputadus opozisaun nian ida ou rua hodi hola pozisaun abstein durante votasaun kona ba kestoens sira nebe’e bele provoka Governu monu. Por izemplu, iha votasaun kona ba “Orçamento Geral de Estato (OGE), kuandu deputadu opozisaun nian ida hola pozisaun abstein, mak OGE ne’e bele aprova ona. Bele dehan deputadu opozisaun ne’e Governu sosa kotu ona hodi la halo monu Governu. Deputadu ne’e hanesan osan mean ba Governu, tanba ninia votos abstein, a favor ka kontra, sempre fo impaktu ba Governu. Solusaun ida ikus ne’e bele dehan perigozu oituan, basaa, iha rai sira korrupsaun makaas, deputadu ne’e bele hetan “suborno” (suap) husi Governu. Maibe iha rai sira korrupsaun la/ladun iha, deputadu ne’e bele la simu “suborno” ruma, maibe nia tau kondisaun ruma ba Governu. Por izemplu, nia husu Governu loke estrada, harii eskola, hospital, merkadu ho buat seluseluk iha ninia distritu.


Sa ida mak deputadu ne’e sei manan? Klaru, deputadu ne’e, ninia partidu sei kritika, izola ou hasai nia husi partidu tanba, nia la kumpri disiplina partidu nian, maibe nia sei manan konfiansa povu husi ninia distritu, tanba ninia politika halo distritu sai diak. Kuandu loron ida nia hakarak kandidata an ba prezidenti Kamara Munisipal ou administrador Distritu, maski hanesan independente, ema sei hili nia du ke sira nebe’e reprezenta partidu. Tanba nia hatudu tiha ona ninia vontade diak hadi’a ninia distritu.


Quinta opsaun, partidu vensedor manan elesoens ho maioria simples/relativa (49% ou menos husi ida ne’e), bele forma Governu minoritário ida. Governu ne’e legal i legitima, maibe la diak, basaa, nia sei monu iha fulan rua ou tolu nia laran. Monu tanba, partidu opozisaun sira mak kontrola Parlamentu. Sira sei vota kontra tomak programa Governu nian. Nudar izemplu, kuandu maioria deputadus sira vota kontra OGE dala rua, mak Governu ne’e monu kedas tuir Konstituisaun nia haruka. Tan ne’e, maski Governu minoritariu ida legal, jeralmente, PR la sei husik partidu vensedor ida hanesan ne’e forma Governu ida. Partidu vensedor ho maioria simples/relativa ne’e mos la sei sisi makaas atu forma Governu minoritariu ida, basaa, nia hatene ona sei monu. Obriga an forma Governu ida hanesan ne’e i kuandu monu tenki konvoka eleisoens antesipadas.


Governu ida monu depois de ukun tinan tolu ka hat sei diak liu Governu ida foin ukun fulan rua ka tolu monu. Basaa, ita foin halo eleisoes ida gasta osan barak, dala ruma, balu envolve tan iha violensia nebe’e provoka vítimas barak, foin fulan rua tolu de’it, ita seidauk haluha ou hadi’a efeitus negativos husi eleisoens ne’e nian, agora ita tenki halo fali tan eleisoens ida. Ninia kustus politikus ho ekonomikus boot tebes.


Governu minoritariu ida la monu bainhira partidu sira iha opozisaun mos la entende malu i la vota hamutuk kontra programa Governu nian iha lejislasaun ida nia laran tomak. Raro (jarang) tebes hetan opozisaun sira la entende malu. Tanba poder, dala barak, fasil liu ba partidu opozisaun sira halai hamutuk du ke fahe malu. Hanesan izemplu iha TL, la susar CNRT, koligasaun ASDT-PSD ho PD halai hamutuk hodi hasoru Fretilin.


Fila fali ba eleisoens lejislativas iha Israel, nune’e mos iha TL, tanto Kadima komu Fretilin, partidu rua ne’e manan eleisoens, maibe la hetan maioria absoluta (50% + 1) hodi forma kedas/mesak Governu ida.


Israel ninia total numeru deputadus hamutuk na’in 120 i TL nian total numeru deputadus hamutuk na’in 65. Atu hetan 50% + 1 iha Israel, nu mínimu, tenki hetan deputadus na’in 61. Enkuantu iha TL, atu hetan 50% + 1, nu minimu, tenki hetan deputadus hamutuk na’in 33.


Partidu Kadima (centro), nebe’e lidera husi Tzipi Livni, iha eleisoens fulan Fevereiru liu ba, manan ho maioria simples, tanba hetan de’it deputadus hamutuk na’in 28. Numeru ida, dok tebes husi 61, hodi garante maioria parlamentar. Iha TL, iha eleisoens lejislativas (30/06/07), Fretilin (centro eskerda) mos manan eleisoens ho maioria simples, tanba konsegue hetan de’it deputadus hamutuk na’in 21 (29%), numeru ida dok husi 33 hodi garante maioria parlamentar.


Tantu iha Israel komu iha TL, tanba la iha partidu ida manan ho maioria absoluta (50% + 1), partidu sira iha hipoteze atu forma gorvernu, hanesan 1º ho 2º vensedor, ida-idak tenki buka hakbesik an ba partidu seluk hodi buka forma maioria parlamentar ida. Kuandu hetan ona maioria parlamentar mak foin bele forma Governu.


Prezidenti Republika Israel, Shimon Peres nune’e mos prezidenti RDTL, Ramos Horta, haree ba rezultadu eleisoens nian, sira halo apelu ba partidus “mais votadus” (hetan votos barak liu iha eleisoens) sira atu forma Governu koligasaun alargada ou Governu de Uniaun Nasional ida.


Iha Israel, Shimon Peres, husu ba Kdima ho Likud, nudar 1º i 2º vensedor eleisoens, atu hamutuk ho partidu balu tan forma Governu koligasaun ida. “Hau sei hakaas an makaas hodi convence partidu rua ne’e serbisu hamutuk hodi forma Governu alargdu ho estável ida, dehan Shimon Peres (Agence France Press, 20/02/09, Jawa Pos, 21/02/09). Alargadu signifika sei presiza tan partidu balu, tanba sira rua mesak (55 deputados) la hetan maioria parlamentar. Nune’e mos iha TL, Horta, halo apelu ba partidu politikus sira nebe’e hetan votus barak: “Hau fanu partidu politiku hothotu nebe’e hetan votos barak, Fretilin, CNRT, koligasaun ASDT-PSD ho PD hodi forma koligasaun boot ida. Ninia modelo la’os partidu nebe’e manan eleisaun automatikamente sai xefe Governu, maibe PM bele mai husi forsa seluk” (EFE, 05/07/07).


Hafoin sorumutuk ho negasisaun barak entre Livni ho Netanyahu (ho ou la ho mediasaun Shimos Peres nian), la hetan akordu ruma atu forma koligasaun hamutuk. Ho nune’e, depois de prezidenti Shimon Peres rona partidu politikus hothotu, nebe’e iha reprezentasaun iha Parlamentu nia opiniaun, nia konvida Netanyahu, nebe’e hetan apoiu barak liu hodi forma Governu.


