My photo
Um escritor, um poeta, um aventureiro,

Monday, 30 March 2009

DEMOCRATIC GOVERNANCE FORUM: "LET´S TALK WITH OUR LEADERS" ACCOUNTABILITY AND TRANSPARENCY

Vise-Primeiru Ministru SE Mário Carrascalão

Dr Atul Khare, Reprezentante Espesiál Sekretáriu-Jerál Nasoens Unidas
nian ba Timór-Leste

Exelênsias

Distintus konvidadus

Senhoras i Senhores


Boa governasaun fundamentál tebes atu asegura katak ita nia Nasaun
nurak oan ne’e bele realiza nia mehi ba prosperiedade i páz rohan
laek.

Atravez-de estabelesimentu mekanizmu institusionál ne’ebé efisiente no
kultura boa governasaun mak ita sei bele enfrenta dezafius ho
dignidade no konfiansa.

Ha’u louva Nasoens Unidas ninia Misaun Integrada iha Timór Leste tanba
organiza Forum Governasaun Democrátika lubun ida ne’e ho tema
prinsipál “Let’s Talk With Our Leader”, ka Mai Ita Dadalia Ho Ita Nia
Nai Ulun sira. Forum hirak ne’e bele fó oportunidade ba sosiedade
sivíl atu rona no, importante liu, bele hato’o perguntas ba sira nia
líderes rasik.

Tanba bele enkoraja diálogu importante kona-ba asuntus nasionais, mak
forum hirak ne’e sei fó kontribuisaun boot hodi promove governasaun
demokrátika.

Matéria ba forum ohin nian maka “Responsabilizasaun no Transparênsia”.
Responsabilizasaun no transparênsia – hamutuk ho integridade no
lideransa – maka hanesan prinsípius fundamentais ba boa governasaun.

Orienta ho prinsípius hirak ne’e mak Governu Timór-Leste dezenvolve
daudaun mekanizmu institusionál ida atu promove boa governasaun.
Mekanizmu ne’e inklui estabelesimentu Komisaun Funsaun Públika ho
Komisaun Anti-Korrupsaun i reforsa liután Gabinete Inspetór Jerál.

Hau mós kontente tanba bele servisu hamutuk ho ema ida ne’ebé iha
kapasidade no integridade aas tebes, hanesan SE Vise-Primeiru Sr.
Eng. Mário Carrascalão, atu kaer governu nia ajenda kona-ba boa
governasaun.

Rezultadus husi servisu ne’e sei reforsa governasaun demokrátika iha
ita nia rain.


Senhoras i Sehores
Boa governasaun fundamentál tebes ba boun dezempenhu.
Sistema governasaun ida ne’ebé efetivu – ho estruturas, sistemas no
prosesus ne’ebé di’ak–fó kbiit ba governu atu atinje nia objetivus.

Prinsípius xave ba boa governasaun maka:
Responsabilizasaun;
Transparênsia;
Integridade; no
Lideransa.

Ne’e maka prinsípius ne’ebé orienta ita.

Ita presiza tebes banati-tuir prinsípius hirak ne’e atu nune’e públiku
bele fiár nafatin ba governu no ajênsias governu nian tomak.

Ida ne’e signifika mós katak, regras ne’ebé promove responsabilizasaun
sai hanesan parte integrante iha planeamentu, no iha prosesus servisus
i monitorizasaun governu nian.

Inklui mós oinsá bele asegura katak, servidores iha governu, hatene
katak sira nia asoens no dezempenhu sei submete ba kontrolu rigorozu.

Transparênsia iha governu hanesan protesaun ne’ebé di’ak liuhotu
hasoru hahalok ne’ebé la iha étika hodi bele kria kultura ida ne’e ho
étika.


Sehoras i Senhores
Ita mós labele haluha katak boa governasaun ne’e mós buat ida ke la’ós
deit kona-ba regras no regulamentus. Relasiona mós ho lideransa no
dezenvolvimentu kultura ida ne’ebé ho étika no integridade.

Importante katak ita nia ukun na’in sira – iha nível nasionál,
distritál no nível sub-distritus, hatudu ezemplu di’ak no atua ho
integridade.

Ho esforsu husi ukun na’in sira atu kria kultura ida ne’ebé ho étika,
mak ita bele atinje governu ida ke moos i efetivu.

Senhoras i Senhores
Prinsípius responsabilizasaun i transparênsia ne’e maka prinsípius
importantes tebes ne’ebé hametin Governu ninia determinasaun atu
estabelese fundasaun ida ba boa governasaun.

Reformas xave inklui estabelesimentu Komisaun Funsaun Públika no
Komisaun Anti-Korrupsaun.

Instituisoens hirak ne’e sei independentes i sei asegura governu
ne’ebé onestu – sira iha kbi’it atu bolu atensaun kona-ba failhansus
governu nian no ajuda ita atu hadi’a dezempenhu.