Nusa mak la konvida Kadima nebe’e manan eleisoens? Haree ba rezultadu eleisoens, Kadima la hetan kadeira naton atu assegura maioria iha Parlamentu. Kadima ninia deputadus hamutuk na’in 28. Partidu sira eskerda hamutuk ho arabi-israel nian, nebe’e besik liu ba Kadima, sira hotu nia kadeira tau hamutuk hetan de’it 55, dok liu husi 61, numeru nebe’e hanesan kondisaun minima hodi garante maioria parlamentar ida. Enkuantu Likud (direita) ho apoiu partidu sira ekstrema direita (religiosos ho ortodoksos) nian, sira hotu nia kadeira tau hamutuk hetan 65, kadeira ida barak liu ona 61. Maski nune’e, Netanyahu buka ko’alia nafatin ho Kadima no Trabalhista atu halo parte ninia Governu, maibe Tzipi Livni ho Ehud Barak (prezidenti partidu Trabalhista) prefere sai opozisaun du ke halo parte Governu direita ida, nebe’e Benjamin Netanyahu mak nudar PM. Netanyahu hakarak partidu rua ne’e halo parte ninia Governu, ho razaun hanesan nia rasik afirma: “Mai ita hamutuk hodi assegura futuro Israel nian. Hau hato’o ba elementus faksaun hothotu nian…hodi tau ses politika ba sorin no tau uluk interesse nasaun nian nudar prioridade” (Koran Tempo, 23/02/09). Maski Netanyahu tenta makaas atu forma Governu alargada ida, iha nebe’e, inklui Kadima ho Trabalhista hotu iha laran, maibe la konsegue tanba razoens balu nebe’e ikus mai ita sei haree.


Iha primeiru dia kuandu fo sai foufoun rezultadu eleisoens, prezidenti Kadima nian, Livni dehan nune’e: “Povu hili ona Kadima, … presizu respeita eleitores sira nian escolha, respeita desizaun urna nian, ita hamutuk forma Governu Unidade Nacional ida iha Kadima nia okos” (Correio da Manha, 11/02/2007).


Livni hanoin fasil pressiona Netanyahu ho partidu sira direita hodi simu Governu Koligasaun ida nebe’e lidera husi nian. Maibe tanba la hetan apoiu naton, halo Livni ninia “bargaining power” sai fraku. Susar obriga partidu sira direita atu simu Livni sai PM. Ikus mai Livni hakiduk oituan husi ninia “exigência” (tuntutan). Nia simu halo koligasaun ho Likud ho kondisaun, partidu Yisrael Beiteinu (ekstrema direita), terseiru vensedor eleisoens, labele tama Governu i halo rotasaun ba postu PM nian. Livni sai PM tinan rua depois tinan rua seluk Netanyahu mak PM fali. Maibe Netanyahu ho ninia aliadu, Lieberman la simu Livni nia kondisaun, ho razaun “rotasaun sei hamosu de’it Governu namalaik ida“ (Jawa Pos, 20/02/09).


Ikus liu, Livni la sisi makaas ona fatin ho halo parte koligasaun, tanba partidu sira direita mesak de’it hetan ona maioria parlamentar. Livni hili sai opozisaun. “Hau hakarak governa Israel ho dalan nebe’e hau fiar, hodi dudu prosesu paz ba oin tuir prinsipio estadu rua ba nasaun rua. Koligasaun alargada ida la iha ninia benefisiu se la rekuinese prinsipiu ne’e”, dehan Livni (Sydney Morning Herald, 21 ho 23/02/09; Koran Tempo, 23/02/09).


Hanesan mos Livni, Ehud Barak lakohi halo parte Governu koligasaun Netanyahu nian tanba, Trabalhista mos defende negosiasaun ho Palestina. Kadima ho Trabalhista hakarak dudu prosesu paz ba oin hodi harii Estado rua (Israel ho Palestina) nebe’e bele moris hamutuk iha paz nia laran. Enkuantu partidu sira direita, nebe’e Likud halo parte, kontra harii Estado Palestina ida (Koran Tempo, 23/02/09).


Iha TL, Mari Alkatiri, sekretariu-jeral Fretilin nian, iha ninia primeira reaksaun ba rezultadu eleisoens, nia dehan: "Maioria husi povu sei konfia iha Fretilin hodi ukun tan tinan 5 mai … Ami la sei buka halo negosisaun ruma ho CNRT. Ami nia oda matan taka ona ba CNRT… Ami hahu ona ko’alia ho partidu sira oposizaun, hanesan ASDT-PSD ho PD hodi forma Governu koligasaun ida, wainhira CNE fo sai rezultadu final …” (EFE, 05/07/07).


Alkatiri, kala, la hanoin hetan ninia hahalok iha tinan hat nia ukun, iha nebe’e insulta partidu sira opozisaun ho nia lider sira ho lia-fuan insultuzu oioin. Nia hanoin fasil dada ASDT-PSD ho PD ba Fretilin nia sorin hodi forma Governu ida no dudu CNRT ba opozisaun. Maibe Alkatiri hanoin sala. Koligasaun ASDT-PSD la husik Alkatiri dada iis, Mario Carrascalão nudar xefe koligasaun ASDT-PSD hatan kedas ba Alkatiri: "imposivel ko’alia kona ba koligasaun ida ho Fretilin tanba ami nia prinsipiu ideolojiku politiku la hanesan liu kedas. ASDT-PSD sosialista demokrata, enkuanto Fretilin sosialista-marxista” (EFE,05/07/07).


PD la taka oda matan. La’Sama, prezidenti PD nian, hatudu pozisaun fleksivel no implisitamente simu Fretilin halo parte Governu koligasaun ida.“ Ba interesse unidade nasional ho estabilidade Timor nian” dalan diak liu mak forma “Gabinete Unidade Nasional ida nebe’e sei hakotu lalais terus ho mukit populasaun sira sei moris iha kampu refuziadus iha Dili ho fatin seluk iha Timor laran. Ne’e la’os atu fa’an ami nia votus, maibe hodi rezolve krizi nasional”, dehan La’Sama (EFE, 05/07/07). Maski defende Governu uniaun nasional ida iha nebe’e Fretilin, CNRT, ASDT-PSD ho PD tama hotu iha laran, maibe ho kondisaun ida Xanana Gusmão mak sai PM (EFE, 06/07/07). Pozisaun ida hanesan partidu Yisrael Beiteinu (extrema Direita), Avigdor Lieberman nian, terseiru vensedor iha Isreal, nebe’e hakarak Kadima halo parte Governu koligasaun maibe Benjamin Netanyahu mak PM.(...)


Iha TL, personalidades barak hanoin hanesan mos PD, konsidera prudente liu hatama Fretilin mos ba koligasaun ho razaun hodi hasai lalais Timor husi krizi nebe’e la’o ona tinan ida resin. Maibe susar atu hamutuk tanba Timor oan sira la fiar malu. "Ami la fiar malu i diverjensias entre Timor oan sira klean tebes, dehan La’Sama (UOL Media Global, 06/07/07). Diverjensia nebe’e La’Sama temi refere ba diverjensia entre politiku sira jerasaun tuan nian hanesan Mari Alkatiri, Xanana Gusmão, Xavier do Amaral ho Mario Carrascalão. Jerasaun tuan sira ne’e susar entende malu tanba sira nia diverjensia balu hahu kedas husi 1975 mak mai.

Karik Alkatiri mak hatene haraik-an i iha relasaun diak ho partidu opozisaun hothotu, la susar hetan apoiu husi PD, Undertim ho ASDT, tanba partidu sira ne’e sei bele dehan familia ida ho Fretilin. Fretilin uluk sei hanesan movimentu nebe’e funu ba ukun-an, maioria fundadores ho membrus husi partidu sira ne’e mos halo parte hotu Fretilin. Mezmu depois de harii partidu ketak, valores ho prinsipius ideolojikus nebe’e sira defende, barak sei reflekte eskerda ka sentru eskerda nian. Enkuanto PSD, bele dehan, partidu sentru direita. Lideransa PSD nian, maioritariamente mai husi UDT, partidu direita ida. Mário Carrascalão fundador PSD, uluk mos fundador UDT nian iha 1974 i halo parte hotu lideransa partidu ne’e nian. Nune’e, susar oituan ba PSD ho Fretilin forma koligasaun ida hamutuk. Maibe iha politika, buat hothotu bele, dala ruma buat sira labele nian mos sai bele.

Kona ba CNRT, karik Alkatiri la arrogante i la buka marjinaliza Xanana ho partidu opozisaun sira husi prosesu politika ho rekonstruzaun Timor nian, provavelmente, partidu CNRT mos la mosu. Bele dehan, CNRT rasik sei familia ida ho Fretilin i la susar forma koligasaun ida entre partidu rua ne’e, tanba Xanana, prezidenti CNRT, mai husi Fretilin. Maibe diverjensia nebe’e klean liu ona entre lideransa Fretilin ho Xanana tanba arrogansia Alkatiri nian nune’e mos kestoens de prinsipius ideolojikus balu fahe sira makaas. Hanesan mos Likud ho Kadima, lakohi hamutuk tanba iha diverjensia de prinsipius makaas entre partidu rua ne’e. Ariel Sharon (ex-PM Likud) sai husi Likud i harii fali Kadima iha fulan Novembro 2005 depois de iha diverjensia makaas entre nia ho lider sira ekstremista iha partidu laran kona ba dada forsa Israel husi Palestina ho halo negosisaun da paz ho PLO (Palestine Liberation Organization). Enkuanto Xanana sai husi CCF (Comite Central da Fretilin) ou Fretilin iha fins anos 80 nudar estratejia Resistensia nian ida i xefia fali CNRM (Conselho Nacional da Resistência Maubere), orgaun ida hamrik iha partidu hothotu nia leten (supra-partidaria) hodi hametin unidade nasional hodi funu hasoru okupasaun militar indoneziu iha TL. Depois de TL manan iha referendum ba ukun an iha Agustu 1999, Xanana la fila ba Fretilin. Husi tinan 2000 mai oin, hahu mosu diverjensia entre Fretilin radikal sira, liliu grupo Mari Alkatiri nian ho Xanana Gusmão depois de Fretilin dada an husi CNRT (Conselho Nacional da Resistência Timorense), orgaun nebe’e troka fali CNRM iha tinan 1998. Diverjensia sai makaas liu tan kuandu Fretilin halo politika iha TL hanesan partidu uniku: “Partidu iha poder [Fretilin] fo konseitu revolusionariu ida: Governu mak Partidu, Estado mak Partidu! Partidu nebe’e kaer poder tenki ser forti, basaa, ho nune’e de’it mak bele halo Governu forti, i ho nune’e de’it mak halo Estadu forti! I Partidu nebe’e bele kaer ukun mak Fretilin de’it, tanba istorika”, dehan Xanana (Xanana Gusmão, TEORIA DAS CONSPIRAÇÕES, 2006). Kritika Xanana nian ne’e refere ba komportamentu politika Fretilin nian nebe’e domina buat hothotu i la valoriza forsas politikas ho sosiais seluk durante ninia governasaun. Krizi politika ho militar iha 2006 halo diverjensia entre Fretilin ho Xanana sa’e to’o tutun i nudar nia konsekuensia, Mari Alkatiri semo sai husi posto PM i halo rezistensia makaas liu tan hasoru Xanana. Mari Alkatiri monu depois de manifestasaun popular makaas hasoru nian kona ba Fretilin fahe kilat ba ema sivil, liu husi Rogério Lobato, vice-prezidente Fretilin nian hodi halakon líder sira opozisaun ho grupos petisionariu sira. Iha krizi 2006, Mari Alkatiri nudar PM, falta respeitu ba Xanana nudar PR ho komandante supremu forsas armadas nian, hodi haruka F-FDTL persegue grupus petisionarius sira sem kuinesimentu Xanana nian (Barbedo Magalhaões, Timor-leste, as crises e os protagonistas, 2006). Krizi 2006 hanesan katalizador ida aselera Xanana hodi harii partido CNRT iha tinan 2007 ho objektivu derrota Fretilin iha eleisoens hodi bele rezolve krizi oioin nebe’e Fretilin hamosu i lori hikas Timor oan sira ba iha moris hakmatek.

Kuandu Sharon harii Kadima, militantes ho simpatisantes barak husi Likud, inklui aktual PM Israel, Ehud Olmert ho aktual prezidenti Kadima, Tzipi Livni, tuir hotu militar veteranu ne’e ba Kadima. Iha TL mos nune’e, militantes ho simpatizantes Fretilin barak (inklui Fretilin Mudansa nebe’e moderadu) tuir hotu Xanana ba CRNT tanba sira lakon fiar ba lideransa Fretilin nebe’e radikal.

Liu loron hat, depois de haree CNRT mos halo movimentasaun makaas hodi forma aliansa ida, Mari Alkatiri dehan: “ Fretilin sei forma Governu ida. Lokraik ne’e ami sei halo konferensia ida hodi eksplika hakat sira nebe’e atu tuir hodi forma Governu ida tuir Konstituisaun i bazeia ba iha rezultadus eleisoens parlamentares nian” (EFE, 09/07/07). Ba Alkatiri so Fretilin de’it mak bele forma Governo ida tuir Konstituisaun, enkuantu sira seluk mak forma la tuir Konstituisaun. Maibe artigu 106º, Konstituisaun RDTL la hakerek hanesan Alkatiri ninia hanoin nebe’e ko’alia momos “aliansa ho maioria parlamentar” mos bele forma Governu.

Iha TL, prezidenti Ramos Horta halo esforsu makaas hodi forma Governu uniaun nasional ida. Nia husu ba partidu hothotu: "Atu diak ba estabilidade, paz, armonia ho rekonsiliasaun nasional, hau husu ba hothotu hodi forma Governu Uniaun Nasional ida, tanba realidade hatudu katak partidu ida de’it labele ukun diak rai ne’e” (EFE, 21/07/07).

Husi hahu kedas Fretilin taka oda matan ba CNRT, la hanesan ho Likud nebe’e la taka oda matan ba Kadima, halo CNRT mos la loke janela hodi fihir Fretilin. Karik Alkatiri kuidadu ho nia lia-fuan “Fretilin nia oda matan taka ona ba CNRT”, dala ruma CNRT sei hanoin hatama hotu Fretilin iha aliansa laran. Maibe arrogansia politika Fretilin nian nebe’e mai husi Alkatiri nia ibun halo CNRT mos taka oda matan.

Depois de CNRT konvense koligasaun ASDT-PSD ho PD hodi forma “Aliança para Maioria Parlamentar” (AMP) ida, halo Fretilin lakon terreno hodi lidera koligasaun maioria ida. Ho formasaun AMP, orgaun kolektiva ne’e hasai komunikadu ida: “Hafoin haree ba rezultadu eleisoens ho estuda posibilidade forma Governu foun ida ba tinan lima mai, ami disidi ona hamutuk ho hamosu koligasaun ida hodi forma Governu foun ida” (EFE, 06/07/07). Xanana nebe’e nudar kandidatu AMP nian ba PM reforsa tan sira nia pozisaun hodi dehan: “Fretilin manan ona eleisoens, ita hotu rekuinese ida ne’e. Ita la dehan kontrariu, maibe ita hein hodi konsidera katak Fretilin iha de’it maioria simples, nune’e bele entende, atu diak ba estabilidade rai frágil ida ne’e, ami nia proposta” (EFE, 06/07/07).