Komisaun Funsaun Públika mak sei kaer objetivus xave hodi asegura:
Rekrutamentu iha funsaun Públika bazeia ba méritu;
Funsaun Públika tenke apartidária no imparsiál; i
Dezenvolve valores étikas ne’ebé forte iha funsaun Públika tomak.

Sei laiha fatin ba patroens polítikus, favoritízmu no sei la iha fatin
ba korrupsaun iha funsaun Públika,

Senhores i Senhoras
Governu mós submete tiha ona proposta lei ida ba Parlamentu Nasionál
atu estabelese Komisaun Anti-Korrupsaun independente, atu dedika-an
de’it ba kombate korrupsaun iha Timór-Leste.

Lei ne’e dezenvolve depoisde períodu naruk ida hala’o konsulta nasionál ho Povu
Timór –Leste.

Komisaun Anti-Korrupsaun sei asegura katak ema hirak ne’ebé envolve
iha atus korrupsaun submete ba investigasaun i sei hetan pena boot.

Komisaun Anti-Korrupsaun sei iha mandatu atu halo investigasoens ba
atus korrupsaun; hato’o evidênsias ba Prokuradór Jerál hodi foti
prusesu; no hala’o kampanhes edukasaun

Komisaun Anti-Korrupsaun sei iha poderes investigativus boot. Komisaun
ne’e iha podér atu bele hetan asesu ba dokumentus no edifísius.

Ho aprovasaun husi Tribunál, i hamutuk ho Prókurador, Komisaun
Anti-Korrupsaun mós iha poderes atu:
Konjela kontas bankárias
Prende “asets” ka beins
Intersepta no grava komunikasoens eletrónikas, inklui monitoriza
xamadas telfónikas no email ka korreius elektrónikus

No ikus liu Kódigu Penál mós aprova ona iha Konselhu Ministrus i
Prezidente Repúblika sei promulga iha loron hirak mai. Iha ita nia
Kódigu Penál, iha mós referênsia klara ba aktus ka krimes kona-ba
Korrupsaun.

Senhoras i Senhoras,
Vise Primeiru Ministru foun, SE Eng. Mário Carrascalão, sei kaer papél
importante atu hadi’a responsabilizasaun no transparênsia iha Governu
laran.

Prioridades xave ida hotu ne’ebé nia sei haré, mak atu reforsa liután
Gabinete Inspetór Jerál.

Ida ne’e inklui prepara lei orgánika ida atu reforsa autoridade legál
no kapasidade Gabinete Inspetór Jerál nian, atu hala’o auditoria
internál independente no inspesiona Ajênsias ho Departamentus
Governu nian.

Ida ne’e sei hadi’a responsabilizasaun husi Governu i karik deskobre
korrupsaun ou ilegalidade ruma, Inspetór Jerál iha kbiit atu enkaminha
asuntus hirak ne’e ba autoridades kompetentes hanesan Komisaun
Anti-Korrupsaun no Prokuradór Jerál.

Objetivu husi reformas governasaun nian hirak ne’e atu hasa’e
transparênsia no responsabilizasaun.

Senhoras i Senhores,
Ho estabelesimentu mekanizmu boa governasaun efetivu ida, bazeia ba
prinsípius transparênsia no responsabilizasaun, ita bele dezenvolve
ita nia rain no demokrasía.

Kultura governasaun demokrátika iha Timór-Leste ne’e maka ita nia forsa boot.
Dalaruma ita la konkorda malu – maibé ne’e maka demokrasía ninia sentidu.

Ita iha nível partisipasaun polítika ida ne’ebé aas tebes ho istória
ida kona-ba debate ho envolvimentu politíku ne’ebé di’ak.

Ita uluk luta ho mehi ida atu harí nasaun ho governu demokrátiku ida.
No ita hatene katak boa governasaun mós depende ba governasaun ida ke
demokrátika.

Ho matéria forum ohin nian kona-ba “responsabilizasaun no
transparênsia”, ita tenke rekonhese katak simu prinsípius hirak ne’e
hanesan parte importante ida husi ita nia esforsu hamutuk atu hametin
liután ita nia governasaun demokrátika

Senhoras i Senhores
Hau agradese ba UNMIT tanba organiza forum importante ida ne’e.
Transparênsia no responsabilizasaun maka hanesan prinsípius bázikus ba
boa governasaun

Kaer ba prinsípius hirak ne’e mak Governu Timór-Leste dezenvolve
daudaun Mekanizmu institusionál ida atu promove boa governasaun.

Rezultadus husi servisu ne’e sei hametin liután governu demokrátiku
iha ita nia rain.

Agora ha’u remata ona ha’u nia ko’alia, atu fó tempu barak liu ba
sesaun perguntas no respostas.

Obrigadu Barak!

Kay Rala Xanana Gusmão

No comments:

Post a Comment