Koligasaun entre partidu hat ne’e, hetan ona maioria iha Parlamentu ho numeru deputadus hamutuk 37, barak liu 33, numeru nebe’e hanesan kondisaun minima hodi hetan maioria parlamentar i bele forma Governo maioritariu forte ho estável ida.

Ho hakat politik nebe’e AMP halo, la iha dalan seluk ba Fretilin. Fretilin nebe’e sinti odan matan hothotu klot ona ba nian atu forma Governu koligasaun ida, nia la’os de’it loke nia oda matan, maibe loke nia didin hotu ba CNRT. Alkatiri troka nia estratejia, dudu ASDT-PSD ho PD ba opozisaun i hakarak hako’ak fali CNRT. "CNRT hanesan mos partidu seluk ida, se ohin ami loke an ba partidus hothotu, ami labele taka oda matan ba ida. Sa tan ba ida hetan segundo lugar… Aliansa ida entre Fretilin ho CNRT mesak hetan ona maioria absoluta. Se ida ne’e kontribui ba estabiliza Timor, hau hanoin dalan ida ke bele tuir”, dehan Alkatiri (Lusa, 06/07/07). Los duni, Fretilin ho CNRT mesak hamutuk, sira rua iha ona deputadus hamutuk 39, numeru ida barak liu 33 hodi hetan maioria parlamentar i numeru ida nebe’e boot liu 37 AMP nian. Tanba Fretilin loke ona oda matan ba negosisaun, CNRT mos loke nia janela ba Fretilin. Xanana hakerek ba prezidenti Fretilin, Lu-Olo: “Nudar aliansa, ami prontu konsidera inisiativas entendimentu nian [ho Fretilin], maibe tenki promove husi prezidenti da Republika, hodi garante unidade ho estabilidade Nasional” (Luza, 10/07/07). Iha pratika la hetan entendimentu ruma. Susar tebes hatama leaun ho lafaek hamutuk iha ka’ut ida. Tanba sira rua la’os han malu de’it, maibe, hothotu hadau malu sai jigante, hothotu hakarak sai PM. Kestoens nebe’e sira fila ba mai diskuti la’os prinsipius, maibe poder. La hanoin oin-sa rai ne’e atu diak. Ironiku liu tan mak sei dehan ukun fulan rua tolu monu mos la buat ida, hanesan prezidenti Fretilin, Lu-Olo dehan : "Fretilin mak ukun rai ne’e i agora prontu atu kontinua serbisu ida ne’e tuir rezultadu eleisoens nian, maski Governu ne’e sei monu iha fulan rua ou tolu nia laran”(EFE, 19/07/07). Maibe kala arrepende ou oinsa, tenta hadi’a fali nia lia-fuan hodi dehan ba interese nasional, sira “prontu atu partisipa iha Governu unidade ida, maibe tanba Fretilin mak manan eleisoens, postu primeiro-ministro nian tenki okupa husi ema ida mai husi Fretilin. Ne’e hanesan buat ida labele bok"(EFE, 19/07/07).

AMP la hakruk ba kondisoens Fretilin nian hodi defende nafatin Xanana mak sai PM. Tanba parte rua ne’e la iha ida atu hakruk ba seluk, mak prezidenti Horta husu ba Fretilin ho AMP, la’os atu halo rotasaun ba fatin PM iha Governu koligasaun ida nia laran hanesan Kadima husu ba Likud, maibe Horta husu forma Governu rotativu ida, Fretilin ukun tinan rua ho balu, depois tinan rua ho balu seluk AMP kaer fali Governu (Lusa, 24/07/07). AMP la simu Horta nian proposta.

Tanba sinti izoladu liu ona i “bargaining power” la iha ona, tentativa ikus liu nebe’e Fretilin halo mak mosu ho proposta ida hanesan Alkatiri defende atu“forma Governu independente [PM mai husi ema indepenente] ida ho vice-PM rua, ida husi Fretilin mak hili i seluk husi partidu sira opozisaun” (Lusa, 02/08/07). AMP la simu ideia ida ne’e, parese hanoin susar ba ema independente ida atu xefia Governu ida forma husi koligasoens partidu politiku sira. Governu ida xefia husi ema independente sei rezulta de’it Governu fraku ida tanba la iha apoiu sufisiente husi forsa politika sira. Hanesan izemplu, Ramos Horta, nudar ema independente, nebe’e sai PM ba Governu Fretilin nebe’e la hetan suporta barak husi lideransa Fretilin ho CCF. Nia la livre hola desizaun, basaa, partidu mak tenki desidi ba nian.

Negosiasoens entre partidu sira, ho ou la ho mediasaun prezidenti Republika nian, la’o besik semana rua la iha rezultadu ruma. AMP kaer metin nia pozisaun e Fretilin mos la hakiduk. Fretilin hakarak hakat ba oin hodi forma Governu minoritario ida.

Horta, nudar prezidente, nebe’e Konstituisaun fo poder ba nian hodi garante estabilidade ho unidade TL nian, aumenta nia pressaun ba Fretilin hodi simu Governu koligasaun ida xefia husi AMP. "Ba interesse povu nian no estabilidade ho uniaun nacional, hau uza prerrogativa konstitusional hodi halibur partidu politikus hodi ita koalia i forma Governu diak ida, hodi serbisu ba povu rai ne’e”.. “Hau husu uniaun nasional ida, Governu de Grande Inkluzaun” … “Hau nia obrigasaun mak garante paz ho estabilidade rai ne’e nian i hau labele simu opsaun ida nebe’e hau kunsidera rahun, ho Fretilin forma Governu ida nebe’e dura fulan rua ou tolu i monu bainhira opozisaun maioria iha Parlamentu taka dalan ba ninia politika” (EFE, 12/07/07). Iha ne’e hatudu momos ona prezidenti Horta ninia intensaun la sei simu Governu minoritariu Fretilin nian ida, maibe nia hakarak Governu maioritariu ida hodi garante estabilidade institusional. Ne’e signifika Fretilin nia laran metin atu forma mesak Governu ida ka lidera koligasaun maioria ida mos lakon ona.

Fretilin la simu Horta nian ideias kona ba governu uniaun nasional mosu antes de eleisoens lejislativas kedas, hanesan ex-PM, Estanislau da Silva afirma: "Hau totalmente kontra ideia [Horta nian] ne’e, tanba nia [Governu Uniaun Nasional] kontra prinsipius demokrasia nian”…”oho prosesu pluralidade politika iha rai jovem ida hanesan TL… Se los mak atu sai opozisaun iha Parlamentu? Nia lojika iha nebe’e? Hau hanoin la iha liu kedas” (EFE, 22/06/07). Estanislau iha razaun, maibe kuandu haruka Fretilin ba opozisaun atu demokrasia labele mate, Fretilin prefere tama iha koligasaun i la interesse ona ho demokrasia nia moris. Sorti AMP salva tiha demokrasia i bazeia ba artigu 106 Konstituisaun RDTL ho sistema “reprezentasaun proporsional”, AMP dudu tiha Fretilin ba opozisaun, independentemente se Fretilin hala’o nia papel nudar opozisaun diak ou lae, ne’e kestaun seluk ida. Maibe tenki rekuinese katak, Fretilin halo ona opozisaun forte ida, forte husi parte pozitivu ho negativu hotu. Pozitivu hanesan buka kombate makaas KKN i negativu hanesan la rekuinese ho la koopera ho Governu AMP i kontinua bosok militantes partidus nian dehan desizaun prezidenti Ramos nian ilegal.

AMP nebe’e sinti iha anin leten tanba prense ona kriteriu hodi forma maioria parlamentar, la interesse ona ho Fretilin i halo presaun nafatin ba PR. Ami iha maioria iha Parlamentu. Ne’e signifika ami konta ho kondisoens hodi garante estabilidade ba Governu ho nasaun” … “Se prezidenti bolu ami, ami sei rona. Maibe la kompete ba nia [prezidenti] hodi konvense partidu politikus hothotu no obriga sira hodi forma Governu ida”, dehan Zacarias da Costa, lider AMP ida husi partidu PSD (EFE, 12/07/07). Ikus mai, Cecilio Caminha, membro CNRT nian ida, reforsa tan Zacarias: “Ohin, ami hotu, membrus AMP, hili ona Xanana Gusmão ba primeiro-ministro no Fernando La’Sama de Araújo ba prezidenti Parlamentu, hein hodi prezidenti Ramos Horta, hatudu ami, iha semana mai hodi forma Governu ida la ho partisipasaun Fretilin nian” (EFE, 28/07/07). Tanba Fretilin la hakruk ba AMP, mak AMP mos la halo hanesan Likud, nebe’e halai tuir nafatin Kadima, maibe sira husik tiha Fretilin ba kotuk, ba iha opozisaun.

Sinal ba AMP forma Governu sai naroman liu tan iha loron 30 fulan Juillu, iha nebe’e, bloku AMP ho partidu opozisaun balu, hili La’Sama ba prezidenti Parlamentu Nasional ho votos hamutuk 41. Tanba “deseperado” ou tanba la hatene interpreta artigus Konstituisaun nian, Alkatiri dehan: “Aliansa ida so bele forma antes de eleisoens, se halo depois de eleisoens ne’e hanesan manipulasaun demokrasia ida" (EFE, 06/07/07). Depois de fulan ida, iha loron 2 fulan Agustu, Alkatiri haree iha sinal prezidenti Ramos Horta bolu AMP forma Governu maioritariu ida, bazeia ba rezultadu eleisaun prezidenti Parlamentu nian, Alkatiri reforsa tan ninia interpretasaun nebe’e sala ba Konstituisaun RDTL hodi dehan: “voto nebe’e Konstituisaun ko’alia mak voto popular iha eleisoens direktas, la’os voto deputadus sira nian” … AMP la iha ninia existência legal. Koligasoens rua nebe’e aprezenta ona durante eleisaun mak Aliansa Demokratiku KOTA/PPT ho ASDT/PSD”… So koligasoens sira ne’e mak Tribunal de Rekursus ho Komisaun Nasional de Eleisoens rekuinese” … Kaer metin ambiguidade [expressão] “aliansa ho maioria parlamentar [iha artigu 106º Konstituisaun] hodi manipula voto popular no evita partidu nebe’e hetan votus barak liu atu bolu ba forma Governu” … “Iha pratika konvida ona partidu ida hetan segundu lugar hodi forma Governu. Ne’e inkonstitusional” (Lusa, 02/08/07). Alkatiri kunfundi nafatin eleisoens lejislativas ho prezidensiais. Iha eleisoens prezidensiais, nebe’e uza sistema “maioritário” mak “vencedor” haree los de’it ba votu popular iha eleisoens direktas. Maibe iha eleisoens lejislativas, nebe’e uza sistema “reprezentasaun proporsional”, la’os haree de’it ba votu popular iha eleisoens direktas maibe mos, i liliu, haree ba partidu ka aliansa nebe’e hetan maioria iha Parlamentu.

Iha loron 8 fulan Agustu tinan 2007, depois de prezidenti Ramos Horta fo sai ba publiku bolu AMP forma Governu i hatudu Xanana sai PM, Mari Alkatiri dehan aliansa nebee forma husi Xanana “tenki deklara invalida, tanba nia forma depois de eleisoens, la’os antes” (AFP, 06/08/07). Depois Alkatiri mos kritika prezidenti Horta nia desizaun hodi dehan: “Desizaun prezidenti nian la bazeia iha Konstituisaun. Prezidenti la respeita buat nebe’e povu hein hela depois de eleisoens” (Reuters, 06/08/07). Aliansa Demokratika (AD) KOTA/PPT nebe’e hanesan aliadu fiel Fretilin nian, liu husi Manuel Tilman, nudar xefe AD nian, mos kritika desizaun Horta nian, maibe, implisitamente, nia rekuinese desizaun ne’e mak bele fo estabilidade governativa. Hatudu AMP forma Governu “bele iha desobendiencia sivil i ida ne’e sei bele hamsou instabilidade sosial. Desizaun [Horta] nian ne’e bele fo estabilidade institusional [govenativa], maibe sei kria instabilidade sosial i ida ne’e hanesan buat ida la diak ba rai ne’e”, dehan Manuel Tilman (Lusa, 06/08/07).

Desobediensia sivil nebe’e deputadu Manuel Tilman preokupa, to’o ohin loron la akontese, buat ne’e prova mak Alkatiri dehan “la sei iha paz” iha Timor kuandu la hatudu Fretilin mak forma Governu. La iha paz ne’e reflekte ba violensia ho sunu uma nebe’e mosu iha fatin barak ita Timor laran depois de prezidenti Horta hatudu Xanana forma Governu. Alkatiri rasik rekuinese Fretilin sai frustrado tanba ne’e mak provoka violensia. "Militantes ho ema sira tuir Fretilin agora frustrado tanba manan eleisoens maibe la forma Governu, maibe hatudu fali partidu sira lakon hodi forma Governu. Neduni, sira kontra de’it buat nebe’e sira kunsidera la iha justisa” (EFE, 07/08/07). Alkatiri nega la’os lideransa Fretilin mak dudu militantes sira halo violensia, maibe husi ninia ko’alia, “… sira kontra de’it buat nebe’e sira kunsidera la iha justisa”, nota katak, lideransa Fretilin la halo esforsu makaas hodi evita violensia. Kontra injustisa la’os kontra liu husi dalan violensia nian, tanba violensia hanesan faktur ida husi faktor barak hodi halakon paz.

Se ita haree ba eleisoens iha Israel nian, Netanyahu ho Likud mos forma koligasaun ida depois de eleisoens. Antes eleisoens la iha koligasoens ruma entre partidu politikus sira iha Israel. Nem uniku partidu nebe’e la halo parte Governu Netanyahu nian dehan koligasaun Likud ho partidus direita sira seluk nian ilegal ho inkonstitusional. Sira mos la sinti frustradu ba buat ruma, tanba sira hatene koligasaun antes ho depois de eleisoens, mesak legal hotu. Prezidenti Shimon Peres nebee halo parte Kadima mos hatene ida ne’e i la iha opsaun seluk ba nian hodi bolu Netanyahu forma Governu, tanba ex-PM Likud ne’e, hetan ona maioria iha Parlamentu. Fretilin sai frustradu tanba ninia ignorasia rasik. (...)


Fretilin mak uluk hakerek Konstituisaun RDTL nian ho kontribuisaun boot husi Mari Alkatiri. Ita la hatene, sira uluk hakerek ho kakutak nabilang ou kopia los de’’it husi Portugal nian. Tanba buat ida kopia de’it ema seluk nian, dala ruma, bele halo ita mos la percebe diak i mos bele interpreta sala. So ema na’in mak hatene interpreta buat nebe’e sira hakerek.

Ema hotu hatene, Konstituisaun RDTL nian la iha diferensa boot ho Portugal nian. Ema konstitusionalista portugues ida, Prof. Pedro Bacelar de Vasconcelos, nebee tulun hakerek Konstituisaun RDTL nian hatan ba Fretilin ho Alkatiri nune’e: “La tama ulun tau iha kauza legitimidade konstitusional ho politika husi Governu ida forma husi aliansa maioritária opozisaun nian” (Diário Digital/Lusa, 08/07/2007). Konstitusionalista ne’e dehan TL kaer “sistema proporsional”, la’os “sistema maioritário”. Karik “sistema maioritário”, Fretilin iha razaun, katak sira mak manan, maibe “sistema proporsional” la funsiona hanesan Alkatiri interpreta ne’e. Ema matenek na’in seluk husi Australia, Damien Kingsbury, professor associado Universidade Deakin, Melbourne reforsa tan Prof. Bacelar hodi dehan: “Alkatiri kala mehi hela i hanoin partidu ida ho minoria iha Parlamentu iha lejitimidade politika boot liu kompara ho koligasaun maioritaria ida” iha Parlamentu, hakerek Kingsbury iha debate husi rede ETAN nian. Damien mos rekuinese, artigu 106 nebe’e dehan: "O primeiro-ministro é indigitado [indicado] pelo partidu mais votadu ou pela aliança de partidos com maioria parlamentar e nomeado pelo presidente da República, ouvidos os partidos políticos representados no Parlamentu nacional", husik fatin ba “Governu minoritariu ida hanesan iha kualker demokrasia parlamentar”, maibe mos “iha artigu nee ko’alia momos kona ba alternativa koligasaun ida”.

Karik Alkatiri ninia lojika ne’e los, entaun la presiza halo votasaun ruma iha Parlamentu, tanba Fretilin ninia vitoria garantidu tiha ona ho numeru 21. Numeru 21 hanesan numeru majiku ida ba Alkatiri, la’os boot liu de’it numeru sira 20 mai okos maibe mos boot liu numeru 22 ba leten. Ho lia-fuan seluk, numeru 21 ne’e bele halo lakon numeru sira 20 mai kraik, maibe mos halo lakon numeru sira 22 ba leten.

La presiza eskola hodi hatene numeru 21 ki’ik liu numeru 22, sa tan numeru 37 ka 44. So ema ida fraku tebtebes iha aritimetika ou la hatene sura liu kedas mak bele hanoin numeru 21 boot liu 37 ou 44. Alkatiri haluha buat ida, votasaun ba OGE ho selu-seluk tan iha Parlamentu, nebe’e atu hametin ka hamonu Governu ida, la’os submete ba votu direitu popular nian, maibe votu deputadus sira nian. Iha ne’e mak Alkatiri ninia lojika faila total.

Prezidenti Ramos Horta hatene sura. La haree numeru 21 hanesan majiku ida nebe’e boot liu numeru 37 i, bazeia ba eleisaun prezidenti Parlamentu Nasional nian iha loron 30 fulan Juillu, iha nebe’e, La’Sama manan ho votus hamutuk 41, Horta la laran rurua i, fo sai ofisialmente ba publiku, fo fiar ba AMP forma IV Governu Konstitusional. "Hau disidi ona bolu aliansa forma Governu tanba momentu ne’e nia reprezenta opiniaun politika maioria nian. La’os tempu nem okaziaun ba ita atu halo tan eleisoens [antecipadas] dala ida. Maiorias ho minorias iha Parlamentu, la’os iha dalan tanba povu fo ona poderes ba deputadu sira hodi reprezenta sira”, dehan Horta (Lusa, 06/08/07).

Iha Israel, prezidenti Shimon Pires la hein to’o semana rua hodi fo fiar ba Netanyahu forma Governu, enkuantu iha TL, prezidenti hein to’o fulan ida resin foin fo fiar ba Xanana forma Governu. Basaa, iha Israel ema hatene oin-sa sistema “reprezentasaun proporsional” ida funsiona, enkuantu iha TL, partidu nebe’e mak hakerek ho aprova Konstituisaun RDTL mak buka interpreta arbiru tuir nia gostu hodi difikulta formasaun Governu ida.

Prezidenti Ramos Horta la bolu Fretilin forma Governu hanesan mos Shimon Peres la bolu Kadima tanba, Fretilin ninia deputadus hamutuk na’in 21 de’it. Tau tan deputadu na’in rua husi AD KOTA/PPT foin hetan 23. Partidu seluk hanesan UNDERTIM (deputadu 2), PUN (deputadu 3), PD (8), ASDT-PSD (11) ho CNRT (18 deputadus) lakohi forma koligasaun ida hamutuk ho Fretilin. Partidu 4 ikus ne’e hamutuk forma aliansa ida ho deputadus hamutuk 37, numeru nebe’e boot liu 33 hodi assegura maioria iha Parlamentu. Numeru ida prense kondisoens hodi forma Governu forte ho estavel ida.

Baziea ba artigu 106º RDTL no leno ba opsoens “reprezentasaun proporsional” nebe’e temi iha leten, bele dehan, Horta ninia desizaun fo fiar ba CNRT hodi forma Governu koligasaun la kontra lei. PR hili ona opsaun nebe’e diak liu hodi assegura Governu ida forte ho estavel. Desizaun nebe’e Horta hola hanesan mos desizaun nebe’e Shimon Peres hola iha Israel, hodi fo fiar ba Netanyahu, segundo vensedor eleisoens, hodi forma Governu, nebe’e hetan basa liman husi PM Ehud Olmert, aktual PM husi partidu Kadima. Olmert “elojia desizaun nebe’e prezidenti Shimon Peres hola ona hodi hatudu líder bloku konservador Likud, Benjamin Netanyahu, hodi forma Governu foun. Olmert dehan tan, Israel presiza duni Governu forti ho estável ida, hodi bele hasoru dezafius nebe’e rai ne’e hasoru” (Publico, 22/02/09).

Iha TL oin seluk, lideransa Fretilin, lakohi haree ba mekanizmu forma Governu iha rai nebe’e kaer sistema “reprezentasaun proporsional”, maibe haree liu ba poder i kuandu lakon poder halo reaksaun politika ho violensia hasoru desizaun prezidenti Horta nian. La’os de’it rame-rame kritika no akuza prezidenti Horta nian desizaun ilegal ho inkonstitusional, maibe balu, direita ou indireitamente, fanu mos militantes sira hodi halo violensia.

Enkuantu iha Israel, partidu Kadima nebe’e nudar partidu “mais votadu” i sai opozisaun simu ho laran tomak desizaun prezidenti Shimon Peres nian nebe’e hatudu partidu Likud, segundu vensedor hodi forma Governu koligasaun ida. Sira la hasai, nem unika lia-fuan hodi dehan desizaun Peres nian ilegal ho inkonstitusional. La halo ameasa ruma atu lori prezidenti Shimos Peres ba Tribunal, la halo ameasa ruma atu la koopera ho Governu koligasaun Likud nian, la ameasa abandona Parlamentu, la ameasa halo “marcha da paz” hodi hamonu Governu maibe sira prefere sai opozisaun ida forte, responsavel ho konstrutiva. Kadima simu ho laran tomak desizaun Shimon Peres nian tanba sira hatene desizaun ne’e iha baze legal ho konstitusional tuir sistema reprezentasaun proporsional nian. Preszidente Kadima, Tzipi Livni garante ba Netanyahu sira sei halo opozisaun ida ho responsabilidade tomak: "We will be a responsible opposition", dehan Livni (Sydney Morning Herald, 27/02/09). Lia-fuan hanesan ne’e, ita nunka rona husi lideransa Fretilin ruma nia ibun. Buat nebe’e ita rona mak ameasas oioin atu evita AMP labele forma Governu hanesan Mari Alkatiri dehan: Se ita la hatene halo leitura [Fretilin manan eleisoens] i tenta ho kustu hothotu dudu ses partidu mais votadu, entaun la sei kria paz iha rai ida ne’e” (Lusa, 06/07/07). Liu husi AFP, 06.08.09, Alkatiri kritika no ameasa nafatin AMP: Governu [AMP] ne’e “kompletamente ilegal no kontra ita nia Konstituisaun”. “Nune’e Governu ne’e la sei konta ho kooperasaun Fretilin nian tanba ne’e Governu ilegal ida (AFP, 06/08/07). Ikus liu Alkatiri ameasa ho abandona Parlamentu hodi dehan: "Governu Fretilin ida la sei hetan aprovasaun ninia programa iha Parlamentu [tanba Fretilin la hetan maioria iha Parlamentu]. Agora, Governu AMP nian la iha Parlamentu [tanba Fretilin sei abandona Parlamentu] hodi aprova programa" (Lusa, 02/08/07). Seluk ho ne’e, Fretilin la’os ameasa de’it ho la koopera ho Governu AMP nian, maibe ameasa atu lori prezidenti Republika ba iha Tribunal hanesan Lu-Olo dehan: Fretilin “la sei serbisu hamutuk ho Governu ida nebe’e simu posse la tuir Konstituisaun rai ne’e nian i sei halo funu hasoru nian liu husi dalan legais hadau poder nian” (Lusa, 06/08/07).

To’o ohin loron, kala, realiza de’it ameasa balu. AMP nia programa sempre hetan aprovasaun ho maioria absoluta. Fretilin la abandona Parlamentu i tuur nafatin iha nebaa hodi kritika ho vota kontra, hodi fo legalidade ho lejitimidade ba programa AMP nian. Tanba iha regras ho jogos demokratikas nian, vota kontra la signifika sasan ne’e ilegal, maibe signifika la aseita ou la konkorda. Tanba iha ne’e interese politika mak joga, la’os problema legalidade ho lejitimidade. Ameasa atu lori prezidenti Horta ba Tribunal mos la realiza to’o ohin loron. Tanba sira hatene momos, la’os problema legalidade ka konstituisionalidade mak sai “causa”, maibe problema politika hakarak kaer ukun ho sai PM mak hanesan “causa”. Tan ne’e, besik tinan rua ona, la brani nafatin hakat ba Tribunal hodi halo keisa, maibe uza fali hodi halo politika iha dalan, hodi lohi militantes ho simpatizantes ho objektivu hodi hatun Governu hodi sira bele kaer fali ukun. Fretilin hakarak halo justisa liu husi “marcha da paz”, la’os liu husi Tribunal, tanba sira hatene momos sira la iha razaun.

Ameasa balu, kala, realiza duni, hanesan provoka violensia ho sunu uma iha fatin balu iha distritus Dili, Baukau, Vikeke ho Lautem hodi justifika la iha paz iha Timor hanesan Alkatiri temi iha leten. Nune’e mos la koopera ho Governu AMP hanesan vota kontra tomak kualker proposta Governu nian, mezmu ke programa ne’e diak, i la mosu iha loron tomada de posse IV Governu Konstitusional nian.

Maski Fretilin to’o ohin loron afirma nafatin katak Governu AMP ilegal, maibe mundu tomak, liu husi ONU, sauda desizaun Horta nian hodi nomeia Xanana ba PM i rekuinese internasionalmente Governu AMP nian.

Ema sira independente ou aliadu Fretilin nian, nebe’e iha kuinesimentu diak kona ba Konstituisaun RDTL, mos fo hanoin la hanesan ho Fretilin. Hanesan mos Prof. Pedro Bacelar de Vasconcelos ho Prof. Damien Kingsbury koalia iha leten, prezidenti Tribunal de Recursos, Claudio Ximenes ho deputadu husi partidu KOTA, Manuel Tilman, mai reforsa tan de’it katak Fretilin la iha razaun kuandu kestiona inkonstitusionalidade aliansa ida forma depois de eleisoens. Iha reuniaun ida Claudio Ximenes ho kuadros Timor oan iha Lisboa, nebe deputadu Manuel Tilman, prezidenti partidu KOTA, aliado Fretilin nian, partisipa hotu, hatan ba pergunta ida husi partisipante reuniaun ida kona ba Governu AMP legal ka ilegal, Cláudio Ximenes lakohi hatan direitamente: “La’os nia mak hatan ou ko’alia kona ba kestaun ne’e, husik ba politikus sira mak hatan” (Timor Lorosae Nação, 15/05/08). Iha ne’e Claudio lakohi hatan direitamente, maibe iha 2007, depois de interpretasaun polemika kona ba inkosntitusionalidade aliansa ida forma depois de eleisoens, Claudio eksplika ba Jornal Expresso katak “Konstituisaun Timor nian simu juridikamente aliansas sira nebee halo depois de eleisaun. Buat nebee agora iha jogo la’os kestaun juridika, maibe kestaun politik” (Fórum Haksesuk, 15/07/2007). Maski Cláudio lakohi hatan direitamente iha reuniaun ne’e, maibe deputadu Manuel Tilman, nudar plitiku, simu dezafiu Cláudio Ximenes nian hodi hatan nune’e: "Governu ida ne’e [AMP] mak mais korrektu possível, maibe se monu provoka evolusaun diabolika ida iha panorama politika aktual … interpretasaun polemika kona ba inkonstitusionalidade hanesan serve ba konsumu internu [Fretilin nian] ho ambisaun grupus [Maputo] ho partidus balu [Fretilin] nebe’e haharak poder” (Fórum Haksesuk, 15/05/08). Iha fali fatin seluk, iha debate ida organiza husi estudantes Timor oan sira iha Coimbra, Tilman ko’alia klaru liu tan i rekuinese Governu AMP: "Maski iha opozisaun, Governu [AMP] ida ne’e hau nian Governu tanba iha ona problemas aat tebtebes depois de ukun an. Ita iha sorti hodi kaer metin buat nebe’e importante liu iha ita nian istoria “ita nian soberania” (Fórum Haksesuk, 15/05/08).

Manuel Tilman hanesan mos Cláudio Ximenes, hasai kursu direitu iha Portugal, neduni, nia hatene oin-sa sistema “reprezentasaun proporsional” ida funsiona iha Portugal nune’e mos iha fatin seluk, enkuantu Mari Alkatiri, hasai kursu direitu iha Mosambike, neduni, ita la hatene, se nia hatene ou la hatene interpreta. Ou parece hanesan deputadu Manuel Tilman dehan iha leten, halo interpretasaun ida tuir sira nia gostu hodi serve ba konsumu internu hodi bele atinji sira nian ambisaun politika, hakarak kaer ukun.

Haree ba Manuel Tilman nia afirmasaun iha leten, hatudu momos Fretilin la iha razaun. Afirmasaun Manuel Tilman nian hanesan forma de rekuinesimento ida ba “existência” Governu Xanana nian i hanesan golpe ida ba ninia aliadu Fretilin. Ikus liu, AD KOTA/PPT nebe’e sempre apoia Fretilin mos hatudu hadok an oituan husi Fretilin. Iha aprezentasaun OGE 2009, deputadu Jacob Xavier, husi PPT, nebe’e halo parte AD, vota a favor ba Orsamentu nebe’e Xanana aprezenta. Iha 2007, AD KOTA/PPT vota hamutuk ho nia aliadu Fretilin kontra bloku AMP ho sira seluk. Enkuantu Manuel Tilman nia voto la hatene, tanba nia la tuir votasaun OGE 2009. Interesante mos deputada Fretilin ida, Cipriana Pereira, la vota kontra OGE 2009, maibe hola pozisaun abstein (Fórum Haksesuk, 30/01/09). Husi buat hirak ne’e, ita bele nota katak, estratejia lideransa Fretilin nian atu manipula militantes sira hodi dehan AMP ilegal ho inkonstitusional hahu naksobu dadaun ona. Militantes sira hahu konsiente katak, lideransa partidu nian mak manipula rasik sira ba intereses pesoais lideransa balu nian.

Tuir Sun Tzu, estratega militar ida husi China, nia dehan iha kualker funu presiza bosok ka fo informasaun falsu ba ita nia inimigu hodi sira hakat sala. Kuandu ita nia inimigu halo sala hanesan vantagem ou vitoria relativa ida mai ita (Sun Tzu, A Arte de Guerra, Portugal, 4ª ed., Mem Martins, Europa-America, 2002: 14.) Iha politika, kualker sala boot ka ki’ik ida nebe’e ita nia adversariu halo, ne’e hanesan kreditu politiku ida mai ita. Iha Fretilin oin seluk, lideransa Fretilin mak konsientemente bosok ho fo fali informasaun falsu ba ninia militantes sira, hanesan dehan desizaun prezidenti Horta nian hatudu AMP forma Governu ne’e ilegal ho inkonstitusional. Kompara fali eleisoens lejislativas ho “futu manu” (sistema maioritário) nian. Haluha tiha katak, sistema “maioritário” nebe’e hanesan ho jogo “futu manu”, la’os uza iha eleisoens lejislativas, maibe iha eleisoens presidenciais. Ho bosok no fo informasaun falsu ba militantes sira hodi dudu ba oin kontra no hatun Governu AMP. Maibe estratejia ne’e dudu mos militante sira ba halo sala, halo violensia ho komete krimi, hanesan sunu uma ho hakanek ema seluk.

Se mak sei manan ho estratejia lideransa Fretilin nian? Klaru partidu sira seluk hanesan adversariu Fretilin nian mak manan, tanba Fretilin naran aat i lakon kredibilidade ba povu nia matan, mak sira la sei hili tan Fretilin, tanba Fretilin konotadu ona ho violensia i ninia lideransa manipulador ho bosokten. Ne’e hanesan mos kampanye gratis ida ba adversariu politiku Fretilin nian. Lideransa Fretilin to’o agora, seidauk konsiente nafatin ba sala boot nebe’e sira halo. Kontinua fo nafatin informasaun falsu ba militantes sira hodi dudu sira tuir “marcha da paz” nebe’e sei iha ajenda ka planu Fretilin nian. “Marcha” nebe’e ninia objektivu lolos la’os buka paz, maibe buka doko ho hamonu Governu hodi hadau hikas poder nebe’e lakon husi sira nia liman.

Karik lideransa Fretilin hanoin diak duni ba povu i hanoin eduka militantes Fretilin sira hodi halo opozisaun ida responsavel ho konstrutiva, tuir lolos sira eksplika lolos ba militantes sira katak, tuir sistema “reprezentasaun proporsional”, Fretilin labele ukun tanba la hetan maioria iha Parlamentu, la’os ba bosok fali militantes sira hodi dehan buat legal ho konstitusional sai fali ilegal ho inkonstitusional. La’os ba lohi fali militante sira hodi kompara fali eleisoens lejislativas ho “futu manu“, buat ida nebe’e labele kompara nian. Parese ida ne’e mak primeira vez iha mundu, lideransa partidu nian bosok, lohi, manipula no fornece fali informasaun falsu ba ninia militante sira hodi oho ninia partidu rasik.

Partidu vensedor eleisoens la forma Governu i sai opozisaun hanesan buat normal iha rai sira kaer sistema “reprezentasaun proporsional” ou demokrasia parlamentar. Partidu ki’ik ka sira nebe’e la’os “mais votadu” mos bele hetan maioria iha Parlamentu kuandu sira forma koligasaun ida hamutuk i bele forma Governu forte ho estavel ida. Hanesan daudaun partido ki’ik sira Likud, Yisrael Beiteinu, Shas, Judaizmu Unidu da Torah, Uniaun Nasional ho Habayit Hayehudi, forma Governu iha Israel ou CNRT hamutuk ho ASDT-PSD ho PD forma Governo iha TL.

Besik tinan rua ona, tempo ida naruk tebes ba ema jenius sira iha Fretilin, bele hadi’a nia sala, sala nebe’e halo interpretasaun kle’uk ba artigu 106 kona ba “aliança ho maioria parlamentar”. Tempu ona rekuinese desizaun Horta nian hatudu AMP forma Governu la kontra Konstituisaun.

Ho eleisoens lejislativas Israel nian bele mos loke lideransa Fretilin nia matan, liliu sira nebe’e hasai kursu iha direito, hanesan Mari Alkatiri ho José Texeira, hodi percebe diak liu tan katak, aliansa nebe’e forma antes ho depois eleisoens mesak legal hotu, i sistema “reprezentasaun proporsional” mos loke dalan ba partidu “menos votadu” sira hodi forma Governu liu husi koligasoens nebe’e hetan maioria iha Parlamentu. Xave atu forma Governu ida forte ho estavel iha ida de’it, mak se mak iha maioria iha Parlamentu. Maioria ne’e bele hetan husi partidu ida manan eleisoens ho maioria absoluta ou husi aliasa nebe’e hetan maioria iha Parlamentu. CNRT, ASDT-PSD, PD i ikus mais UNDERTIM tama tan, sira hetan maioria iha Parlamentu ho deputadus hamutuk na’in 39, iha nebe’e garante Governu forte ho estavel ida.

Partidu “mais votadu” sai opozisaun hanesan buat baibain ida. Bele haree, Kadima nebe’e kaer Governu iha Israel, no mos nudar “partidu mais votadu”, simu ho liman rua passa ba opozisaun i simu Governu Netanyahu nian ho legitimidade tomak. Ita hein lideransa Fretilin bele aprende buat ruma husi partidu Kadima ho senhora Tzipi Livni nebe’e hatene halo politika iha rai demokratiku ho sivilizadu ida.

*ex Coordenador Pedagógico iha Centro Nacional de Emprego e Formação Profissional - Tibar

Publikadu iha Forum Haksesuk, loron 2, 4, 6 fulan Marsu tinan 2009





No comments:

Post a Comment